ಮುಂಬೈ : ಸರ್ಕಾರ ಜಾರಿಗೊಳಿಸಿರುವ ಪ್ರಕ್ರಿಯೆಯನ್ನು ಪಾಲಿಸದೆ ಹೌಸಿಂಗ್ ಸೊಸೈಟಿಯೊಂದರಲ್ಲಿ ಅನಧಿಕೃತವಾಗಿ ಕರೊನಾ ಲಸಿಕಾ ಕಾರ್ಯಕ್ರಮ ನಡೆಸಿದ ನಾಲ್ವರನ್ನು ಮುಂಬೈ ಪೊಲೀಸರು ಬಂಧಿಸಿದ್ದಾರೆ. ಈ ಕಾರ್ಯಕ್ರಮದಲ್ಲಿ ಒಟ್ಟು 390 ನಿವಾಸಿಗಳಿಗೆ ಲಸಿಕೆ ನೀಡಲಾಗಿದ್ದು, ಈವರೆಗೂ ಲಸಿಕೆಗಳು ಅಸಲಿಯೋ ನಕಲಿಯೋ ಎಂಬುದು ತಿಳಿದುಬಂದಿಲ್ಲ.
ಮೇ 30 ರಂದು ಕಾಂದಿವಲಿ(ಪಶ್ಚಿಮ)ಯ ಎಸ್.ವಿ.ರಸ್ತೆಯಲ್ಲಿರುವ ಹೀರಾನಂದಾನಿ ಹೆರಿಟೇಜ್ ಹೌಸಿಂಗ್ ಸೊಸೈಟಿಯಲ್ಲಿ ಈ ಅಕ್ರಮವಾದ ಲಸಿಕಾ ಕಾರ್ಯಕ್ರಮ ನಡೆದಿದೆ. ಲಸಿಕೆಗಳನ್ನು ಯಾವುದೇ ಅಧಿಕೃತ ಮೂಲದಿಂದ ಸಂಗ್ರಹಿಸಲಾಗಿರಲಿಲ್ಲ. ಅವುಗಳ ಮೇಲೆ ಯಾವುದೇ ಸೀಲ್ ಕೂಡ ಇರಲಿಲ್ಲ ಎನ್ನಲಾಗಿದ್ದು, ಲಸಿಕೆಗಳು ನಿಜವಾದದ್ದೇ ಎಂದು ಕಂಡುಹಿಡಿಯಲು ತನಿಖೆ ನಡೆಯುತ್ತಿದೆ ಎಂದು ಜೋನ್ 11 ರ ಡಿಸಿಪಿ ವಿಶಾಲ್ ಠಾಕುರ್ ಹೇಳಿದ್ದಾರೆ.
ಇದನ್ನೂ ಓದಿ: ಪಬ್ಜಿ ಲೈವ್ ಸ್ಟ್ರೀಮಿಂಗ್ನಲ್ಲಿ ಅಶ್ಲೀಲತೆ: ಚೆನ್ನೈ ಮೂಲದ ಯೂಟ್ಯೂಬರ್ ದಂಪತಿಯ ಬಂಧನ!
ವೈದ್ಯರ ಸಂಘದ ಸದಸ್ಯ ಮಹೇಂದ್ರ ಪ್ರತಾಪ್ ಸಿಂಗ್(39), ಕಾರ್ಯಕ್ರಮ ಆಯೋಜಕ ಸಂಜಯ್ ಗುಪ್ತ(29), ಖಾಸಗಿ ಆಸ್ಪತ್ರೆ ಉದ್ಯೋಗಿಗಳಾದ ಚಂದನ್ ಸಿಂಗ್ ಅಲಿಯಾಸ್ ಲಲಿತ್(32) ಮತ್ತು ನಿತಿನ್ ಮೋಡೆ (32) ಬಂಧಿತ ಆರೋಪಿಗಳು. ಖಾಸಗಿ ಆಸ್ಪತ್ರೆಯೊಂದರ ಮಾರ್ಕೆಟಿಂಗ್ ಅಧಿಕಾರಿಯಾಗಿದ್ದ ರಾಜೇಶ್ ಪಾಂಡೆ ಎಂಬುವ ಆರೋಪಿ ತಲೆ ಮರೆಸಿಕೊಂಡಿದ್ದರೆ, ಲಸಿಕೆ ಒದಗಿಸಿದನೆನ್ನಲಾದ ಮತ್ತೊಬ್ಬ ಆರೋಪಿ ಕರೀಂ ಅಲಿ ಖಾನ್ ಎಂಬುವನು ಮಧ್ಯಪ್ರದೇಶದಲ್ಲಿ ತಲೆಮರೆಸಿಕೊಂಡಿರುವ ಸುಳಿವು ಸಿಕ್ಕಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಸೊಸೈಟಿ ಸದಸ್ಯರು ಲಸಿಕೆ ಪಡೆದ ಖುಷಿಯಲ್ಲಿದ್ದರೆ, ಲಸಿಕೆ ಸರ್ಟಿಫಿಕೇಟ್ಗಳು ಸಿಗದಿದ್ದಾಗ ಮತ್ತು ಕೆಲವರಿಗೆ ತಪ್ಪು ವಿವರಗಳಿರುವ ಸರ್ಟಿಫಿಕೇಟ್ ಸಿಕ್ಕಾಗ ಅನುಮಾನಗೊಂಡರು. ಜೂನ್ 12 ರಂದು ನೀಡಿದ ದೂರಿನ ಮೇಲೆ ತನಿಖೆ ನಡೆಸಿದಾಗ ಹಗರಣ ನಡೆದಿರುವುದು ಬೆಳಕಿಗೆ ಬಂತು ಎನ್ನಲಾಗಿದೆ. ಬಂಧಿತ ಆರೋಪಿಗಳನ್ನು ಜೂನ್ 25 ರವರೆಗೆ ಪೋಲೀಸ್ ಕಸ್ಟಡಿಗೆ ಒಪ್ಪಿಸಲಾಗಿದೆ. ಆರೋಪಿ ಮಹೇಂದ್ರ ಸಿಂಗ್ ಬ್ಯಾಂಕ್ ಖಾತೆಯಿಂದ 9 ಲಕ್ಷ ರೂಪಾಯಿ ಜಪ್ತಿಪಡಿಸಿಕೊಳ್ಳಲಾಗಿದೆ ಎಂದು ತನಿಖಾಧಿಕಾರಿ ದೀಪ್ಶಿಖಾ ವಾರೆ ಹೇಳಿದ್ದಾರೆ.
ಇದನ್ನೂ ಓದಿ: ರಸ್ತೆ ದಾಟುತ್ತಿದ್ದ ಹುಲಿಗೆ ವಾಹನ ಡಿಕ್ಕಿ; ರಾಷ್ಟ್ರೀಯ ಹೆದ್ದಾರಿಯಲ್ಲಿ ದುರಂತ
ವಿಚಾರಣೆ ವೇಳೆ ಆರೋಪಿಗಳು, ನಗರದಲ್ಲೇ ಇನ್ನೂ 9 ಕಡೆಗಳಲ್ಲಿ ಇದೇ ರೀತಿಯಾಗಿ ಲಸಿಕಾ ಕಾರ್ಯಕ್ರಮ ನಡೆಸಿರುವುದಾಗಿ ಒಪ್ಪಿಕೊಂಡಿದ್ದಾರೆ. ರಾಜೇಶ್ ತೌರಾನಿ ಎಂಬುವರು ತಮ್ಮ 300 ಉದ್ಯೋಗಿಗಳಿಗೆ ನಡೆಸಿದ ಲಸಿಕಾ ಕಾರ್ಯಕ್ರಮದಲ್ಲೂ ಇದೇ ರೀತಿ ವಂಚನೆ ನಡೆದಿರುವ ಬಗ್ಗೆ ವೆರ್ಸೋವ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ ಎನ್ನಲಾಗಿದೆ. (ಏಜೆನ್ಸೀಸ್)
ನಾಯಕತ್ವ ವಿಚಾರದಲ್ಲಿ ಗೊಂದಲವಿಲ್ಲ… ಅಪಸ್ವರ ಎತ್ತಿದವರ ವಿರುದ್ಧ ಕ್ರಮ : ಸಿಎಂ ಯಡಿಯೂರಪ್ಪ
ಕೋಮುಸೌಹಾರ್ದ ಕೆಡಿಸುವ ಟ್ವೀಟ್ಸ್ : ಟ್ವಿಟರ್ ಇಂಡಿಯ ಎಂಡಿಗೆ ಪೊಲೀಸ್ ನೋಟೀಸ್