ನವದೆಹಲಿ: ನವದಂಪತಿಯು ತಮ್ಮ ವಿವಾಹ ಸಮಾರಂಭವನ್ನು ಮತ್ತಷ್ಟು ವರ್ಣಮಯವಾಗಿಸಲು ಫೋಟೋಶೂಟ್ ಮೊರೆ ಹೋಗುವುದು ಸಹಜ. ಅದರಲ್ಲೂ ಕ್ರಿಯೆಟಿವ್ ಫೋಟೋ ಹಾಗೂ ವಿಡಿಯೋಗಾಗಿ ಫೋಟೋಗ್ರಾಫರ್ ಇನ್ನಿಲ್ಲದ ಕಸರತ್ತು ಮಾಡುವುದು ಕೆಲವೊಮ್ಮೆ ವಿನೂತನ ಕ್ಷಣಕ್ಕೆ ಸಾಕ್ಷಿಯಾಗುತ್ತದೆ ಎಂಬುದಕ್ಕೆ ಈ ಒಂದು ಘಟನೆ ಉದಾಹರಣೆಯಾಗಿದೆ.
ಭಾರತೀಯ ಮೂಲದ ಅಮರಿಕನ್ ದಂಪತಿಯ ವೆಡ್ಡಿಂಗ್ ಫೋಟೋಶೂಟ್ ವೇಳೆ ಅನಿರೀಕ್ಷಿತ ಅತಿಥಿಯೊಬ್ಬರ ಮಧ್ಯಪ್ರವೇಶದ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಆ ಅತಿಥಿ ಬೇರೆ ಯಾರು ಅಲ್ಲ ಜಿರಾಫೆ ಎಂಬುದೇ ಒಂದು ವಿಶೇಷ.
ಅಂದಹಾಗೆ ಈ ವಿಶೇಷ ಕ್ಷಣ ಸೆರೆಯಾಗಿದ್ದು ಕ್ಯಾಲಿಫೋರ್ನಿಯಾದ ಮಲಿಬು ಏರಿಯಾದಲ್ಲಿರುವ ಸ್ಯಾಡಲ್ರಾಕ್ ರಾಂಚ್ ಎಂಬ ಫಿಲ್ಮಿಂಗ್ ಮತ್ತು ಫೋಟೋಗ್ರಫಿ ಸ್ಥಳದಲ್ಲಿ.
ವಿಡಿಯೋದಲ್ಲಿ ಏನಿದೆ:? ನವದಂಪತಿ ಅಮೀಶ್ ಮತ್ತು ಮೇಘನಾ ಜಿರಾಫೆ ಬೇಲಿಯ ಮುಂದೆ ನಿಂತು ಫೋಟೋಗಾಗಿ ತಯಾರಿ ನಡೆಸುವಾಗ ಹಿಂದೆ ಇದ್ದ ಜಿರಾಫೆ ಅಮೀಶ್ ತಲೆಯ ಮೇಲಿದ್ದ ಪೇಟವನ್ನು ತಿನ್ನಲು ಯತ್ನಿಸುತ್ತದೆ. ಇನ್ನೇನು ಪೇಟವನ್ನು ಬಾಯಿಯಲ್ಲಿ ಕಚ್ಚಿಕೊಂಡು ಮೇಲೆತ್ತಿಕೊಳ್ಳಬೇಕು ಎನ್ನುವಷ್ಟರಲ್ಲಿ ಮೇಘನಾ ಬಿಡಿಸಲು ಪ್ರಯತ್ನಿಸುತ್ತಾರೆ. ಸಾಧ್ಯವಾಗದಿದ್ದಾಗ ಫೋಟೋಗ್ರಾಫರ್ ಜಿಗಿದು ಪೇಟವನ್ನು ಕಿತ್ತುಕೊಳ್ಳುತ್ತಾರೆ. ಬಳಿಕ ಅನಿರೀಕ್ಷಿತ ಕ್ಷಣವನ್ನು ನೆನೆದು ನವದಂಪತಿ ನಗೆಗಡಲಲ್ಲಿ ತೇಲುತ್ತಾರೆ.
ಅಪೆರಿನಾ ಸ್ಟುಡಿಯೋಸ್ ವಿಡಿಯೋವನ್ನು ಸೆರೆಹಿಡಿದಿದ್ದು, ತಮ್ಮ ಯೂಟ್ಯೂಬ್ ಚಾನಲ್ನಲ್ಲಿ ಶೇರ್ ಮಾಡಿಕೊಂಡಿದ್ದು, ಈಗಾಗಲೇ ವಿಡಿಯೋವನ್ನು 13 ಸಾವಿರಕ್ಕೂ ಹೆಚ್ಚು ಮಂದಿ ವೀಕ್ಷಣೆ ಮಾಡಿದ್ದಾರೆ. ಸಾಕಷ್ಟು ಕಮೆಂಟ್ಗಳು ಕೂಡ ಹರಿದುಬರುತ್ತಿದೆ. (ಏಜೆನ್ಸೀಸ್)
ಬಾಲಿವುಡ್ ನಟಿಯ ಅತ್ತೆಯಿಂದ ಫ್ಲಿಪ್ ದಿ ಸ್ವಿಚ್ ಹಾಡಿಗೆ ಹೆಜ್ಜೆ: ವೈರಲ್ ಆಯ್ತು ಈ ಜೋಡಿಯ ಡ್ಯಾನ್ಸ್
VIDEO| ಮಂಗಗಳ ಹಾವಳಿಗೆ ಬ್ರೇಕ್ ಹಾಕಲು ಕರಡಿ ವೇಷದಲ್ಲಿ ಅವುಗಳ ಮುಂದೆ ಹೋದ ಐಟಿಬಿಪಿ ಸಿಬ್ಬಂದಿ: ಮುಂದೇನಾಯಿತು?