ನವದೆಹಲಿ: ಚೀನಾ-ಪಾಕಿಸ್ತಾನ ಇಕನಾಮಿಕ್ ಕಾರಿಡಾರ್(ಸಿಪಿಇಸಿ) ಮೂಲಕ ಪಾಕಿಸ್ತಾನದ ಮೇಲೆ ಪ್ರಾಬಲ್ಯ ಸಾಧಿಸುತ್ತಿರುವ ಚೀನಾ ಇತ್ತೀಚೆಗೆ ಜಮ್ಮು-ಕಾಶ್ಮೀರದ ಪ್ರತ್ಯೇಕತಾವಾದಿಗಳ ಪಾಲಿಗೆ ಮಗ್ಗುಲ ಮುಳ್ಳಾಗಿ ಪರಿಣಮಿಸಿದೆ. ಚೀನಾಕ್ಕೆ ಗಿಲ್ಗಿಟ್-ಬಾಲ್ಟಿಸ್ತಾನದ ಮೇಲೆ ಕಣ್ಣು. ಅದನ್ನು ವಶಪಡಿಸಿಕೊಳ್ಳು ಅದು ನಾನಾ ರೀತಿಯ ಕಸರತ್ತುಗಳನ್ನು ಆರಂಭಿಸಿದೆ.
ಪರಿಣಾಮ, ಇಸ್ಲಾಮಾಬಾದ್ನಲ್ಲಿ ಗಿಲ್ಗಿಟ್- ಬಾಲ್ಟಿಸ್ತಾನ ವಿಚಾರವಾಗಿ ಇದುವರೆಗೆ ಮೂರು ಬಾರಿ ಸಭೆ ನಡೆದಿದೆ. ಪಾಕಿಸ್ತಾನದಲ್ಲಿ ಮೀಟಿಂಗ್ ನಡೆದಾಗೆಲ್ಲ ಚೀನಾ ಸೇನೆ ಲಡಾಕ್ ಭಾಗದಲ್ಲಿ ಅತಿಕ್ರಮಣದ ಪ್ರಯತ್ನಗಳಾಗಿವೆ. ಮೂಲಗಳ ಪ್ರಕಾರ, ಕಳೆದ ವರ್ಷ ಇಸ್ಲಾಮಾಬಾದ್ನಲ್ಲಿ ಈ ಕುರಿತ ಮೊದಲ ಸಭೆ ನಡೆದಿತ್ತು. ಪಾಕಿಸ್ತಾನದ ಸೇನೆಯ ಉನ್ನತ ಅಧಿಕಾರಿಗಳೆಲ್ಲ ಅದರಲ್ಲಿ ಭಾಗವಹಿಸಿದ್ದರು. ಕಾಶ್ಮೀರದ ಪ್ರತ್ಯೇಕತಾವಾದಿಗಳಿಗೂ ಆ ಸಭೆಯಲ್ಲಿ ಪಾಲ್ಗೊಳ್ಳುವುದಕ್ಕೆ ಆಹ್ವಾನವಿತ್ತು. ಗಿಲ್ಗಿಟ್ -ಬಾಲ್ಟಿಸ್ತಾನವನ್ನು ಪಾಕಿಸ್ತಾನದ ಜತೆಗೆ ವಿಲೀನಗೊಳಿಸುವ ವಿಚಾರವನ್ನೂ ಅಲ್ಲಿ ಚರ್ಚಿಸಲಾಗಿತ್ತು. ಆದರೆ ಈ ಪ್ರಸ್ತಾವನೆಯನ್ನು ಕಾಶ್ಮೀರಿ ಪ್ರತ್ಯೇಕತಾವಾದಿಗಳು ಒಪ್ಪಿಕೊಂಡಿರಲಿಲ್ಲ. ಇದು ಪಾಕಿಸ್ತಾನ ಸೇನೆ ಮತ್ತು ಐಎಸ್ಐಗೆ ನುಂಗಲಾರದ ತುತ್ತಾಗಿ ಪರಿಣಮಿಸಿತ್ತು.
ಮೂರನೇ ಸಭೆ ಈ ವರ್ಷ ಫೆಬ್ರವರಿಯಲ್ಲಿ ನಡೆದಿದ್ದು, ಪಾಕ್ ಸೇನೆಯ ಇನ್ನೊಬ್ಬ ಉನ್ನತಾಧಿಕಾರಿ ಅದರ ಅಧ್ಯಕ್ಷತೆ ವಹಿಸಿದ್ದ. ಈ ಸಭೆಯಲ್ಲಿ ಪಾಕಿಸ್ತಾನದ ಕಾನೂನು ಸಚಿವ, ಪಿಒಕೆಯ ಕಾನೂನು ಸಚಿವ, ಪಿಒಕೆಯ ಪ್ರಧಾನಿ, ಗಿಲ್ಗಿಟ್ ಬಾಲ್ಟಿಸ್ತಾನದ ಮುಖ್ಯಮಂತ್ರಿ, ಹುರಿಯತ್ ಮತ್ತು ಜಮ್ಮು ಕಾಶ್ಮೀರ ಲಿಬರೇಷನ್ ಫ್ರಂಟ್(ಜೆಕೆಎಲ್ಎರ್ಫ್)ನ ಎರಡೂ ಬಣಗಳ ನಾಯಕರು ಭಾಗಿಯಾಗಿದ್ದರು.
ಇದನ್ನೂ ಓದಿ: ಕರೊನಾ ಕುರಿತು ಚೀನಾ ಮಾಹಿತಿ ನೀಡಿಲ್ಲ – ಬದಲಾಯಿತು ಡಬ್ಲ್ಯುಎಚ್ಒ ವರಸೆ
ಈ ಸಭೆಯಲ್ಲಿ ಪಾಕಿಸ್ತಾನ ಸೇನೆಯು ಗಿಲ್ಗಿಟ್-ಬಾಲ್ಟಿಸ್ತಾನದ ಇತಿಹಾಸದ ಚಿತ್ರಣ ನೀಡಿದ್ದು, ಅದು ಜಮ್ಮು-ಕಾಶ್ಮೀರದ ಭಾಗವೇ ಆಗಿರಲಿಲ್ಲ. ಅದನ್ನು ಬ್ರಿಟಿಷರು ಮತ್ತು ಡೋಗ್ರಾ ಮಹಾರಾಜ ಬಲವಂತವಾಗಿ ವಿಲೀನಮಾಡಿಕೊಂಡಿರುವುದು ಎಂದು ಮನವರಿಕೆ ಮಾಡಿಕೊಡಲು ಪ್ರಯತ್ನಿಸಿತ್ತು. ಹುರಿಯತ್ ನಾಯಕರು ಇದಕ್ಕೆ ಸಹಮತ ವ್ಯಕ್ತಪಡಿಸಿದರೂ, ಜೆಕೆಎಲ್ಎಫ್ ಮತ್ತು ಕಾಶ್ಮೀರದ ಎಸ್ಎಎಸ್ ಗಿಲಾನಿಯವರ ಪ್ರತಿನಿಧಿಗಳು ಯಾವುದೇ ಪ್ರತಿಕ್ರಿಯೆ ನೀಡಿರಲಿಲ್ಲ ಎಂದು ಹೇಳಲಾಗುತ್ತಿದೆ. ಇನ್ನೊಂದು ಮಾಹಿತಿ ಪ್ರಕಾರ, ಗೀಲಾನಿಯ ಪ್ರತಿನಿಧಿಗಳು ಪಾಕ್ ಸೇನೆಯ ಪ್ರಸ್ತಾವನೆಗೆ ವಿರೋಧ ವ್ಯಕ್ತಪಡಿಸಿದ್ದಲ್ಲದೆ, ಶ್ರೀನಗರಕ್ಕೆ ಕರೆ ಮಾಡಿ ನಿಲುವು ಸ್ಪಷ್ಟಪಡಿಸುವಂತೆ ಮತ್ತು ಮುಂದಿನ ನಡೆಯ ಕುರಿತು ನಿರ್ದೇಶನ ನೀಡುವಂತೆ ಸೂಚಿಸಿದ್ದರು.
ಗಿಲ್ಟಿಗ್-ಬಾಲ್ಟಿಸ್ತಾನದ ವಿಲೀನ ಪ್ರಕ್ರಿಯೆ ಕಾಶ್ಮೀರದಲ್ಲಿನ ಉಗ್ರ ಚಳವಳಿಗೆ ಕೆಡುಕು ಉಂಟುಮಾಡೀತು ಎಂದು ಗೀಲಾನಿ ಬಣದ ಪ್ರತಿನಿಧಿಗಳು ಆತಂಕ ಮತ್ತು ಕಳವಳ ವ್ಯಕ್ತಪಡಿಸಿ ಪಾಕ್ ಸೇನೆಯ ಪ್ರಸ್ತಾವನೆಯನ್ನು ನಿರಾಕರಿಸಿದ್ದಾಗಿ ವರದಿಯಾಗಿದೆ. ಜೆಕೆಎಲ್ಎಫ್ ಪ್ರತಿನಿಧಿಗಳೂ ಸರಿಯಾದ ಅಭಿಪ್ರಾಯ ವ್ಯಕ್ತಪಡಿಸದ ಕಾರಣ ಸಭೆ ಫಲಿತಾಂಶವಿಲ್ಲದ ಕೊನೆಗೊಂಡಿದೆ. (ಏಜೆನ್ಸೀಸ್)
ಪಿಒಕೆ, ಗಿಲ್ಗಿಟ್-ಬಾಲ್ಟಿಸ್ತಾನದ ಮೇಲಿದೆ ಚೀನಾ ಕಣ್ಣು: ಬದಲಾಗಿದೆ ಯುದ್ಧತಂತ್ರ!