ವಾಷಿಂಗ್ಟನ್: ಜಗತ್ತಿನಾದ್ಯಂತ ಮೃತ್ಯಕೂಪವನ್ನು ನಿರ್ಮಿಸಿರುವ ಕರೊನಾ ವೈರಸ್ ಲಕ್ಷಾಂತರ ಮಂದಿಯನ್ನು ತನ್ನ ಸಾವಿನ ಬಲೆಯಲ್ಲಿ ಹಾಕಿಕೊಂಡಿದೆ. ವೈರಸ್ನ ಗಂಭೀರತೆ ತೀವ್ರ ಪ್ರಮಾಣದಲ್ಲಿರುವಾಗ ಅದೊಂದು ಸಣ್ಣ ಜ್ವರವಷ್ಟೇ ಎಂದು ಪೋಸ್ಟ್ ಮಾಡಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ವಿರುದ್ಧ ಫೇಸ್ಬುಕ್ ಮತ್ತು ಟ್ವಿಟರ್ ಕ್ರಮ ಜರುಗಿಸಿವೆ.
ಟ್ರಂಪ್ ಅವರ ಪೋಸ್ಟ್ ತಪ್ಪು ಮಾಹಿತಿ ಎಂದಿರುವ ಫೇಸ್ಬುಕ್ ಅದನ್ನು ತೆಗೆದುಹಾಕಿದೆ. ವಿಪಾರ್ಯಾಸವೆಂದರೆ ಪೋಸ್ಟ್ ಅದಾಗಲೇ 26 ಸಾವಿರಕ್ಕೂ ಹೆಚ್ಚು ಬಾರಿ ಶೇರ್ ಆಗಿದೆ. ಕೋವಿಡ್-19 ಗಂಭೀರತೆ ಕುರಿತ ತಪ್ಪಾದ ಮಾಹಿತಿಯನ್ನು ತೆಗೆದು ಹಾಕಿದ್ದೇವೆ ಎಂದು ಫೇಸ್ಬುಕ್ ವಕ್ತಾರ ಮಾಧ್ಯಮಗಳಿಗೆ ಹೇಳಿಕೆ ನೀಡಿದ್ದಾರೆ.
ಕರೊನಾ ಕುರಿತು ಟ್ರಂಪ್ ಮಂಗಳವಾರ ಟ್ವೀಟ್ ಮಾಡಿದ್ದರು. ಇದೀಗ ಎಲ್ಲ ರೀಟ್ವೀಟ್ಗಳನ್ನು ನಿಷ್ಕ್ರಿಯಗೊಳಿಸಿರುವ ಟ್ವಿಟರ್, ಎಚ್ಚರಿಕೆಯ ಫಲಕವನ್ನು ಸೇರಿಸಿ, ಇದು ಕರೊನಾ ವಿಚಾರದಲ್ಲಿ ತಪ್ಪು ಮಾಹಿತಿ ಮತ್ತು ಸಂಭವನೀಯ ಹಾನಿಕಾರಕ ಮಾಹಿತಿಯಾಗಿದೆ. ಹೀಗಾಗಿ ನಿಷ್ಕ್ರಿಯಗೊಳಿಸಲಾಗಿದೆ ಎಂದಿದೆ.
ಇದನ್ನೂ ಓದಿ: ಚೀನಾ ವಿರುದ್ಧ ತಂತ್ರ ಹೆಣೆಯಲು ಕರೆ: ಕ್ವಾಡ್ ದೇಶಗಳ ವಿದೇಶಾಂಗ ಸಚಿವರ ಜತೆ ಜಪಾನ್ ಪ್ರಧಾನಿ ಸಭೆ
ಇನ್ನು ಕರೊನಾ ವೈರಸ್ ಅಮೆರಿಕದಲ್ಲಿ ಅಟ್ಟಹಾಸವನ್ನೇ ಮೆರೆದಿದೆ. ಇದುವರೆಗೂ ಅಮೆರಿಕಲ್ಲಿ 2 ಲಕ್ಷಕ್ಕೂ ಅಧಿಕ ಮಂದಿ ಸಾವಿಗೀಡಾಗಿದ್ದು, ಸೋಂಕು ಮತ್ತು ಸಾವಿನ ಸಂಖ್ಯೆಯಲ್ಲಿ ಜಗತ್ತಿನಲ್ಲೇ ಮೊದಲ ಸ್ಥಾನದಲ್ಲಿದೆ.
ಇದೇ ಕರೊನಾಗೆ ಅಮೆರಿಕ ಅಧ್ಯಕ್ಷ ಟ್ರಂಪ್ ಸಹ ಹೊರತಾಗಿಲ್ಲ. ಕೋವಿಡ್ಗೆ ಚಿಕಿತ್ಸೆ ಪಡೆದು ನಿನ್ನೆಯಷ್ಟೇ ಟ್ರಂಪ್ ಡಿಸ್ಚಾರ್ಜ್ ಆಗಿದ್ದಾರೆ. ಇದರ ಬೆನ್ನಲ್ಲೇ ಟ್ರಂಪ್ ಕರೊನಾ ಒಂದು ಸಣ್ಣ ಜ್ವರವಷ್ಟೇ ಎಂದು ಉಡಾಫೆಯಾಗಿ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ್ದರು. ಹೀಗಾಗಿ ಫೇಸ್ಬುಕ್ ಮತ್ತು ಟ್ವಿಟರ್ ಕ್ರಮ ತೆಗೆದುಕೊಂಡಿದೆ. ಟ್ರಂಪ್ ಪತ್ನಿ ಮೆಲನಿಯಾರಿಗೂ ಕೋವಿಡ್ ಪಾಸಿಟಿವ್ ಆಗಿತ್ತು. (ಏಜೆನ್ಸೀಸ್)
ದಲಿತ ಶಾಸಕನ ಅಂತರ್ಜಾತಿ ವಿವಾಹ ಪ್ರಕರಣ: ಸ್ಫೋಟಕ ಹೇಳಿಕೆ ನೀಡಿದ ಯುವತಿ ಸೌಂದರ್ಯ..!