ನವದೆಹಲಿ: ಕರೊನಾ ವೈರಸ್ ಕೋವಿಡ್ 19 ಸೋಂಕಿನ ಕುರಿತಾಗಿ ಆರಂಭಿಕ ಹಂತದಲ್ಲೇ ಚೀನಾ ಮಾಹಿತಿ ನೀಡಿರಲಿಲ್ಲ ಎಂದು ಮಾಹಿತಿ ತಿದ್ದುಪಡಿ ಮಾಡುವ ಮೂಲಕ ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯುಎಚ್ಒ ) ತನ್ನ ವರಸೆಯನ್ನು ಸ್ವಲ್ಪ ಬದಲಾಯಿಸಿಕೊಂಡಿದೆ.
ಆರಂಭಿಕ ಹಂತದಲ್ಲಿ ಡಬ್ಲ್ಯುಎಚ್ಒ ವರದಿ ಗಮನಿಸಿದರೆ ಅಲ್ಲಿ ಅದು, ಚೀನಾ ಮಾಹಿತಿ ಒದಗಿಸಿತ್ತು ಎಂದೇ ಹೇಳುತ್ತ ಬಂದಿತ್ತು. ಆದರೆ, ಹೊಸ ಮಾಹಿತಿಯಲ್ಲಾದ ಪರಿಷ್ಕರಣೆ ಎಲ್ಲರನ್ನೂ ಚಿಂತೆಗೀಡು ಮಾಡುವಂತೆ ಇದೆ. ಅಮೆರಿಕದ ವಾಷಿಂಗ್ಟನ್ ಎಕ್ಸಾಮಿನರ್ ಎಂಬ ವಾರಪತ್ರಿಕೆ ಈ ವಿಷಯದತ್ತ ಜಗತ್ತಿನ ಗಮನಸೆಳೆದಿದೆ.
ಡಬ್ಲ್ಯುಎಚ್ಒ ವೆಬ್ಸೈಟ್ನಲ್ಲಿ ಬದಲಾಗಿದ್ದೇನು?
ಕರೊನಾ ವೈರಸ್ ಸೋಂಕು ಆರಂಭಿಕ ಹಂತದಲ್ಲಿ ಚೀನಾದ ಹುಬೈ ಪ್ರಾಂತ್ಯದ ವುಹಾನ್ ನಗರಕ್ಕೆ ಮಾತ್ರ ಸೀಮಿತವಾಗಿತ್ತು ಎಂಬ ಟೈಮ್ಲೈನ್ ಅನ್ನು ಡಬ್ಲ್ಯುಎಚ್ಒ ಸೈಟ್ ನಿರ್ವಹಿಸುತ್ತ ಬಂದಿದೆ.
ಟೈಮ್ಲೈನ್ನಲ್ಲಿರುವ ಹಳೆಯ ಮಾಹಿತಿ ಹೀಗಿದೆ: ಡಿಸೆಂಬರ್ 31, 2019 – ಚೀನಾದ ವುಹಾನ್ ಮುನ್ಸಿಪಲ್ ಹೆಲ್ತ್ ಕಮಿಷನ್ ನೀಡಿದ ಮಾಹಿತಿ ಪ್ರಕಾರ ಹುಬೈ ಪ್ರಾಂತ್ಯದ ವುಹಾನ್ನಲ್ಲಿ ಒಂದಷ್ಟು ನ್ಯುಮೋನಿಯಾ ಕೇಸ್ಗಳು ಕಂಡುಬಂದಿವೆ. ನಂತರದಲ್ಲಿ ಇದು ನೋವೆಲ್ ಕರೊನಾ ವೈರಸ್ ಸೋಂಕು ಎಂಬುದನ್ನು ದೃಢೀಕರಿಸಲಾಗಿದೆ.
ಪರಿಷ್ಕೃತ ಮಾಹಿತಿ ಹೀಗಿದೆ: ಡಿಸೆಂಬರ್ 31, 2019 – ಪೀಪಲ್ಸ್ ರಿಪಬ್ಲಿಕ್ ಆಫ್ ಚೀನಾದಲ್ಲಿನ ಡಬ್ಲ್ಯುಎಚ್ಒ ಕಂಟ್ರಿ ಆಫೀಸ್ ಅಲ್ಲಿ ವುಹಾನ್ ಮುನ್ಸಿಪಲ್ ಹೆಲ್ತ್ ಕಮಿಷನ್ ನೀಡಿದ ಮಾಧ್ಯಮ ಹೇಳಿಕೆಯನ್ನು ಅವರ ವೆಬ್ಸೈಟ್ನಿಂದ ಸಂಗ್ರಹಿಸಿದೆ. ಅದರಲ್ಲಿ ಪೀಪಲ್ಸ್ ರಿಪಬ್ಲಿಕ್ ಆಫ್ ಚೀನಾದ ವುಹಾನ್ನಲ್ಲಿ “ವೈರಲ್ ನ್ಯುಮೋನಿಯಾ” ಕೇಸ್ಗಳು ಕಂಡುಬಂದಿವೆ ಎಂದಿತ್ತು.
ಪರಿಣಾಮ ಏನು?: ಚೀನಾದಿಂದ ಹೊರಬಿದ್ದಿರುವ ಕರೊನಾ ವೈರಸ್ ಸಾಂಕ್ರಾಮಿಕ ಜಗತ್ತನ್ನು ವ್ಯಾಪಿಸಿದ್ದು, ಚೀನಾ ಬಗ್ಗೆ ಅನೇಕ ಸಂದೇಹಗಳನ್ನು ಸೃಷ್ಟಿಸಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಚೀನಾ ಮತ್ತು ಡಬ್ಲ್ಯುಎಚ್ಒ ವಿರುದ್ಧ ತೀವ್ರ ಟೀಕಾ ಪ್ರಹಾರ ಮಾಡಿದ್ದರು. ಅಲ್ಲದೆ, ಡಬ್ಲ್ಯುಎಚ್ಒದ ಚೀನಾ ಪರ ಮೃದು ನೀತಿಯನ್ನು ಪ್ರಶ್ನಿಸಿದ್ದರಲ್ಲದೆ, ಅನುದಾನವನ್ನು ತಡೆಹಿಡಿದಿದ್ದರು.
ಈಗ ಡಬ್ಲ್ಯುಎಚ್ಒ ತನ್ನ ವೆಬ್ಸೈಟ್ನಲ್ಲಿ ಮಾಹಿತಿ ಪರಿಷ್ಕರಿಸಿರುವುದರಿಂದ ಅಮೆರಿಕ ಅಧ್ಯಕ್ಷರ ಹೇಳಿಕೆ ಮತ್ತು ಇತರೆ ಪಿತೂರಿ ಸಿದ್ಧಾಂತಗಳ ವಾದಗಳಿಗೆ ಪುಷ್ಟಿ ಸಿಕ್ಕಂತಾಗಿದೆ. ಜಾಗತಿಕವಾಗಿ ಈಗಾಗಲೇ ಎಲ್ಲರ ವಿರೋಧ ಎದುರಿಸುತ್ತಿರುವ ಚೀನಾಕ್ಕೆ ಇದು ವ್ಯತಿರಿಕ್ತವಾಗಿ ಪರಿಣಮಿಸುವ ಸಾಧ್ಯತೆ ಇದೆ. (ಏಜೆನ್ಸೀಸ್)