ಜಿ20 ಮೀಟ್: ಇಟಲಿಗೆ ತೆರಳಿರುವ ವಾಣಿಜ್ಯ ಸಚಿವ ಪಿಯೂಷ್​​ ಗೋಯಲ್​​; ವಿವಿಧ ರಾಷ್ಟ್ರಗಳೊಂದಿಗೆ ಮಾತುಕತೆ

ಪ್ಯಾರಿಸ್​/ನವದೆಹಲಿ: ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕೆ ಸಚಿವ ಪಿಯೂಷ್​​ ಗೋಯಲ್​ ಅವರು ಜಿ20 ಟ್ರೇಡ್​ ಮಿನಿಸ್ಟರ್ಸ್​ ಮೀಟ್​ಗಾಗಿ ಇಟಲಿಯ ಸೊರ್ರೆಂಟೋಗೆ ತೆರಳಿದ್ದಾರೆ. ಅಲ್ಲಿ ಇಟಲಿ, ಇಂಗ್ಲೆಂಡ್​, ದಕ್ಷಿಣ ಆಫ್ರಿಕಾ, ಫ್ರಾನ್ಸ್ ಮತ್ತಿತರ ರಾಷ್ಟ್ರಗಳ ಸಚಿವರು ಮತ್ತು ಉನ್ನತ ಅಧಿಕಾರಿಗಳನ್ನು ಭೇಟಿ ಮಾಡಿ, ಅಂತರಾಷ್ಟ್ರೀಯ ವ್ಯಾಪಾರ-ವಹಿವಾಟಿಗೆ ಸಂಬಂಧಿಸಿದ ಮಾತುಕತೆ ನಡೆಸುತ್ತಿದ್ದಾರೆ.

ತಮ್ಮ ಇಟಲಿ ಭೇಟಿಯ ಬಗ್ಗೆ ಟ್ವಿಟರ್​ನಲ್ಲಿ ನಿಯಮಿತವಾಗಿ ಮಾಹಿತಿ ನೀಡುತ್ತಿರುವ ಸಚಿವ ಗೋಯಲ್​, ಜಿ20 ಟ್ರೇಡ್​ ಮೀಟ್​ಗೆ ಮುಂಚಿತವಾಗಿ ಇಟಲಿಯ ವಿದೇಶಾಂಗ ಸಚಿವ ಲ್ಯೂಗಿ ಡಿ ಮಾಯೊ ಅವರನ್ನು ಭೇಟಿ ಮಾಡಿದ್ದಾಗಿ ತಿಳಿಸಿದ್ದಾರೆ. "ಯೂರೋಪಿಯನ್​ ಯೂನಿಯನ್​ನಲ್ಲಿ ಇಟಲಿಯು ಭಾರತದ 5ನೇ ಅತಿದೊಡ್ಡ ಟ್ರೇಡಿಂಗ್​ ಪಾರ್ಟ್​ನರ್​ ಆಗಿದೆ. ಅದು ಪ್ರಯಾಣಕ್ಕಾಗಿ ಕೋವಿಶೀಲ್ಡ್​ ಕರೊನಾ ಲಸಿಕೆಗೆ ಮಾನ್ಯತೆ ನೀಡಿರುವುದು ನಮ್ಮ ದ್ವಿಪಕ್ಷೀಯ ಸಂಬಂಧಗಳು ಬಲಗೊಳ್ಳುತ್ತಿರುವುದನ್ನು ಸೂಚಿಸುತ್ತದೆ" ಎಂದು ಬರೆದ್ದಾರೆ.

ಇದೇ ಸಂದರ್ಭದಲ್ಲಿ ಇಂಗ್ಲೆಂಡಿನ ಅಂತರರಾಷ್ಟ್ರೀಯ ವ್ಯಾಪಾರದ ಕಾರ್ಯದರ್ಶಿಯಾದ ಆನ್ನೆ-ಮಾರೀ ಟ್ರೆವೆಲ್ಯಾನ್​ರೊಂದಿಗೆ ದ್ವಿಪಕ್ಷೀಯ ಮಾತುಕತೆ ನಡೆಸಿದ್ದಾಗಿ ಗೋಯಲ್ ತಿಳಿಸಿದ್ದಾರೆ. "ಭಾರತ ಮತ್ತು ಯುಕೆ ನಡುವಿನ ವೇಗದ ಎಫ್​ಟಿಎ ಮಾತುಕತೆಗಳು ದ್ವಿಪಕ್ಷೀಯ ಆರ್ಥಿಕ ಪಾಲುದಾರಿಕೆಯನ್ನು ಮುಂದಿನ ಹಂತಕ್ಕೆ ಒಯ್ಯುತ್ತದೆ; ಉಭಯ ರಾಷ್ಟ್ರಗಳಲ್ಲೂ ಆರ್ಥಿಕ ಸಮೃದ್ಧಿ ಉಂಟುಮಾಡುತ್ತದೆ" ಎಂದಿದ್ದಾರೆ.

ದಕ್ಷಿಣ ಆಫ್ರಿಕಾದ ವ್ಯಾಪಾರ ಮತ್ತು ಕೈಗಾರಿಕಾ ಸಚಿವ ಎಬ್ರಾಹಿಂ ಪಟೇಲ್​ರನ್ನೂ ಗೋಯಲ್ ಭೇಟಿಯಾಗಿದ್ದಾರೆ. "ಇತ್ತೀಚಿನ ವರ್ಷಗಳಲ್ಲಿ ನಮ್ಮ ದೇಶಗಳ ನಡುವಿನ ದ್ವಿಪಕ್ಷೀಯ ವ್ಯಾಪಾರ-ವಹಿವಾಟಿನ ವಿಸ್ತರಣೆಯು ಭವಿಷ್ಯದ ಅಭಿವೃದ್ಧಿಗೆ ಇರುವ ಅಗಾಧ ಅವಕಾಶಕ್ಕೆ ಸಾಕ್ಷಿಯಾಗಿದೆ; ವಿಶೇಷವಾಗಿ, ಕೃಷಿ ಸರಕುಗಳ ಕ್ಷೇತ್ರದಲ್ಲಿ ಅವಕಾಶಗಳಿವೆ" ಎಂದು ಪಿಯೂಷ್​​​ ಗೋಯಲ್​ ಹೇಳಿದ್ದಾರೆ.