ಚೆನ್ನೈ: ಚಿನ್ನ ಎಂದರೆ ಎಲ್ಲರಿಗೂ ಒಮ್ಮೆ ಮುಟ್ಟಿ ನೋಡಬೇಕು ಎನಿಸುತ್ತದೆ. ಆದರೆ ಇಲ್ಲಿ ಮೂವರು ಸ್ಮಗ್ಲರ್ಸ್ಗಳಿಂದ ಸಿಕ್ಕ ಚಿನ್ನವನ್ನು ಮುಟ್ಟಿನೋಡಲು ಒಮ್ಮೆ ಹಿಂಜರಿಕೆ ಉಂಟಾಗುತ್ತದೆ. ಏಕೆಂದರೆ ಚಿನ್ನ ಕಳ್ಳಸಾಗಣೆಗೆ ಈ ಸ್ಮಗ್ಲರ್ಸ್ ಕಂಡುಕೊಂಡ ‘ದಾರಿ’ಯೇ ಅಂಥದ್ದು.
ದುಬೈನಿಂದ ಚಿನ್ನ ಕಳ್ಳಸಾಗಣೆ ಮಾಡಿಕೊಂಡು ಬಂದಿದ್ದ ಮೊಹಮ್ಮದ್ ಮುಸ್ತಾಫಾ ಮೀರಾಸಾ ಮರೈಕ್ಕಯರ್, ಶೌಬರ್ ಅಲಿ ಐನಾಜ್ ಹಾಗೂ ಶೇಖ್ ಅಬ್ದುಲ್ಲ ಹಬೀಬ್ ಅಬ್ದುಲ್ಲ ಎಂಬ ಮೂವರು ಸ್ಮಗ್ಲರ್ಸ್ ಕಸ್ಟಮ್ಸ್ ಅಧಿಕಾರಿಗಳ ಕೈಯಲ್ಲಿ ಸಿಕ್ಕಿಬಿದ್ದಿದ್ದಾರೆ.
ಎರಡು ಪ್ರತ್ಯೇಕ ವಿಮಾನಗಳಲ್ಲಿ ಚೆನ್ನೈಗೆ ಬಂದಿದ್ದ ಇವರನ್ನು ಕಸ್ಟಮ್ಸ್ ಅಧಿಕಾರಿಗಳು ವಿಚಾರಣೆ ನಡೆಸಿ ತಪಾಸಣೆಗೆ ಒಳಪಡಿಸಿದಾಗ ಚಿನ್ನ ಕಳ್ಳಸಾಗಣೆ ಮಾಡುತ್ತಿರುವುದನ್ನು ಒಪ್ಪಿಕೊಂಡಿದ್ದಾರೆ. ಈ ಮೂವರೂ ಚಿನ್ನವನ್ನು ಪೇಸ್ಟ್ ಮಾಡಿ ಗುದನಾಳದಲ್ಲಿ ಇರಿಸಿಕೊಂಡು ತಂದಿದ್ದರು. ಜತೆಗೆ ಇವರು ಇನ್ನಿತರೆಡೆ ಅಡಗಿಸಿ ಇರಿಸಿಕೊಂಡಿದ್ದ ಚಿನ್ನವನ್ನೂ ಪತ್ತೆ ಮಾಡಿದ ಅಧಿಕಾರಿಗಳು, ಒಟ್ಟು 83.7 ಲಕ್ಷ ಮೌಲ್ಯದ 1.62 ಕೆ.ಜಿ. ಚಿನ್ನವನ್ನು ವಶಪಡಿಸಿಕೊಂಡಿದ್ದಾರೆ. (ಏಜೆನ್ಸೀಸ್)