ಪುಣೆ: ಟ್ರಾಫಿಕ್ ಜಾಮ್ನಲ್ಲಿ ಸಿಲುಕಿಕೊಳ್ಳುವ ಕೆಲ ಬೈಕ್ ಸವಾರರು ಇತ್ತೀಚೆಗೆ ಅದರಿಂದ ಬಚಾವಾಗಲು ರಸ್ತೆ ಬದಿಯಲ್ಲಿ ಪಾದಾಚಾರಿಗಳಿಗಾಗಿ ಮಾಡಿರುವ ಫುಟ್ಪಾತ್ ಅನ್ನು ಆಶ್ರಯಿಸಿಕೊಂಡು ನಿಯಮ ಉಲ್ಲಂಘನೆ ಮಾಡುವುದು ಸಾಮಾನ್ಯವಾಗಿದೆ. ಇದರಿಂದ ಪಾದಾಚಾರಿಗಳಿಗೆ ಎಷ್ಟು ತೊಂದರೆಯಾಗುತ್ತದೆ ಎಂಬ ಸಾಮಾನ್ಯ ಅರಿವು ಕೂಡ ಕೆಲ ಬೈಕ್ ಸವಾರರಿಗೆ ಇರುವುದಿಲ್ಲ. ಇದರಿಂದ ರೋಸಿಹೋದ ಹಿರಿಯ ಮಹಿಳೆಯೊಬ್ಬರು ಅಂತಹ ಸವಾರರಿಗೆ ಕ್ಲಾಸ್ ತೆಗೆದುಕೊಂಡ ವಿಶೇಷ ಘಟನೆ ಮಹಾರಾಷ್ಟ್ರದ ಪುಣೆಯಲ್ಲಿ ನಡೆದಿದೆ.
ಸೀರೆಯನ್ನು ಎತ್ತಿ ಕಟ್ಟಿಕೊಂಡು ಫುಟ್ಪಾತ್ ಅಖಾಡಕ್ಕೆ ಇಳಿದು ಮಹಿಳೆ, ನಿಯಮ ಉಲ್ಲಂಘಿಸುವ ಬೈಕ್ ಸವಾರರನ್ನು ತಡೆಗಟ್ಟಿ ತರಾಟೆಗೆ ತೆಗದುಕೊಂಡರು. ಇದಕ್ಕೆ ಸಂಬಂಧಿಸಿದ ವಿಡಿಯೋವನ್ನು ಪತ್ರಕರ್ತರೊಬ್ಬರು ತಮ್ಮ ಟ್ವಿಟರ್ನಲ್ಲಿ ಶೇರ್ ಮಾಡಿಕೊಂಡಿದ್ದಾರೆ.
ವಿಡಿಯೋದಲ್ಲಿ ಏನಿದೆ?: ಫುಟ್ಪಾತ್ ಮಧ್ಯೆ ನಿಂತಿರುವ ಮಹಿಳೆಯೊಬ್ಬರು ಫುಟ್ಪಾತ್ ಮೇಲೆ ಬೈಕ್ ಚಲಾಯಿಸಿಕೊಂಡು ಬರುವ ಸವಾರರನ್ನು ತಡೆದು ರಸ್ತೆ ಮೇಲೆ ಬರುವಂತೆ ಪಾಠ ಮಾಡಿದ್ದಾರೆ. ಕೊನೆಯಲ್ಲಿ ಮತ್ತಿಬ್ಬರು ಹಿರಿಯರು ಮಹಿಳೆಯೊಂದಿಗೆ ಸೇರಿ ಸವಾರರನ್ನು ತಡೆದು ಚೆನ್ನಾಗಿ ಕ್ಲಾಸ್ ತೆಗೆದುಕೊಂಡಿದ್ದಾರೆ.
खबरदार गाडी पुढे आणाल..
पदपथावरून गाड्या नेऊन पादचाऱ्यांना अडथळा अनेक मंडळी करतात. अशांना थांबवायला या #पुणेकर काकूंनी असा शिस्तीचा धडा दिला. त्याची ही झलक #MTPune @ParagKMT @ShreedharLoniMT @shree_brahmeMT @PuneCityPolice @puneintended @CPPuneCity #Pune #punetraffic pic.twitter.com/nIqVtXl7YT— Amit Ruke (@AmitRukeMT) February 20, 2020
ಫೆ. 21ರಂದು ವಿಡಿಯೋವನ್ನು ಶೇರ್ ಮಾಡಲಾಗಿದ್ದು, ಅಂದಿನಿಂದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಗಿರಕಿ ಹೊಡೆಯುತ್ತಿದೆ. ಈವರೆಗೂ 20 ಲಕ್ಷಕ್ಕೂ ಹೆಚ್ಚು ಮಂದಿ ವೀಕ್ಷಣೆ ಮಾಡಿದ್ದು, ಅದರ ಸಂಖ್ಯೆ ಇನ್ನು ಹೆಚ್ಚುತ್ತಲೇ ಇದೆ. ವಿಡಿಯೋವನ್ನು ಸಾವಿರಕ್ಕೂ ಹೆಚ್ಚು ಮಂದಿ ಲೈಕ್ಸ್ ಮಾಡಿದ್ದು, 300ಕ್ಕೂ ಹೆಚ್ಚು ರೀಟ್ವೀಟ್ಗಳನ್ನು ಪಡೆದುಕೊಂಡಿದೆ.
ಪುಣೆ ಪೊಲೀಸರು ಸೇರಿ ಅನೇಕರು ವಿಡಿಯೋ ಕುರಿತು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಇನ್ನು ಕೆಲವರು ಒಳ್ಳೆಯ ಕೆಲಸ ಮಾಡಿ ಎಂದು ಅಧಿಕಾರಿಗಳಿಗೆ ಸಲಹೆ ನೀಡಿ, ಮಹಿಳೆಯನ್ನು ದಿಟ್ಟ ಮಹಿಳೆ ಎಂದು ಕೊಂಡಾಡಿದ್ದಾರೆ. ಹೀಗೆ ಸಾಕಷ್ಟು ಮಂದಿ ಮಹಿಳೆಯನ್ನು ಹೊಗಳಿ ಕಾಮೆಂಟ್ಗಳ ಸುರಿಮಳೆ ಗೈಯುತ್ತಿದ್ದಾರೆ. (ಏಜೆನ್ಸೀಸ್)