ನವದೆಹಲಿ: ನಿಮ್ಮ ಕಾರಿನ ಡೀಸೆಲ್ ಅಥವಾ ಪೆಟ್ರೋಲ್ ವೆಚ್ಚವನ್ನು ಕಡಿಮೆ ಮಾಡಲು ಗೂಗಲ್ ಮ್ಯಾಪ್ ಹೊಸ ಫೀಚರ್ ಒಂದನ್ನು ಪರಿಚಯಿಸಿದೆ. ಈ ಹೊಸ ಫೀಚರ್ ಹೇಗೆ ಕೆಲಸ ಮಾಡಲಿದೆ ಎಂಬುದನ್ನು ನಾವೀಗ ತಿಳಿದುಕೊಳ್ಳೋಣ.
ಹೈದರಾಬಾದ್ ಹೊರತುಪಡಿಸಿ ದೇಶದ ಬಹುತೇಕ ಭಾಗಗಳಲ್ಲಿ ಒಂದು ಲೀಟರ್ ಪೆಟ್ರೋಲ್ ಬೆಲೆ 100 ರೂ. ಮತ್ತು ಡೀಸೆಲ್ ಬೆಲೆ 95 ರೂ. ದಾಟಿದೆ. ಇನ್ನು ನಮ್ಮ ವಾಹನಗಳ ಸ್ಥಿತಿಯನ್ನು ನೋಡಿದರೆ ಮೈಲೇಜ್ ತುಂಬಾ ಕಡಿಮೆ ಇವೆ. ಇದರಿಂದಾಗಿ ನಮ್ಮ ಜೇಬಿಗೆ ನಿರಂತರವಾಗಿ ಕತ್ತರಿ ಬೀಳುತ್ತಲೇ ಇದೆ. ಹಾಗಾಗಿ ನೀವು ಪೆಟ್ರೋಲ್ ವೆಚ್ಚವನ್ನು ಕಡಿಮೆ ಮಾಡಲು ಬಯಸುವುದಾದರೆ ಗೂಗಲ್ ಮ್ಯಾಪ್ನ ಈ ಹೊಸ ಫೀಚರ್ ನಿಮಗೆ ಸಹಾಯ ಮಾಡಲಿದೆ.
ಟೆಕ್ ಲೋಕದ ದೈತ್ಯ ಕಂಪನಿ ಗೂಗಲ್ ತನ್ನ ಗೂಗಲ್ ಮ್ಯಾಪ್ನಲ್ಲಿ ಫ್ಯುಯೆಲ್ ಎಫಿಸಿಯಂಟ್ ಡ್ರೈವ್ (ಇಂಧನ ಸಮರ್ಥ ಚಾಲನೆ) ಹೆಸರಿನ ಹೊಸ ಫೀಚರ್ ತಂದಿದೆ. ಆದರೆ, ಪ್ರಸ್ತುತ ಇದು ಕೆಲವೇ ದೇಶಗಳಲ್ಲಿ ಮಾತ್ರ ಬಳಕೆಯಲ್ಲಿದೆ. ಭಾರತದಲ್ಲಿ ಶೀಘ್ರದಲ್ಲೇ ಈ ಆ್ಯಪ್ ದೊರೆಯಲಿದೆ.
ನೀವು ಯಾವುದಾದರೊಂದು ಪ್ರವಾಸ ಕೈಗೊಂಡರೆ ಗೂಗಲ್ ಮ್ಯಾಪ್, ಫ್ಯುಯೆಲ್ ಎಫಿಸಿಯಂಟ್ ಮಾರ್ಗವನ್ನು ನಿಮಗೆ ಸೂಚಿಸಲಿದೆ. ಈಗಾಗಲೇ ಈ ಫೀಚರ್ ಕೆನಡಾ, ಯುಕೆ ಮತ್ತು ಯುರೋಪಿಯನ್ ದೇಶಗಳಲ್ಲಿ ಚಾಲ್ತಿಯಲ್ಲಿದೆ. ಈ ಫೀಚರ್ ಹೈಬ್ರಿಡ್ ಎಲೆಕ್ಟ್ರಿಕ್ ವಾಹನಗಳಿಗೂ ಕಾರ್ಯನಿರ್ವಹಿಸುತ್ತದೆ ಎಂಬುದು ಗಮನಾರ್ಹವಾಗಿದೆ.
ಈ ಫೀಚರ್ ಗೂಗಲ್ ಮ್ಯಾಪ್ಸ್ ಸೆಟ್ಟಿಂಗ್ನಲ್ಲಿ ದೊರೆಯಲಿದೆ. ನಾವು ಚಾಲನೆ ಮಾಡುತ್ತಿರುವ ಕಾರಿನ ಎಂಜಿನ್ ವಿವರಗಳನ್ನು ಆಯ್ಕೆ ಮಾಡಬೇಕು. ನಂತರ, ಸ್ವಯಂಚಾಲಿತವಾಗಿ ಅದು ಅತ್ಯುತ್ತಮ ಫ್ಯುಯೆಲ್ ಎಫಿಸಿಯಂಟ್ ಮಾರ್ಗವನ್ನು ಕಂಡುಕೊಳ್ಳುತ್ತದೆ ಮತ್ತು ನಮಗೆ ಸೂಚನೆ ನೀಡುತ್ತದೆ. ಈ ಫೀಚರ್ ಅನ್ನು ಆನ್ ಮಾಡಿದರೆ ಗೂಗಲ್ ಮ್ಯಾಪ್ ಕೇವಲ ಇಂಧನ ದಕ್ಷತೆಯ ಮೇಲೆ ಮಾತ್ರ ಗಮನಹರಿಸುತ್ತದೆ. ಆದರೆ, ಇದು ನೈಜ ಸಮಯದ ಸಂಚಾರವನ್ನು ಹೊರತುಪಡಿಸಿ ಇತರ ಅಂಶಗಳನ್ನು ಪರಿಗಣಿಸುವುದಿಲ್ಲ ಎಂದು ಗೂಗಲ್ ಹೇಳಿದೆ.
ಆ್ಯಕ್ಟಿವೇಟ್ ಮಾಡುವುದು ಹೀಗೆ….
* ಗೂಗಲ್ ಮ್ಯಾಪ್ ಓಪನ್ ಮಾಡಿ
* ಗೂಗಲ್ ಮ್ಯಾಪ್ನಲ್ಲಿರುವ ನಿಮ್ಮ ಪ್ರೊಫೈಲ್ ಐಕಾನ್ ಮೇಲೆ ಕ್ಲಿಕ್ ಮಾಡಿ
* ನ್ಯಾವಿಗೇಶನ್ ಸೆಟ್ಟಿಂಗ್ಸ್ಗೆ ಹೋಗಿ. ಅಲ್ಲಿ ನೀವು ರೂಟ್ ಆಪ್ಷನ್ಸ್ ನೋಡುತ್ತೀರಿ
* ಆಪ್ಷನ್ಗಳಲ್ಲಿ ಫ್ಯುಯೆಲ್ ಎಫಿಸಿಯಂಟ್ ರೂಟ್ ಮೇಲೆ ಕ್ಲಿಕ್ ಮಾಡಿ. ನಂತರ ಪರಿಸರ ಸ್ನೇಹಿ ರೂಟಿಂಗ್ ಮೇಲೆ ಕ್ಲಿಕ್ ಮಾಡಿ.
* ಇದಾದ ಬಳಿಕ ವಾಹನದ ಇಂಜಿನ್ ಆಯ್ಕೆ ಮಾಡಿದರೆ ಆ್ಯಪ್ ಆ್ಯಕ್ಟಿವೇಟ್ ಆದಂತೆ!
ನೀವು ನಿಮ್ಮ ವಾಹನದ ಎಂಜಿನ್ ವಿವರಗಳನ್ನು ಸರಿಯಾದ ತಿಳಿಸದಿದ್ದರೆ, ಗೂಗಲ್ ಮ್ಯಾಪ್ ಸ್ವಯಂಚಾಲಿತವಾಗಿ ಪೆಟ್ರೋಲ್ ಆಯ್ಕೆಯನ್ನು ಆರಿಸಿಕೊಳ್ಳುತ್ತದೆ. ತಮಗೆ ಲಭ್ಯವಿರುವ ಡೇಟಾವನ್ನು ಬಳಸಿಕೊಂಡು ಇಂಧನ ದಕ್ಷತೆಯನ್ನು ಲೆಕ್ಕಹಾಕಿ ಉತ್ತಮ ಮಾರ್ಗವನ್ನು ನೀಡುತ್ತದೆ ಎಂದು ಗೂಗಲ್ ಹೇಳುತ್ತದೆ. ಮತ್ತು ಇದು ಭಾರತೀಯ ರಸ್ತೆಗಳಲ್ಲಿ ಹೇಗೆ ಫಲಿತಾಂಶವನ್ನು ನೀಡುತ್ತದೆ ಎಂಬುದನ್ನು ಸದ್ಯ ಕಾದು ನೋಡಬೇಕಿದೆ. (ಏಜೆನ್ಸೀಸ್)
ಶಿಕ್ಷಕಿ ಜತೆ ಸರಸದಲ್ಲಿ ತೊಡಗಿದ್ದ ಪುತ್ರನನ್ನು ಹಿಡಿದುಕೊಟ್ಟ Life 360 ಆ್ಯಪ್ ಹಿಂದಿದೆ ವಿವಾದದ ಕರಿನೆರಳು!
ಮಹಿಳೆಯ ಕಿಡ್ನಿಯಲ್ಲಿತ್ತು 300ಕ್ಕೂ ಅಧಿಕ ಕಲ್ಲುಗಳು! ಕಾರಣ ಕೇಳಿದ್ರೆ ನಿಮ್ಮ ಹುಬ್ಬೇರೋದು ಖಚಿತ