ನವದೆಹಲಿ : ಅಮೆರಿಕದ ಸರ್ಕಾರಿ ಅಧಿಕಾರಿಗಳ ಸೋಗಿನಲ್ಲಿ ಅಮೆರಿಕನ್ ನಾಗರಿಕರಿಗೆ ಡೂಪ್ ಮಾಡಲು ಬಳಸಲಾಗುತ್ತಿದ್ದ ನಕಲಿ ಕಾಲ್ ಸೆಂಟರ್ ಒಂದನ್ನು ದೆಹಲಿ ಪೊಲೀಸರು ಪತ್ತೆ ಹಚ್ಚಿದ್ದಾರೆ. ಈ ಸೆಂಟರ್ನ ಇಬ್ಬರು ಮಾಲೀಕರು ಸೇರಿದಂತೆ ಅಲ್ಲಿ ಕೆಲಸ ಮಾಡುತ್ತಿದ್ದ 65 ಜನರನ್ನು ಬಂಧಿಸಲಾಗಿದೆ. ಪಶ್ಚಿಮ ದೆಹಲಿಯ ಹರಿನಗರದಲ್ಲಿ ಈ ನಕಲಿ ಕಾಲ್ ಸೆಂಟರ್ ಪತ್ತೆಯಾಗಿದೆ.
ಆರೋಪಿಗಳು ಅಮೆರಿಕದ ನಾಗರಿಕರ ವಿವರಗಳನ್ನು ಅಕ್ರಮ ವಿಧಾನಗಳಿಂದ ಸಂಗ್ರಹಿಸುತ್ತಿದ್ದರು. ಅಮೆರಿಕದ ಸರ್ಕಾರಿ ಸಂಸ್ಥೆಗಳಾದ ಎಫ್ಬಿಐ, ಟ್ರೆಷರಿ ಡಿಪಾರ್ಟ್ಮೆಂಟ್, ಡ್ರಗ್ ಎನ್ಫೋರ್ಸ್ಮೆಂಟ್ ಏಜೆನ್ಸಿಗಳ ಅಧಿಕಾರಿಗಳೆಂದು ಹೇಳಿಕೊಂಡು ಕರೆ ಮಾಡಿ ಅವರ ಸೋಷಿಯಲ್ ಸೆಕ್ಯುರಿಟಿ ನಂಬರ್ಅನ್ನು ಸಸ್ಪೆಂಡ್ ಮಾಡುವುದಾಗಿ ಹೆದರಿಸುತ್ತಿದ್ದರು. ನಂತರ ನಿರ್ದಿಷ್ಟ ಮೊತ್ತದ ಹಣವನ್ನು ಈ-ಗಿಫ್ಟ್ ಕಾರ್ಡ್ಗಳ ರೂಪದಲ್ಲಿ ವರ್ಗಾಯಿಸುವಂತೆ ಹೇಳಿ ವಂಚಿಸುತ್ತಿದ್ದರು ಎನ್ನಲಾಗಿದೆ.
ಇದನ್ನೂ ಓದಿ: ದೆಹಲಿ ಪೊಲೀಸರ ಭರ್ಜರಿ ಬೇಟೆ: ಲೇಡಿ ಡಾನ್ ಸೇರಿದಂತೆ ಇಬ್ಬರು ಗ್ಯಾಂಗ್ಸ್ಟರ್ ಬಂಧನ
ಈ ಸೆಂಟರನ್ನು ನಡೆಸುತ್ತಿದ್ದ ಮುಖ್ಯ ಆರೋಪಿಗಳನ್ನು ಲಖನ್ ಜಗವಾನಿ ಮತ್ತು ವಿಜೇಂದರ್ ಸಿಂಗ್ ರಾವತ್ ಎಂದು ಗುರುತಿಸಲಾಗಿದೆ. ಕಾನೂನುಬಾಹಿರವಾದ ವಿಒಐಪಿ ಕಾಲಿಂಗ್ ಮತ್ತು ಕಾಲರ್ ಐಡಿ ಸ್ಪೂಫಿಂಗ್ ವಿಧಾನವನ್ನು ಬಳಸಿ ಈ ದಂಧೆ ನಡೆಸುತ್ತಿದ್ದರು. ಇವರು ವಂಚನೆ ಮಾಡಿ ಲಪಟಾಯಿಸಿರುವ ಹಣದ ಮೊತ್ತವು ಕೋಟಿಗಳಲ್ಲಿದೆ ಎಂದು ಡಿಸಿಪಿ ಊರ್ವಿಜಾ ಗೋಯಲ್ ಹೇಳಿದ್ದಾರೆ. (ಏಜೆನ್ಸೀಸ್)
‘ನಿನ್ನ ಮೂಳೆ ಮುರಿಯುತ್ತೇನೆ’ ಎಂದು ಎಚ್ಚರಿಕೆ ನೀಡಿದ ಟಿಎಂಸಿ ಶಾಸಕ!
VIDEO | ಒಲಿಂಪಿಕ್ಸ್ನಲ್ಲಿ ಕಮಲ್ಪ್ರೀತ್ ಕೌರ್ರ ಡಿಸ್ಕಸ್ ಥ್ರೋ!