ನವದೆಹಲಿ: ಹಳೇ ಟ್ವೀಟ್ ವಿವಾದಕ್ಕೆ ಸಿಲುಕಿ ಬೌಲರ್ ಒಲೀ ರಾಬಿನ್ಸನ್ ಅಂತಾರಾಷ್ಟ್ರೀಯ ಕ್ರಿಕೆಟ್ನಿಂದ ಅಮಾನತುಗೊಂಡಿದ್ದಾರೆ. ರಾಬಿನ್ಸನ್ ಪ್ರಕರಣ ಹೊರಬೀಳುತ್ತಿದ್ದಂತೆ ಇಂಗ್ಲೆಂಡ್ ಆಟಗಾರರ ಒಂದೊಂದೇ ಹಳೇ ವಿವಾದಿತ ಟ್ವೀಟ್ಗಳು ಹೊರಬೀಳುತ್ತಿವೆ. ಐಪಿಎಲ್ನ ಸ್ಟಾರ್ ಕ್ರಿಕೆಟಿಗರಾದ ಜೋಸ್ ಬಟ್ಲರ್ ಹಾಗೂ ಇವೊಯಿನ್ ಮಾರ್ಗನ್ ಹಳೇ ಟ್ವೀಟ್ಗೆ ಸಂಬಂಧ ಇಕ್ಕಟ್ಟಿಗೆ ಸಿಲುಕಿದ್ದಾರೆ. ಇದೀಗ ಬಟ್ಲರ್ ಹಾಗೂ ಮಾರ್ಗನ್ ವಿರುದ್ಧ ತನಿಖೆಗೆ ಇಸಿಬಿ ಮುಂದಾಗಿದೆ. ಅಲ್ಲದೆ, ಸ್ಟುವರ್ಟ್ ಬ್ರಾಡ್ ಅವರನ್ನು ಲೆಸ್ಬಿಯನ್ ಎಂದು ಟ್ವೀಟ್ ಮಾಡಿದ್ದ ಅನುಭವಿ ಆಟಗಾರ ಜೇಮ್ಸ್ ಆಂಡರ್ಸನ್ ಕೂಡ ವಿವಾದಕ್ಕೆ ಸಿಲುಕಿದ್ದಾರೆ.
ಇದನ್ನೂ ಓದಿ: ಚೀನಾ ಕಂಪನಿಗೆ ಕೊಕ್ ಕೊಟ್ಟ ಐಒಎ, ಭಾರತ ತಂಡಕ್ಕೆ ಹೊಸ ಪ್ರಾಯೋಜಕರು
2018ರ ಮೇ 13 ರಂದು ಐಪಿಎಲ್ನ ಪಂದ್ಯವೊಂದರಲ್ಲಿ ಬಟ್ಲರ್ 53 ಎಸೆತಗಳಲ್ಲಿ 94 ರನ್ ಸಿಡಿಸಿದ್ದರು. ಇದಕ್ಕೆ ಮಾರ್ಗನ್ ಅಭಿನಂದನೆಗಳು ಸರ್ ಎಂದು ಬಟ್ಲರ್ ಉದ್ದೇಶಿಸಿ ಟ್ವೀಟ್ ಮಾಡಿದ್ದರು. ಪರಸ್ಪರ ಸರ್ ಎಂದು ಸಂಬೋಧಿಸಿಕೊಳ್ಳುವ ಮೂಲಕ ಭಾರತೀಯರನ್ನು ನಿಂದಿಸಿದ್ದರು ಎನ್ನಲಾಗಿದೆ. ಐಪಿಎಲ್ನಲ್ಲಿ ಕೆಕೆಆರ್ ಕೋಚ್ ಆಗಿರುವ ಬ್ರೆಂಡನ್ ಮೆಕ್ಕಲಂ ಕೂಡ ಮಾರ್ಗನ್ ಮೆಸೇಜ್ಗೆ ಸರ್ ಎಂದೇ ಪ್ರತಿಕ್ರಿಯೆ ನೀಡಿದ್ದರು. ಇದು ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ ಶುರುವಾದಂತೆ ಬಟ್ಲರ್ ತಮ್ಮ ಟ್ವೀಟ್ಗಳನ್ನು ಡಿಲೀಟ್ ಮಾಡಿದ್ದರು.
ಇಂಗ್ಲೆಂಡ್ ಟೆಸ್ಟ್ ತಂಡದ ಅನುಭವಿ ವೇಗಿ ಜೇಮ್ಸ್ ಆಂಡರ್ಸನ್ 2010ರಲ್ಲಿ ಮತ್ತೋರ್ವ ವೇಗಿ ಸ್ಟುವರ್ಟ್ ಬ್ರಾಡ್ ಉದ್ದೇಶಿ ಮಾಡಿದ್ದ ಟ್ವೀಟ್ ವಿವಾದ ಸೃಷ್ಟಿಸಿದೆ. ಅಂದು 27 ವರ್ಷದ ಆಂಡರ್ಸನ್, ಸ್ಟುವರ್ಟ್ ಬ್ರಾಡ್ ಹೇರ್ಸ್ಟೈಲ್ ಉದ್ದೇಶಿಸಿ 15 ವರ್ಷದ ಲೆಸ್ಬಿಯನ್ ಎಂದು ಕರೆದಿದ್ದರು. ಆದರೆ, ವಿವಾದ ಕಾವೇರುತ್ತಿದ್ದಂತೆ ಆಂಡರ್ಸನ್ ಹಳೇ ಟ್ವೀಟ್ಅನ್ನು ಡಿಲೀಟ್ ಮಾಡಿದ್ದಾರೆ. ಇಂಗ್ಲೆಂಡ್ ತಂಡದ ವೇಗದ ಬೌಲರ್ ಒಲಿ ರಾಬಿನ್ಸನ್ ಅವರನ್ನು 2012-13ರಲ್ಲಿ ಮಾಡಿದ್ದ ವಿವಾದಾತ್ಮಕ ಟ್ವೀಟ್ಗೆ ಸಂಬಂಧಪಟ್ಟಂತೆ ಅಮಾನತುಗೊಳಿಸಲಾಗಿದ್ದು, ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿಯ ತನಿಖೆ ಮುಗಿಯುವವರೆಗೆ ಅಂತಾರಾಷ್ಟ್ರೀಯ ಕ್ರಿಕೆಟ್ನಿಂದ ಹೊರಗುಳಿಯಲಿದ್ದಾರೆ.