ಕೆ.ಎಸ್.ಪ್ರಣವಕುಮಾರ್
ಚಿತ್ರದುರ್ಗ: ರಾಜ್ಯದಲ್ಲಿ ಸೂರ್ಯನ ಪ್ರಖರತೆಯಷ್ಟೇ ವಿಧಾನಸಭಾ ಚುನಾವಣಾ ಕಾವು ನಿತ್ಯ ಏರಿಕೆಯಾಗುತ್ತಿದ್ದು, ಪಕ್ಷಗಳ ಪ್ರಮುಖ ನಾಯಕರು ಪ್ರಚಾರದಲ್ಲಿ ನಿರತರಾಗಿದ್ದಾರೆ. ಅವರನ್ನು ಸ್ವಾಗತಿಸಲು ನವನವೀನ ಮಾದರಿಯ ವೈವಿಧ್ಯಮಯ ಬೃಹದಾಕಾರದ ಮಾಲೆಗಳಿಗೆ ನಾಡಿನೆಲ್ಲೆಡೆ ಬೇಡಿಕೆ ಕಂಡು ಬರುತ್ತಿದೆ.
ರಾಜ್ಯದ ಎಲ್ಲ ಜಿಲ್ಲೆಗಳಲ್ಲೂ ವಿವಿಧ ಫ್ಲವರ್ ಸ್ಟಾಲ್ಗಳಿಗೆ ಇಂತಹದ್ದೇ ಹಾರ ಬೇಕೆಂದು ಅಭಿಮಾನಿಗಳು ಬೇಡಿಕೆ ಮುಂದಿಡುತ್ತಿದ್ದಾರೆ. ಇದರಿಂದಾಗಿ ದಿನೇ ದಿನೆ ತಯಾರಕರಿಗೂ ಡಿಮಾಂಡ್ ಸೃಷ್ಟಿಯಾಗಿದ್ದು, ಬಿಡುವಿಲ್ಲದೆ ಸಿದ್ಧತೆಯಲ್ಲಿ ತೊಡಗಿದ್ದಾರೆ. ಚುನಾವಣಾ ಪ್ರಚಾರ ಅಂತ್ಯದವರೆಗೂ ಇದು ಹೀಗೆ ಮುಂದುವರೆಯುವ ಸಾಧ್ಯತೆ ಇದೆ.
ಇದನ್ನೂ ಓದಿ: ಆರ್ಎಸ್ಎಸ್ನವರು ನನ್ನ ಮೇಲೆ ನಿಗಾ ವಹಿಸಿ ಯಾವುದೇ ಪ್ರಯೋಜನವಿಲ್ಲ; ಜಗದೀಶ್ ಶೆಟ್ಟರ್
50 ಸಾವಿರ ರೂ.ನಿಂದ 1 ಲಕ್ಷ ರೂ. ಮೌಲ್ಯದವರೆಗೂ ಖರ್ಚು
ಇತ್ತೀಚಿನ ದಿನಗಳಲ್ಲಿ ಸೇಬಿನ ಹಾರದ ಟ್ರೆಂಡ್ ಜೋರಾಗಿದೆ. ಒಣ ಕೊಬ್ಬರಿ, ಕಿತ್ತಳೆ, ಮೋಸುಂಬಿ, ಬೆಲ್ಲದ ಹಣ್ಣುಗಳ ಹಾರ ಕೂಡ ಇದಕ್ಕೆ ಹೊರತಾಗಿಲ್ಲ. ಸಾವಿರಾರು ಹಣ್ಣುಗಳಿಂದಲೇ ಒಂಬತ್ತರಿಂದ 15 ಎಳೆಯ ಬೃಹದಾಕಾರದ ಒಂದು ಮಾಲೆ ತಯಾರಿಸಲು 50 ಸಾವಿರ ರೂ.ನಿಂದ 1 ಲಕ್ಷ ರೂ. ಮೌಲ್ಯದವರೆಗೂ ಖರ್ಚಾಗುತ್ತಿದೆ.
ಹಣಕ್ಕೆ ಲೆಕ್ಕ ಹಾಕದೆಯೆ ತಮಗಿಷ್ಟವಾದ ಹಾರಕ್ಕೆ ಬೇಡಿಕೆ
ಅದೇ ರೀತಿ ಬೆಲ್ಲದ ಅಚ್ಚು, ಕ್ಯಾಪ್ಸಿಕಂ, ತಂಪು ಪಾನಿಯ ಪೊಟ್ಟಣ (ಜ್ಯೂಸ್ ಪಾಕೆಟ್), ಕೆಎಂಎಫ್ ಗುಡ್ಲೈಫ್ ಹಾಲಿನ ಪೊಟ್ಟಣ, ಚಾಕೊಲೇಟ್, ವಿವಿಧ ವರ್ಣದ ಪುಷ್ಪ ಹೀಗೆ ಅನೇಕ ಮಾದರಿಗಳಲ್ಲಿ ಅತ್ಯಾಕರ್ಷಕವಾಗಿ ಸಿದ್ಧಗೊಳ್ಳುತ್ತಿವೆ. ಗಾತ್ರ, ಎತ್ತರಕ್ಕೆ ಅನುಗುಣವಾಗಿ ಬೆಲೆ ನಿಗದಿಪಡಿಸುತ್ತಿದ್ದಾರೆ ತಯಾರಕರು. ಆದರೆ, ಅಭಿಮಾನಿಗಳು ಮಾತ್ರ ಹಣಕ್ಕೆ ಲೆಕ್ಕ ಹಾಕದೆಯೆ ತಮಗಿಷ್ಟವಾದ ಹಾರಕ್ಕೆ ಬೇಡಿಕೆ ಮಂಡಿಸುತ್ತಿದ್ದಾರೆ.
ಬಿಜೆಪಿಯ ವಿಜಯ ಸಂಕಲ್ಪ ಯಾತ್ರೆ, ಕಾಂಗ್ರೆಸ್ನ ಪ್ರಜಾಧ್ವನಿ, ಜೆಡಿಎಸ್ನ ಪಂಚರತ್ನ ರಥಯಾತ್ರೆ, ಇತ್ತೀಚೆಗೆ ಅಭ್ಯರ್ಥಿಗಳ ನಾಮಪತ್ರ ಸಲ್ಲಿಕೆ ವೇಳೆ ಬೃಹತ್ ರೋಡ್ ಶೋ, ಅದ್ದೂರಿ ಸಮಾವೇಶಗಳು ಒಳಗೊಂಡು ರಾಜ್ಯದೆಲ್ಲೆಡೆ ಎರಡು ತಿಂಗಳಿನಿಂದಲೂ ತಯಾರಾದ ಹಾರಗಳ ಸಂಖ್ಯೆ ಎಂದಿಗಿಂತಲೂ ಅಧಿಕವಾಗಿದೆ.
ಇದನ್ನೂ ಓದಿ: ಪ್ರಧಾನಿ ಹುದ್ದೆ ಕೊಟ್ಟರೂ ಬೇಡ! ಚಿಕ್ಕಪೇಟೆ ಕ್ಷೇತ್ರ ಬಿಟ್ಟು ಎಲ್ಲೂ ಹೋಗಲ್ಲ; ಕೆಜಿಎಫ್ ಬಾಬು
ಬೃಹತ್ ಹಾರಗಳ ಮೊರೆ ಹೋದ ಕಾರ್ಯಕರ್ತರು
ಪ್ರಧಾನಿ ನರೇಂದ್ರ ಮೋದಿ, ಕೇಂದ್ರ ಸಚಿವ ಅಮಿತ್ ಶಾ, ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ.ನಡ್ಡಾ, ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ, ಕಾಂಗ್ರೆಸ್ ನಾಯಕರಾದ ರಾಹುಲ್ ಗಾಂಧಿ, ಪ್ರಿಯಾಂಕಾ ಗಾಂಧಿ, ಮಲ್ಲಿಕಾರ್ಜುನ ರ್ಖಗೆ, ಡಿ.ಕೆ.ಶಿವಕುಮಾರ್, ಜೆಡಿಎಸ್ ವರಿಷ್ಠ ಎಚ್.ಡಿ.ದೇವೇಗೌಡ, ಮಾಜಿ ಮುಖ್ಯಮಂತ್ರಿಗಳಾದ ಬಿ.ಎಸ್.ಯಡಿಯೂರಪ್ಪ, ಸಿದ್ದರಾಮಯ್ಯ, ಎಚ್.ಡಿ.ಕುಮಾರಸ್ವಾಮಿ, ಆಮ್ ಆದ್ಮಿ ಪಕ್ಷದ ದೆಹಲಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್, ಎಸ್ಪಿ ಮತ್ತು ಬಿಎಸ್ಪಿ ಒಳಗೊಂಡು ಸದ್ಯ ಪ್ರಚಾರದ ಭರಾಟೆಯಲ್ಲಿರುವ ನೆಚ್ಚಿನ ನಾಯಕರ ಮನಗೆಲ್ಲಲು ಅಭಿಮಾನಿಗಳು, ಕಾರ್ಯಕರ್ತರು ಬೃಹತ್ ಹಾರಗಳ ಮೊರೆ ಹೋಗಿದ್ದಾರೆ.
ಮಂಡ್ಯ, ಬೆಂಗಳೂರು, ಮೈಸೂರಿನಲ್ಲೂ ವಿಶೇಷ
ಮಂಡ್ಯ, ಹಾಸನ, ರಾಮನಗರ, ಬೆಂಗಳೂರು, ಮೈಸೂರು, ಚಿತ್ರದುರ್ಗ, ಉತ್ತರ ಕರ್ನಾಟಕ ಭಾಗ ಸೇರಿ ಹಲವೆಡೆ ವಿಶೇಷ ಹಾರಗಳು ತಯಾರಾಗುತ್ತಿವೆ. ಜ್ಯೂಸ್ ಪಾಕೆಟ್, ಹಾಲಿನ ಪೊಟ್ಟಣ, ಕ್ಯಾಪ್ಸಿಕಂ, ತೆನೆ ಹಾರ ಗಮನಸೆಳೆದಿದೆ. ಸ್ವತ@ ಎಚ್.ಡಿ.ಕುಮಾರಸ್ವಾಮಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಇದೇ ರೀತಿ ಯಡಿಯೂರಪ್ಪ, ಸಿದ್ದರಾಮಯ್ಯ ಕೂಡ ಅಭಿಮಾನಿಗಳ ಅಭಿಮಾನಕ್ಕೆ ಮನಸೋತಿದ್ದಾರೆ.
ಇದನ್ನೂ ಓದಿ: ಕಾಂಗ್ರೆಸ್ ಪಕ್ಷವನ್ನು ಈ ಬಾರಿ ಮನೆಗೆ ಕಳಿಸುವುದು ಗ್ಯಾರಂಟಿ: ಸಿಎಂ ಬೊಮ್ಮಾಯಿ ವಾಗ್ದಾಳಿ
ಹೂ ಬೆಳೆಗಾರರಿಗೂ ಅನುಕೂಲ
ರಾಜ್ಯದಲ್ಲಿ 5 ಸಾವಿರ ರೂ.ನಿಂದ 30 ಸಾವಿರ ರೂ.ವರೆಗಿನ ಹೂವಿನ ಹಾರಗಳನ್ನು ಬೇಡಿಕೆ ಅನುಸಾರ ತಯಾರಿಸಲಾಗುತ್ತಿದ್ದು, ಇದರಿಂದಾಗಿ ನೂರಾರು ಹೂ ಬೆಳೆಗಾರರ ಮೊಗದಲ್ಲಿಯೂ ಒಂದಷ್ಟು ಮಂದಹಾಸ ಚುನಾವಣೆ ಕಾರಣಕ್ಕೆ ಬೀರಿದೆ. ಬಿಸಿಲು ಹೆಚ್ಚಳದಿಂದಾಗಿ ಈ ಬಾರಿ ಇಳುವರಿ ಕುಂಠಿತವಾಗಿದ್ದು, ಇದು ಪುಷ್ಪದರ ಹೆಚ್ಚಳಕ್ಕೂ ಕಾರಣವಾಗಿದೆ ಎನ್ನುತ್ತಾರೆ ಹೂ ಬೆಳೆಗಾರರಾದ ಬೆಂಗಳೂರಿನ ಮಂಜಪ್ಪ, ಚಿತ್ರದುರ್ಗದ ಶ್ರೀನಿವಾಸ್.
ಬೇಡಿಕೆಯಂತೆ 10 ಸಾವಿರ ರೂ.ನಿಂದ 30 ಸಾವಿರ ರೂ.ವರೆಗೂ ತಯಾರಿಸಿ ಬಳ್ಳಾರಿ, ದಾವಣಗೆರೆ, ವಿಜಯನಗರ ಜಿಲ್ಲೆಗೂ ಕಳುಹಿಸಿದ್ದೇವೆ. ಹಾರದ ಚಿತ್ರ ತೋರಿಸಿದರೆ ಅದರಂತೆ ಸಿದ್ಧಪಡಿಸಿ ಕೊಡುತ್ತೇವೆ.
> ಕುಮಾರಣ್ಣ, ಶ್ರುತಿ ಫ್ಲವರ್ ಸ್ಟಾಲ್, ಚಿತ್ರದುರ್ಗ