ಜುಲೈ ತಿಂಗಳೆಂದರೆ, ಕನ್ನಡ ಚಿತ್ರರಂಗದ ಪಾಲಿಗೆ ಹುಟ್ಟುಹಬ್ಬದ ತಿಂಗಳು ಎಂದರೆ ತಪ್ಪಿಲ್ಲ. ಏಕೆಂದರೆ, ಈ ತಿಂಗಳು ಕನ್ನಡ ಚಿತ್ರರಂಗದ ಸಾಕಷ್ಟು ಜನಪ್ರಿಯ ನಟ-ನಟಿಯರು ತಮ್ಮ ಹುಟ್ಟುಹಬ್ಬ ಆಚರಿಸಿಕೊಳ್ಳುತ್ತಿದ್ದು, ಈ ಸಾಲಿನಲ್ಲಿ ಮೊದಲಿಗೆ ಗಣೇಶ್ ಇದ್ದಾರೆ. ಇಂದು 41ನೇ ವಯಸ್ಸಿಗೆ ಕಾಳಿಟ್ಟಿರುವ ಗಣೇಶ್, ಸರಳವಾಗಿ ಹುಟ್ಟುಹಬ್ಬ ಆಚರಿಸಿಕೊಳ್ಳುವುದಕ್ಕೆ ತೀರ್ಮಾನಿಸಿದ್ದಾರೆ. ಸಂಭ್ರಮಕ್ಕೆ ನೋ ಎಂದಿರುವ ಅವರು, ಅಭಿಮಾನಿಗಳಿಗೆ ಇದ್ದಲ್ಲೇ ಹರಸಿ-ಹಾರೈಸಿ ಎಂದು ಸಂದೇಶ ರವಾನಿಸಿದ್ದಾರೆ.
ಈ ಕುರಿತು ‘ವಿಜಯವಾಣಿ’ಯೊಂದಿಗೆ ಮಾತನಾಡಿರುವ ಅವರು, ‘ನಮ್ಮ ತಂದೆ ನಿಧನರಾದ ಹಿನ್ನೆಲೆಯಲ್ಲಿ ಕಳೆದ ವರ್ಷವೂ ಹುಟ್ಟುಹಬ್ಬ ಆಚರಿಸಿಕೊಂಡಿರಲಿಲ್ಲ. ಈ ಬಾರಿಯೂ ಇಲ್ಲ. ಏಕೆಂದರೆ, ಸಂಭ್ರಮಕ್ಕೆ ಇದು ಸಮಯವಲ್ಲ. ಹಾಗಾಗಿ ಬೇರೆ ಬೇರೆ ಜಿಲ್ಲೆಗಳಿಂದ ಬರುವ ಅಭಿಮಾನಿಗಳಿಗೆ ಬರಬೇಡಿ ಎಂದಿದ್ದೇನೆ. ಇದ್ದಲ್ಲೇ ಹಾರೈಸುವುದಕ್ಕೆ ಕೇಳಿದ್ದೇನೆ. ಅವರು ಸಹ ಸಮಯ-ಸಂದರ್ಭ ಅರ್ಥ ಮಾಡಿಕೊಂಡಿದ್ದಾರೆ’ ಎನ್ನುತ್ತಾರೆ ಗಣೇಶ್.
ಇದನ್ನೂ ಓದಿ: ಕಾರ್ತಿಕಾ ಲೈಟ್ ಬಿಲ್ ಕೇಳಿ ನೀವು ಶಾಕ್ ಆಗ್ತೀರಾ!
ಅಭಿಮಾನಿಗಳನ್ನು ಮಿಸ್ ಮಾಡಿಕೊಳ್ಳುತ್ತಿರುವೆ: ‘ಹುಟ್ಟುಹಬ್ಬದ ನೆಪದಲ್ಲಿ ವರ್ಷಕ್ಕೆ ಒಂದು ಬಾರಿ ಎಲ್ಲರನ್ನೂ ನೋಡುವ ಅವಕಾಶ ಸಿಗುತಿತ್ತು. ಹುಟ್ಟುಹಬ್ಬಕ್ಕೆಂದೇ ಕೆಲವು ಅಭಿಮಾನಿಗಳು ದೂರದೂರುಗಳಿಂದ ಬರುತ್ತಿದ್ದರು. ಅವರನ್ನೆಲ್ಲಾ ಮಿಸ್ ಮಾಡಿಕೊಳ್ಳುತ್ತಿದ್ದೇನೆ. ಆದರೆ, ಈ ನಿರ್ಧಾರ ಅನಿವಾರ್ಯ. ಈಗ ಸನ್ನಿವೇಶ ಹಾಗಿಲ್ಲ. ಇಂಥ ಸಂದರ್ಭದಲ್ಲಿ ಎಷ್ಟು ಹುಷಾರಾಗಿದ್ದರೂ ಕಡಿಮೆ. ಆರೋಗ್ಯದಿಂದಿರುವುದು ಬಹಳ ಮುಖ್ಯ. ಅವರು ಚೆನ್ನಾಗಿರಬೇಕು. ಅವರು ಚೆನ್ನಾಗಿದ್ದರೆ, ನಾವೂ ಚೆನ್ನಾಗಿರೋಕೆ ಸಾಧ್ಯ’ ಎಂಬುದು ಗಣೇಶ್ ಅಭಿಪ್ರಾಯ.
ಈ ವರ್ಷ ನೋ ಸಿನಿಮಾ: ವರ್ಷಕ್ಕೆ ಮೂರು ಚಿತ್ರ ಎಂಬ ಪಾಲಿಸಿಯನ್ನು ಪಾಲಿಸಿಕೊಂಡು ಬಂದಿದ್ದ ಗಣೇಶ್‌ಗೆ, ಈ ವರ್ಷ ಅದೀಗ ಮಿಸ್ ಆಗಿದೆ. ಬಹುಶಃ ಲಾಕ್‌ಡೌನ್ ಇಲ್ಲದಿದ್ದರೆ ‘ಗಾಳಿಪಟ 2’ ಮತ್ತು ‘ಸಖತ್’ ಚಿತ್ರಗಳು ಬಿಡುಗಡೆಯಾಗಿರುತ್ತಿದ್ದವು. ಆದರೆ, ಲಾಕ್‌ಡೌನ್‌ನಿಂದ ಎರಡೂ ತಡವಾಗಿವೆ ಮತ್ತು ಈ ವರ್ಷ ಬಿಡುಗಡೆಯಾಗುವುದೇ ಸಂಶಯವಾಗಿದೆ. ಇನ್ನು ‘ತ್ರಿಬಲ್ ರೈಡಿಂಗ್’ ಎಂಬ ಚಿತ್ರ ಶುರುವಾಗಬೇಕಿತ್ತು. ಅದೂ ಸಹ ಮುಂದಕ್ಕೆ ಹೋಗಿದೆ. ಇನ್ನು ಹುಟ್ಟುಹಬ್ಬದ ಪ್ರಯುಕ್ತ, ‘ಸ್ಟೋರಿ ಆಫ್ ರಾಯಗಢ’ ಎಂಬ ಹೊಸ ಚಿತ್ರದ ಘೋಷಣೆಯಾಗಿದ್ದು, ಮೊದಲ ಪೋಸ್ಟರ್ ಬಿಡುಗಡೆಯಾಗಿದೆ. ಈಗ ಒಪ್ಪಿರುವ ಎಲ್ಲಾ ಚಿತ್ರಗಳು ಮುಗಿದ ಮೇಲೆ, ಈ ಚಿತ್ರ ಪ್ರಾರಂಭವಾಗಲಿದೆ.
ಇದನ್ನೂ ಓದಿ: ಮದುವೆಯಾದ ಆರಂಭದ ಆರು ತಿಂಗಳಲ್ಲಿ, ಅನುಷ್ಕಾ ಜತೆ ಕೊಹ್ಲಿ ಕಳೆದ ದಿನಗಳೆಷ್ಟು?
ತಿನ್ನು-ಮಲಗು ಬಿಟ್ಟು ಏನೂ ಮಾಡಿಲ್ಲ: ಈ ಕುರಿತು ಮಾತನಾಡುವ ಅವರು, ‘ಎರಡೂ ಚಿತ್ರಗಳ ಚಿತ್ರೀಕರಣ ನಡೆಯುತಿತ್ತು. ಅಷ್ಟರಲ್ಲಿ ಲಾಕ್‌ಡೌನ್ ಆಯಿತು. ಹಾಗಾಗಿ ಎಲ್ಲವೂ ನಿಂತಿದೆ. ಮುಂದಿನ ಮೂರು ತಿಂಗಳು ಕೆಲಸ ಶುರುವಾಗುವುದು ಸಂಶಯವೇ. ಆ ನಂತರವಷ್ಟೇ ಕೆಲಸ. ಮೊದಲು ಆರೋಗ್ಯ ಮುಖ್ಯ.ಇವೆಲ್ಲಾ ಒಂದು ಹಂತಕ್ಕೆ ಬಂದ ಮೇಲೆ ಕೆಲಸ ಶುರುವಾಗಲಿದೆ. ಈ ಮೂರು ತಿಂಗಳಲ್ಲಿ ಮನೆಯಲ್ಲಿ ಮಕ್ಕಳೊಂದಿಗೆ ಒಳ್ಳೆಯ ಸಮಯ ಕಳೆದಿದ್ದೇನೆ. ಇದೊಂಥರಾ ಬೇಸಿಗೆ ರಜೆ ತರಹ ಇತ್ತು. ತಿನ್ನೋದು, ಮಲಗೋದು ಬಿಟ್ಟು ಒಂದು ಎಕ್ಸ್‌ಟ್ರಾ ಕೆಲಸ ಮಾಡಿಲ್ಲ’ ಎಂದು ನಗುತ್ತಾರೆ ಅವರು.
ಈ ಕರೊನಾ ಸಮಸ್ಯೆ ಮತ್ತು ಅದರಿಂದ ಸುಧಾರಿಸಿಕೊಳ್ಳುವುದಕ್ಕೆ ಇನ್ನೂ ಸಾಕಷ್ಟು ಸಮಯ ಬೇಕು ಎನ್ನುವ ಅವರು, ‘ಇದೆಲ್ಲದರಿಂದ ಸುಧಾರಿಸಿಕೊಳ್ಳುವುದುಕ್ಕೆ ಇನ್ನೂ ಕೆಲವು ತಿಂಗಳುಗಳೇ ಬೇಕು. ಹಲವರ ಪಾಲಿಗೆ ಈ ವರ್ಷ ಡಿಲೀಟ್ ಆದಂತೆಯೇ ಲೆಕ್ಕ. ಬಹುಶಃ ಮುಂದಿನ ವರ್ಷದ ಹೊತ್ತಿಗೆ ಎಲ್ಲವೂ ಸರಿ ಹೋಗಬಹುದು. ಸಂಕ್ರಾಂತಿಯಿಂದ ಎಲ್ಲವೂ ಹೊಸದಾಗಿ ಶುರುವಾಗಬಹುದು’ ಎನ್ನುತ್ತಾರೆ ಗಣೇಶ್.
ಹೀರೋನೂ ನಾನೇ, ವಿಲನ್ನೂ ನಾನೇ … ‘ಕೆಜಿಎಫ್ 2’ ಪಾತ್ರದ ಬಗ್ಗೆ ರವೀನಾ ಟಂಡನ್