ನವದೆಹಲಿ: ಅಮೆರಿಕಾ ಅಧ್ಯಕ್ಷ ಡೊನಾಲ್ಟ್ ಟ್ರಂಪ್ ಅವರು ಭಾರತ ಭೇಟಿ ವೇಳೆ ಆಗ್ರಾದ ತಾಜ್ಮಹಲ್ಗೆ ತೆರಳುತ್ತಿರುವ ಹಿನ್ನೆಲೆಯಲ್ಲಿ ತಾಜ್ಮಹಲ್ ಕೊಳೆ ತೆಗೆಯಲು ನೀರು ಹರಿಸಲಾಗುತ್ತಿದೆ ಎನ್ನುವ ವಿಡಿಯೋ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಡೊನಾಲ್ಡ್ ಟ್ರಂಪ್ ಅವರು ಪತ್ನಿ ಹಾಗೂ ಮಗಳ ಸಮೇತ ತಾಜ್ಮಹಲ್ನಲ್ಲಿ ಒಂದು ತಾಸು ಕಾಲ ಕಳೆಯುವ ಹಿನ್ನೆಲೆಯಲ್ಲಿ ಪಾರಂಪರಿಕ ಕಟ್ಟಡವನ್ನು ಅಗ್ನಿಶಾಮಕ ಸಿಬ್ಬಂದಿ ನೀರು ಸಿಂಪಡಿಸಿ ಸ್ವಚ್ಛಗೊಳಿಸುತ್ತಿದ್ದಾರೆ ಎಂದು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳಲಾಗಿದೆ. ಆದರೆ ಈ ವಿಡಿಯೋ ಸುಳ್ಳು ಎಂಬುದು ಫ್ಯಾಕ್ಟ್ಚೆಕ್ನಿಂದ ಪತ್ತೆಯಾಗಿದೆ.
ಮೀನಾ ಮ್ಯೂಸಿಕ್ ಎಂಬ ಫೇಸ್ಬುಕ್ ಪುಟದಲ್ಲಿ 45 ಸೆಕೆಂಡುಗಳ ವಿಡಿಯೋ ದೃಶ್ಯ ಅಪ್ಲೋಡ್ ಮಾಡಿ ಹಿಂದಿಯಲ್ಲಿ ಶೀರ್ಷಿಕೆ ಬರೆಯಲಾಗಿದೆ. ಟ್ರಂಪ್ಗಾಗಿ ತಾಜ್ಮಹಲ್ಗೆ ಸ್ನಾನ ಮಾಡಿಸಲಾಗುತ್ತಿದೆ. ತಾಜ್ಮಹಲ್ ನಿರ್ಮಿಸಿದವರನ್ನು ದ್ವೇಷ ಮಾಡುವವರು ಈಗ ಟ್ರಂಪ್ಗಾಗಿ ತಾಜ್ಮಹಲ್ಗೆ ಸ್ನಾನ ಮಾಡಿಸುತ್ತಿದ್ದಾರೆ ಎಂದು ಬರೆದುಕೊಂಡಿದ್ದಾರೆ. ಈ ವಿಡಿಯೋ ದೃಶ್ಯ ತಾಜ್ಮಹಲ್ಗೆ ಸಂಬಂಧಿಸಿದಲ್ಲ. ಬದಲಿಗೆ ಭೂಪಾಲ್ನ ಮಾಲ್ನಲ್ಲಿ ನಿರ್ಮಿಸಿರುವ ತಾಜ್ ಪ್ರತಿಕೃತಿ ಎಂದು ಪತ್ತೆಯಾಗಿದೆ.
ವೈರಲ್ ಆದ ವೀಡಿಯೊದಲ್ಲಿರುವ ಸ್ಮಾರಕ ಆಗ್ರಾದ ತಾಜ್ ಮಹಲ್ ಅಲ್ಲ ಎಂದು ಇಂಡಿಯಾ ಟುಡೆ ಆ್ಯಂಟಿ ಫೇಕ್ ನ್ಯೂಸ್ ವಾರ್ ರೂಮ್ (ಎಎಫ್ಡಬ್ಲ್ಯೂಎ) ಕಂಡುಹಿಡಿದಿದೆ. ವಾಸ್ತವವಾಗಿ ಇದು ಭೋಪಾಲ್ನ ಪೀಪಲ್ಸ್ ಮಾಲ್ ಬಳಿ ನಿರ್ಮಿಸಲಾದ ತಾಜ್ಮಹಲ್ನ ಪ್ರತಿಕೃತಿ ಎಂದು ಪತ್ತೆ ಮಾಡಿದೆ.
ಟ್ರಂಪ್ ಆಗ್ರಾಕ್ಕೆ ಭೇಟಿ ನೀಡುವ ಮುನ್ನ ಭಾರತೀಯ ಪುರಾತತ್ತ್ವ ಇಲಾಖೆ ತಾಜ್ಮಹಲ್ ಕಟ್ಟದಲ್ಲಿರುವ ಕಪ್ಪು ಕಲೆಗಳನ್ನು ನಿರ್ಮೂಲ ಮಾಡಲು ಮಣ್ಣಿನ ಪ್ಯಾಕ್ ಮಾಡಿ ಸ್ವಚ್ಛಗೊಳಿಸಿದೆ. (ಏಜೆನ್ಸೀಸ್)