ಬೆಂಗಳೂರು: ಕರ್ನಾಟಕ ಪ್ರವಾಸಕ್ಕೆ ಆಗಮಿಸಿರುವ ಪ್ರಧಾನಿ ನರೇಂದ್ರ ಮೋದಿ ಅವರು ತಮ್ಮದು ಡಬಲ್ ಇಂಜಿನ್ ಸರ್ಕಾರ ಎಂಬುದನ್ನು ನಿನ್ನೆಯಷ್ಟೇ ಮತ್ತೊಮ್ಮೆ ಪ್ರಸ್ತಾಪಿಸಿ, ಅದರಿಂದಾದ ಅಭಿವೃದ್ಧಿ ಕುರಿತು ರಿಪೋರ್ಟ್ ಕಾರ್ಡ್ ಕೂಡ ತೆರೆದಿಟ್ಟಿದ್ದರು. ಇದೀಗ ಮೆಸೇಜಿಂಗ್ ಆ್ಯಪ್ಗಳ ಪೈಕಿ ತೀರಾ ಅಡ್ವಾನ್ಸ್ಡ್ ಆಗಿರುವಂಥ ಟೆಲಿಗ್ರಾಂ ತಾಂತ್ರಿಕವಾಗಿ ಮತ್ತೊಂದು ದಾಪುಗಾಲಿಟ್ಟಿದ್ದು, ತಮ್ಮದೂ ಡಬಲ್ ಇಂಜಿನ್ ಎಂಬುದಾಗಿ ಹೇಳಿಕೊಂಡಿದೆ.
ಅರ್ಥಾತ್, ನಿನ್ನೆಯಷ್ಟೇ ಹೊಸ ಅಪ್ಡೇಟ್ಸ್ ಬಿಟ್ಟಿರುವ ಟೆಲಿಗ್ರಾಂ, ಈಗಿರುವ ಬಹುತೇಕ ಫೀಚರ್ಸ್ ಸಾಮರ್ಥ್ಯ ದುಪ್ಪಟ್ಟಾಗಿಸಿದೆ. ಸದ್ಯ 70 ಕೋಟಿಗೂ ಅಧಿಕ ಬಳಕೆದಾರರನ್ನು ಹೊಂದಿರುವ ಟೆಲಿಗ್ರಾಂ, ಈಗಿರುವುದರ ಜತೆಗೆ ಟೆಲಿಗ್ರಾಂ ಪ್ರೀಮಿಯಂ ಕೂಡ ಲೋಕಾರ್ಪಣೆ ಮಾಡಿದ್ದು, ಇದರಲ್ಲಿ ಇನ್ನಷ್ಟು ವಿಶೇಷ ಸೌಲಭ್ಯಗಳನ್ನು ನೀಡುತ್ತಿದೆ.
ಮೀಡಿಯಾ ಮತ್ತು ಫೈಲ್ ಸಾಮರ್ಥ್ಯ 2 ಜಿಬಿಯಿಂದ 4 ಜಿಬಿಗೆ ಹೆಚ್ಚಿಸಲಾಗಿದ್ದು, ಒಮ್ಮೆಗೆ 4 ಜಿಬಿ ಫೈಲ್ ಟ್ರಾನ್ಸ್ಫರ್ ಮಾಡಬಹುದಾಗಿದೆ. ಚಾನೆಲ್ ಸಾಮರ್ಥ್ಯವನ್ನು 500ರಿಂದ 1000ಕ್ಕೆ ಏರಿಸಿದೆ. ಪಿನ್ ಮಾಡುವ ಸಾಮರ್ಥ್ಯವನ್ನು 5 ರಿಂದ 10ಕ್ಕೆ, ಪಬ್ಲಿಕ್ ಲಿಂಕ್ ರಿಸರ್ವ್ ಮಾಡುವ ಸಾಮರ್ಥ್ಯವನ್ನು 10ರಿಂದ 20ಕ್ಕೆ, ಜಿಐಎಫ್ ಫೈಲ್ ಸೇವ್ ಮಾಡಿಕೊಳ್ಳುವ ಸಾಮರ್ಥ್ಯವನ್ನು 200ರಿಂದ 400ಕ್ಕೆ ಏರಿಸಿದೆ.
ಅಂದಹಾಗೆ ಈ ಡಬಲ್ ಧಮಾಕಾ ಟೆಲಿಗ್ರಾಂ ಪ್ರೀಮಿಯರ್ ಬಳಕೆದಾರರಿಗೆ ಮಾತ್ರ. ಅದಾಗ್ಯೂ ಪ್ರೀಮಿಯಂ ಬಳಕೆದಾರರು ಕಳಿಸಿರುವ 4 ಜಿಬಿ ಫೈಲ್ ಇತ್ಯಾದಿ ಕೆಲವು ಫೀಚರ್ಗಳನ್ನು ಡೌನ್ಲೋಡ್ ಮಾಡಿಕೊಳ್ಳುವಂಥ ಅವಕಾಶ ಈಗಾಗಲೇ ಇರುವ ಟೆಲಿಗ್ರಾಂ ಬಳಕೆದಾರರಿಗೆ ಇರಲಿದೆ. ಅಲ್ಲದೆ, ಈಗಿರುವ ಎಲ್ಲ ಫ್ರೀ ಫೀಚರ್ಗಳು ಮುಂದುವರಿಯಲಿವೆ. ಅಂದಹಾಗೆ ಪ್ರೀಮಿಯಂ ಬಳಕೆದಾರರಿಗೆ ವೆರಿಫೈಡ್ ಬ್ಯಾಡ್ಜ್ ಕೂಡ ಸಿಗಲಿದೆ. ಪ್ರೀಮಿಯಂ ಬಳಕೆಗೆ ಮಾಸಿಕ ಶುಲ್ಕ ಪಾವತಿಸಬೇಕು.