ನವದೆಹಲಿ: ಮಹಿಳೆಯೊಬ್ಬಳ ಮದುವೆಗೆ ಸಂಬಂಧಿಸಿದ ಮತ್ತು ಆಕೆಯ ಮೇಲೆ ದೌರ್ಜನ್ಯ ನಡೆದಿದೆ ಎನ್ನಲಾದ ಸರಣಿ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಮಹಿಳೆಯು ಕೇರಳದ ಲವ್ ಜಿಹಾದ್ ಸಂತ್ರಸ್ತೆ ಎಂದು ಹೇಳಲಾಗಿದೆ. ಆದರೆ, ಫೋಟೋ ಕುರಿತಾದ ಅಸಲಿಯತ್ತು ಫ್ಯಾಕ್ಟ್ಚೆಕ್ನಲ್ಲಿ ಬಯಲಾಗಿದೆ.
ಸರಣಿ ಫೋಟೋಗಳನ್ನು ಹರಿಬಿಟ್ಟು ಹಿಂದಿಯಲ್ಲಿ ಅಡಿಬರಹ ಬರೆಯಲಾಗಿದ್ದು, ಅದರ ಸಾರ ಹೀಗಿದೆ. ಕೇರಳದ ಲವ್ ಜಿಹಾದ್ನ ಮತ್ತೋರ್ವ ಸಂತ್ರಸ್ತೆ. ನನ್ನ ಪ್ರಿಯಕರ ಇತರೆ ಮುಸ್ಲಿಮರ ರೀತಿಯಲ್ಲ ಎಂದು ಆರಂಭದಲ್ಲಿ ಎಲ್ಲ ಯುವತಿಯರು ಹೇಳುತ್ತಾರೆ. ಆದರೆ, ಕೊನೆಯಲ್ಲಿ ಅವರ ಕಣ್ಣುಗಳು ತೆರೆಯುತ್ತವೆ. ಅಷ್ಟರಲ್ಲಾಗಲೇ ಅವರು ಕೊಲೆಯಾಗಬಹುದು, ಸೂಟ್ಕೇಸ್ನಲ್ಲಿ ಮುಚ್ಚಿಹೋಗಬಹುದು ಅಥವಾ ಮಾರಾಟವಾಗಬಹುದು ಮತ್ತು ಮಗು ಹೆರುವ ಯಂತ್ರವಾಗಿಬಿಡಬಹುದು ಎಂದು ಬರೆದುಕೊಂಡಿದ್ದಾರೆ. ವೈರಲ್ ಆಗಿರುವ ಫೋಟೋಗಳನ್ನು ನೀವಿಲ್ಲ ಕಾಣಬಹುದಾಗಿದೆ.
ಈ ಕುರಿತು ಇಂಡಿಯಾ ಟುಡೆ ಆ್ಯಂಟಿ ಫೇಕ್ ನ್ಯೂಸ್ ವಾರ್ ರೂಮ್ ಫ್ಯಾಕ್ಟ್ಚೆಕ್ ನಡೆಸಿದ್ದು, ಇದೊಂದು ಅಪಪ್ರಚಾರದ ತಂತ್ರವಾಗಿದೆ ಎಂದು ತಿಳಿದುಬಂದಿದೆ. ಅಂದಹಾಗೆ ವೈರಲ್ ಫೋಟೋದಲ್ಲಿರುವ ಯುವತಿ ಬಾಂಗ್ಲಾದೇಶದ ಢಾಕಾ ಮೂಲದವಳು. ವರದಕ್ಷಿಣೆ ವಿಚಾರವಾಗಿ ಪತ್ನಿ ಮತ್ತು ಅತ್ತೆಯ ಮನೆಯವರು ಪ್ರತಿದಿನ ಆಕೆಗೆ ಕಿರುಕುಳ ನೀಡುತ್ತಾರೆ. ಹಿಂದು ಧರ್ಮದಿಂದ ಇಸ್ಲಾಂಗೆ ಮತಾಂತರಗೊಂಡಿದ್ದಾಳೆಂದು ಹೇಳಲು ಯಾವುದೇ ನಂಬಿಕಾರ್ಹ ಮೂಲಗಳಿಲ್ಲ.
ಗೂಗಲ್ ರಿವರ್ಸ್ ಇಮೇಜ್ ಸರ್ಚ್ ಇಂಜಿನ್ನಲ್ಲಿ ಫೋಟೋವನ್ನು ಹುಡುಕಿದಾಗ ವೈರಲ್ ಆಗಿರುವ ಇದೇ ಫೋಟೋ ಢಾಕಾ ಟ್ರಿಬ್ಯುನ್ನಲ್ಲಿ ಪ್ರಕಟವಾಗಿರುವುದು ಕಂಡುಬಂದಿದೆ. ಜೂನ್ 26ರಂದು ಪ್ರಕಟವಾಗಿರುವ ವರದಿಯ ಪ್ರಕಾರ ಯುವತಿಯ ಹೆಸರು ಸುಮೈಯಾ ಹಸನ್. ಈಕೆಯೆ ಢಾಕಾದ ಗೃಹಿಣಿ. ಆಕೆಯ ಮೇಲೆ ಪತಿ ಜಹಿದ್ ಹಸನ್ ಮತ್ತು ಆತನ ಕುಟುಂಬದವರು ವರದಕ್ಷಿಣೆ ವಿಚಾರವಾಗಿ ಕಿರುಕುಳ ನೀಡುತ್ತಾರೆಂದು ದೂರಲಾಗಿದ್ದು, ಆರೋಪಿ ಪತಿ ಜಹಿದ್ನನ್ನು ಪೊಲೀಸರು ಕಸ್ಟಡಿಗೆ ತೆಗೆದುಕೊಂಡಿದ್ದಾರೆಂದು ವರದಿಯಾಗಿದೆ.
ಈ ಬಗ್ಗೆ ಮಾಹಿತಿ ನೀಡಿರುವ ಢಾಕಾ ಪೊಲೀಸರು ಸುಮೈಯಾ ಐದು ವರ್ಷಗಳ ಹಿಂದೆ ಫೇಸ್ಬುಕ್ನಲ್ಲಿ ಪರಿಚಯವಾದ ಜಹೀದ್ನೊಂದಿಗೆ ವರ್ಷದ ಹಿಂದೆ ಮದುವೆಯಾದಳು. ಕೆಲ ದಿನಗಳವರೆಗೆ ಪತಿ ಚೆನ್ನಾಗಿಯೇ ಇದ್ದ. ಆದರೆ, ಬರುತ್ತಾ ಕಿರುಕುಳ ನೀಡಲು ಆರಂಭಿಸಿದ. ಇದರ ನಡುವೆ ಒಮ್ಮೆ ದೂರು ಸಹ ನೀಡಿದ್ದಳು. ಇದರ ನಡುವೆ ಜೂನ್ 27ರಂದು ಢಾಕಾ ಟ್ರಿಬ್ಯುನ್ ವರದಿ ಪ್ರಕಟಿಸಿ ಜಮೈಯಾ ಮೇಲೆ ನಡೆದಿರುವ ದೌರ್ಜನ್ಯದ ಫೋಟೋಗಳನ್ನು ಪ್ರಕಟಿಸಿತ್ತು. ಸುಮೈಯಾ ಸಹ ತನ್ನ ಫೇಸ್ಬುಕ್ನಲ್ಲಿ ಫೋಟೋಗಳನ್ನು ಶೇರ್ ಮಾಡಿಕೊಂಡ ಪತಿಯ ಕ್ರೂರತ್ವವನ್ನು ಹೊರ ಜಗತ್ತಿಗೆ ತಿಳಿಸಿದ್ದಳು.
ಇನ್ನು ವೈರಲ್ ಫೋಟೋದಲ್ಲಿರುವ ಯುವತಿ ಹಿಂದುಗೆ ಸೇರಿದವಳು ಎಂಬುದಕ್ಕೆ ಎಲ್ಲಿಯೂ ಪುರಾವೆಗಳಿಲ್ಲ. ಅಲ್ಲದೆ, ನಂಬಲಾದ ಮೂಲಗಳೂ ಇಲ್ಲ. ಹೀಗಾಗಿ ಸ್ಪಷ್ಟವಾಗುವುದೆಂದರೆ ವೈರಲ್ ಆಗಿರುವ ಚಿತ್ರದಲ್ಲಿರುವ ಮಹಿಳೆಗೂ ಕೇರಳದ ಲವ್ ಜಿಹಾದ್ಗೂ ಸಂಬಂಧವಿಲ್ಲ. ಇದೊಂದು ಅಪಪ್ರಚಾರದ ತಂತ್ರವಾಗಿದೆ ಎಂದು ತಿಳಿದುಬಂದಿದೆ. (ಏಜೆನ್ಸೀಸ್)
4 ವರ್ಷ ಲಿವಿಂಗ್ ರಿಲೇಷನ್ಶಿಪ್ನಲ್ಲಿದ್ದು ಮದ್ವೆಯಾದ ಕೆಲವೇ ತಿಂಗಳಲ್ಲಿ ಬರ್ಬರ ಹತ್ಯೆಯಾದ ನವವಿವಾಹಿತ!