ನವದೆಹಲಿ: ಏರ್ ಇಂಡಿಯಾದಲ್ಲಿನ ತನ್ನ ಬಹುತೇಕ ಪಾಲನ್ನು 2018ರಲ್ಲಿ ಒಂದೇ ಹರಾಜಿನಲ್ಲಿ ಮಾರಾಟ ಮಾಡಲು ಕೇಂದ್ರ ಸರ್ಕಾರ ವಿಫಲವಾಗಿತ್ತು. ಇದೀಗ ತನ್ನ ಸಂಪೂರ್ಣ ಪಾಲನ್ನು ಮಾರಾಟ ಮಾಡಲು ಸರ್ಕಾರ ಮತ್ತೊಮ್ಮೆ ಯೋಜನೆ ರೂಪಿಸಿದೆ.
ಏರ್ ಇಂಡಿಯಾದ ಮೇಲೆ ಒಲವು ಹೊಂದಿರುವವರು ದಾಖಲೆ ಸಲ್ಲಿಸಲು ಕೇಂದ್ರ ಸರ್ಕಾರ ಸೋಮವಾರ ಬಿಡ್ ಆಹ್ವಾನಿಸಿದೆ. ದೇಶೀಯ ಮತ್ತು ಅಂತಾರಾಷ್ಟ್ರೀಯ ಮಾರ್ಗಗಳೆರಡರಲ್ಲೂ ಸಂಚರಿಸುವ ಏರ್ ಇಂಡಿಯಾದಲ್ಲಿನ ಶೇ 100 ರಷ್ಟು ಪಾಲನ್ನು ಭಾರತವು ಮಾರಾಟ ಮಾಡಲಿದೆ ಎಂದು ಸರ್ಕಾರ ತಿಳಿಸಿದೆ.
ದಾಖಲಾತಿ ಸಲ್ಲಿಸಲು ಮಾರ್ಚ್ 17ರವರೆಗೆ ಗಡುವು ನೀಡಿದ್ದು, ಯಾವುದೇ ಹರಾಜುದಾರ ಇತರೆ ಜವಾಬ್ದಾರಿಗಳೊಂದಿಗೆ 3.26 ಬಿಲಯನ್ ಡಾಲರ್ ಸಾಲದಲ್ಲಿರುವ ಏರ್ ಇಂಡಿಯಾವನ್ನು ಒಪ್ಪಿಕೊಳ್ಳಬೇಕಾಗಿದೆ ಎಂದು ಸರ್ಕಾರ ಪ್ರಕಟಣೆಯಲ್ಲಿ ಹೇಳಿದೆ.
ಕೇಂದ್ರ ಸರ್ಕಾರ 2018ರಲ್ಲಿ ಏರ್ ಇಂಡಿಯಾದಲ್ಲಿರುವ ತನ್ನ ಪಾಲಿನ ಶೇ 76 ರಷ್ಟನ್ನು ಮಾರಾಟ ಮಾಡಲು ಮುಂದಾಗಿತ್ತು. ಅಲ್ಲದೆ, ಆ ಸಮಯದಲ್ಲಿ ಏರ್ ಇಂಡಿಯಾ 5.1 ಬಿಲಿಯನ್ ಡಾಲರ್ ಸಾಲದ ಸುಳಿಯಲ್ಲಿತ್ತು. ಆ ಸಮಯದಲ್ಲಿ ಖರೀದಿದಾರರ ಸಂಭವನೀಯತೆ ಕಡಿಮೆ ಎಂದು ತಿಳಿದು ವಾಪಸ್ ಬಳಿಕ ಪಡೆದುಕೊಂಡಿತ್ತು. (ಏಜೆನ್ಸೀಸ್)