| ಮಂಜುನಾಥ ಕೆ. ಬೆಂಗಳೂರು
ಗೂಗಲ್ನಲ್ಲಿ ಸಿಗುವ ಕಸ್ಟಮರ್ ಕೇರ್ಗಳ ನಂಬರ್ಗಳಿಗೆ ಕರೆ ಮಾಡಿ ಸಲಹೆ ಕೇಳುವ ಮುನ್ನ ನೂರು ಬಾರಿ ಯೋಚಿಸಿ. ಏಕೆಂದರೆ ಸೈಬರ್ ಖದೀಮರು ನಿಮಗೆ ಸಹಾಯ ಮಾಡುವ ನೆಪದಲ್ಲಿ ನಿಮ್ಮ ಖಾತೆಗೆ ಕನ್ನ ಹಾಕಿ ಅದರಲ್ಲಿರುವ ಹಣವನ್ನು ಕ್ಷಣಾರ್ಧದಲ್ಲಿ ಎಗರಿಸುತ್ತಾರೆ.
ಕಸ್ಟಮರ್ ಕೇರ್ ನಂಬರ್ ತಿಳಿದುಕೊಳ್ಳಲು ಗೂಗಲ್ನಲ್ಲಿ ಸರ್ಚ್ ಮಾಡಿದಾಗ ಕೆಲವೊಂದು ನಂಬರ್ಗಳು ಸಿಗುತ್ತವೆ. ಆ ನಂಬರ್ಗಳು ಸೈಬರ್ ಖದೀಮರದ್ದಾಗಿರುತ್ತದೆ. ಅವರು ನಿಮಗೆ ಸಹಾಯ ಮಾಡುವ ನೆಪದಲ್ಲಿ ಎನಿ ಡೆಸ್ಕ್, ಟೀಮ್ ವೀವರ್ ಕ್ವಿಕ್ ಸಪೋರ್ಟ್ ಎಂಬ ಆಪ್ ಅನ್ನು ಡೌನ್ಲೋಡ್ ಮಾಡಿಕೊಳ್ಳಲು ಹೇಳುತ್ತಾರೆ. ಆ ಆಪ್ಗಳನ್ನು ಇನ್ಸ್ಟಾಲ್ ಮಾಡಿ, ಅದರಲ್ಲಿ ನಿಮ್ಮ ಖಾತೆಯ ವಿವರ ಮತ್ತು ಪಾಸ್ವರ್ಡ್ ಹಾಕಿದ ತಕ್ಷಣ ಆ ವಿವರಗಳು ಸೈಬರ್ ಕಳ್ಳರ ಕೈಸೇರಿ, ಅವರು ನಿಮ್ಮ ಖಾತೆಗಳಿಗೆ ಕನ್ನ ಹಾಕುತ್ತಾರೆ.
ಇದನ್ನೂ ಓದಿ: ಹೈರಾಣಾಗಿಸುವ ನೆಗೆಟಿವ್ ಬಾಡಿ ಇಮೇಜ್: ಆಕಾರ-ವಿಕಾರಗಳಿಗೆ ಅಂಟಿಕೊಳ್ಳದೆ ಆತ್ಮವಿಶ್ವಾಸ ಹೆಚ್ಚಿಸಿಕೊಳ್ಳೋಣ
ದೊಡ್ಡಮ್ಮನಿಗೆ 48 ಸಾವಿರಕ್ಕೆ ನಾಮ: ಕೊಡಿಗೇಹಳ್ಳಿಯ ಸಂಜೀವಿನಗರದ ನಿವಾಸಿ ದೊಡ್ಡಮ್ಮ ಎಂಬುವರು ಫೆ.23ರಂದು ತಮ್ಮ ಕಾರು ಲೋನ್ ಬಗ್ಗೆ ಮಾಹಿತಿ ಪಡೆಯಲು ಎಚ್ಡಿಎಫ್ಸಿ ಬ್ಯಾಂಕ್ನ ಕಸ್ಟಮರ್ ಕೇರ್ ನಂಬರ್ ತಿಳಿದುಕೊಳ್ಳಲು ಗೂಗಲ್ನಲ್ಲಿ ಸರ್ಚ್ ಮಾಡಿದ್ದರು. ಆಗ 02268461208 ನಂಬರ್ ಸಿಕ್ಕಿದೆ.ಅದಕ್ಕೆ ಕರೆ ಮಾಡಿದಾಗ, ‘ನಮ್ಮ ಏಜೆಂಟ್ ನಿಮಗೆ ವಾಪಸ್ ಕಾಲ್ ಮಾಡುತ್ತಾರೆ’ ಎಂದು ಹೇಳಿ ಕರೆ ಕಡಿತಗೊಳಿಸಿದ್ದರು. ಇದಾದ ನಂತರ ಅಪರಿಚಿತ ವ್ಯಕ್ತಿ 7377176235
ನಂಬರ್ನಿಂದ ಕರೆ ಮಾಡಿ ಎನಿಡೆಸ್ಕ್ ಎಂಬ ಆಪ್ ಡೌನ್ಲೋಡ್ ಮಾಡಿಕೊಂಡು ನೆಟ್ ಬ್ಯಾಕಿಂಗ್ ಓಪನ್ ಮಾಡಲು ಹೇಳಿ ಡೆಬಿಟ್ ಕಾರ್ಡ್ ನಂಬರ್ ಎಂಟರ್ ಮಾಡಲು ಹೇಳಿದ್ದ. ಆಗ ದೊಡ್ಡಮ್ಮ ಡೆಬಿಟ್ ಕಾರ್ಡ್ ನಂಬರ್ ನಮೂದಿಸಿದ್ದರು. ಇದಾದ ನಂತರ ಅವರ ಖಾತೆಯಿಂದ ಹಂತ ಹಂತವಾಗಿ 48 ಸಾವಿರ ರೂ. ಕಡಿತವಾಗಿದೆ. ಬಳಿಕ ತಾನು ವಂಚನೆಗೆ ಒಳಗಾಗಿರುವುದಾಗಿ ಅರಿತ ಅವರು ಈ ಸಂಬಂಧ ಮೋಸ ಮಾಡಿರುವ ಅಪರಿಚಿತ ವ್ಯಕ್ತಿಯ ವಿರುದ್ಧ ಈಶಾನ್ಯ ವಿಭಾಗದ ಸೈಬರ್ ಕ್ರೈಂ (ಸಿಇಎನ್) ಠಾಣೆಗೆ ದೂರು ನೀಡಿದ್ದಾರೆ.
ಸಲಹೆ ಕೇಳಲು ಹೋಗಿ 1.63 ಲಕ್ಷ ರೂ. ಹೋಯ್ತು: ಯಲಹಂಕ ಉಪನಗರ ನಿವಾಸಿ ಎನ್. ಶಂಕರ್, ಕೆನರಾ ಬ್ಯಾಂಕ್ನಲ್ಲಿ ಖಾತೆಯನ್ನು ಹೊಂದಿದ್ದು, ಫೆ.21ರಂದು ತಮ್ಮ ಮೊಬೈಲ್ನಲ್ಲಿ ಕೆನರಾ ಬ್ಯಾಂಕ್ ಒಪಿಪಿ- ಕೆನರಾ ಎಐ/ ಎಂಬ ಆಪ್ ಡೌನ್ಲೋಡ್ ಮಾಡಿಕೊಳ್ಳಲು ಯತ್ನಿಸಿದ್ದರು. ಆ ಆಪ್ ಡೌನ್ಲೋಡ್
ಆಗದಿದ್ದಾಗ ಕೆನರಾ ಬ್ಯಾಂಕ್ ಕಸ್ಟಮರ್ ಕೇರ್ 919263302500ಗೆ ಕರೆ ಮಾಡಿದ್ದರು. ಕರೆ ಸ್ವೀಕರಿಸಿದ ವ್ಯಕ್ತಿಯು, ಎನಿಡೆಸ್ಕ್ ಆಪ್ ಅನ್ನು ಡೌನ್ಲೋಡ್ ಮಾಡಿಕೊಂಡು ಅಕೌಂಟ್ ಡಿಟೇಲ್ಸ್ ಹಾಕಿ ಅಪ್ಡೇಟ್ ಮಾಡಿ ಎಂದಿದ್ದರು. ಶಂಕರ್ ಆ ಸೂಚನೆ ಪಾಲಿಸಿದ್ದರು. ನಂತರ ಅವರ ಖಾತೆಯಿಂದ ಹಂತಹಂತವಾಗಿ 1 ಲಕ್ಷ 63 ಸಾವಿರ ರೂ. ಕಡಿತವಾಗಿದೆ. ಈ ಸಂಬಂಧ ಈಶಾನ್ಯ ವಿಭಾಗದ ಸಿಇಎನ್ ಠಾಣೆಗೆ ದೂರು ನೀಡಿದ್ದಾರೆ.
ಇದನ್ನೂ ಓದಿ: ಮುಳ್ಳುಹಂದಿಯ ಆಸೆಗೆ ಪ್ರಾಣವನ್ನೇ ಕಳೆದುಕೊಂಡ್ರು; ಗುಹೆಯೊಳಗೆ ಉಸಿರುಗಟ್ಟಿ ಇಬ್ಬರ ಸಾವು
ಕ್ರೆಡಿಟ್ ಕಾರ್ಡ್ ಕ್ಯಾನ್ಸಲ್ಗೆ 93 ಸಾವಿರ ರೂ. ಲಾಸ್
ಕೊಡಿಗೇಹಳ್ಳಿ ನಿವಾಸಿ ಉಷಾ ಶ್ರೀನಿವಾಸನ್, ಯೆಸ್ ಬ್ಯಾಂಕ್ನ ಕ್ರೆಡಿಟ್ ಕಾರ್ಡ್ ಹೊಂದಿದ್ದು, ಆ ಕಾರ್ಡ್ ಅನ್ನು ಕ್ಯಾನ್ಸಲ್ ಮಾಡುವ ಸಲುವಾಗಿ ಗೂಗಲ್ನಲ್ಲಿ ಕಸ್ಟಮರ್ ಕೇರ್ ಸರ್ಚ್ ಮಾಡಿ ಅದರಲ್ಲಿರುವ ನಂಬರ್ಗೆ ಕರೆ ಮಾಡಿದ್ದರು. ಅಪರಿಚಿತ ವ್ಯಕ್ತಿ ಎನಿ ಡೆಸ್ಕ್ ಆಪ್ ಡೌನ್ಲೋಡ್ ಮಾಡಿ ಅಪ್ಡೇಟ್ ಮಾಡಲು ಹೇಳಿದ್ದಾರೆ. ಬಳಿಕ ಆ ಆಪ್ ಡೋನ್ಲೋಡ್ ಮಾಡಿ ಖಾತೆಯ ವಿವರವನ್ನು ಅಪ್ಡೇಟ್ ಮಾಡಿದಾಗ ಖಾತೆಯಿಂದ ಹಂತ ಹಂತವಾಗಿ 93,548 ರೂ. ಕಡಿತವಾಗಿದೆ. ಈ ಸಂಬಂಧ ಈಶಾನ್ಯ ವಿಭಾಗದ ಸಿಇಎನ್ ಠಾಣೆಗೆ ದೂರು ನೀಡಿದ್ದಾರೆ.
ವಿದ್ಯುತ್ ಬಿಲ್ ಹೆಸರಲ್ಲಿ ಕನ್ನ
ಖಾಸಗಿ ಕಂಪನಿ ಉದ್ಯೋಗಿ, ಯಲಹಂಕ ಉಪನಗರ ನಿವಾಸಿ ಪದ್ಮನಾಭನ್ಗೆ ಫೆ. 23ರಂದು ಅಪರಿಚಿತ +918580141780 ನಂಬರ್ನಿಂದ ಮೆಸೇಜ್ ಬಂದಿತ್ತು. ಅದರಲ್ಲಿ ವಿದ್ಯುತ್ ಬಿಲ್ ಕಟ್ಟದ ಕಾರಣ ಈ ದಿನ ವಿದ್ಯುತ್ ಕಡಿತಗೊಳಿಸ ಲಾಗುವುದು. ಕೂಡಲೇ 9381709739 ಸಂಖ್ಯೆ ಸಂರ್ಪಸಿ ಎಂದು ಅದರಲ್ಲಿ ನಮೂದಿಸಲಾಗಿತ್ತು. ಆ ನಂಬರಿಗೆ ಕರೆ ಮಾಡಿದಾಗ ಅಪರಿಚಿತ ವ್ಯಕ್ತಿ ಹಿಂದಿಯಲ್ಲಿ ನೀವು ಬಿಲ್ ಪಾವತಿ ಮಾಡಿದ್ದು ಸಿಸ್ಟಂನಲ್ಲಿ ಅಪ್ಡೇಟ್ ಅಗಿಲ್ಲ. ಕಾರಣ ಟೀಮ್ ವೀವರ್ ಕ್ವಿಕ್ ಸಪೋರ್ಟ್ ಎಂಬ ಆಪ್ ಡೌನ್ಲೋಡ್ ಮಾಡಲು, ತಿಳಿಸಿದ್ದರು. ಬಳಿಕ ಹಂತ ಹಂತವಾಗಿ 4,98,855 ರೂ. ಎಗರಿಸಿದ್ದಾರೆ.
ಹೆತ್ತ ತಾಯಿಯಂತೆ ಎದೆ ಹಾಲುಣಿಸಿ ಮಗು ಆರೈಕೆ: ಬಾಣಂತಿಗೆ ಪರೀಕ್ಷೆ ಬರೆಯಲು ನೆರವಾದ ಲೇಡಿ ಕಾನ್ಸ್ಟೇಬಲ್
ತನ್ನ ಮದ್ವೆಯಲ್ಲಿ ಭಾರತೀಯ ಉಡುಗೆ ತೊಟ್ಟ ಪಾಕ್ ನಟಿ ವಿರುದ್ಧ ಕಿಡಿ: ನೆಟ್ಟಿಗರ ವಾದ ಹೀಗಿದೆ….