ಲಖನೌ: ಆನ್ಲೈನ್, ಆಫ್ಲೈನ್ನಲ್ಲಿ ವಸ್ತುಗಳನ್ನು ಖರೀದಿಸುವ ವೇಳೆ ವಂಚಕರ ಬಗ್ಗೆ ಎಚ್ಚರದಿಂದಿರಿ ಎಂದು ಪೊಲೀಸ್ ಇಲಾಖೆ ಹಾಗೂ ಸರ್ಕಾರಗಳು ಜನರನ್ನು ಎಚ್ಚರಿಕೆ ನೀಡುತ್ತಿರುತ್ತವೆ.
ಆದರೆ ಇಲ್ಲಿ ಆರೋಪಿಗಳು ಬೆರಳಿನ ಅಚ್ಚನ್ನು ದುರ್ಬಳಕೆ ಮಾಡಿಕೊಂಡು ಕೋಟ್ಯಂತರ ರೂಪಾಯಿ ದೋಚಿರುವ ಆಘಾತಕಾರಿ ಘಟನೆ ಉತ್ತರಪ್ರದೇಶದ ಭದೋಹಿ ಜಿಲ್ಲೆಯಲ್ಲಿ ನಡೆದಿದೆ.
ಉತ್ತರಪ್ರದೇಶ ಪೊಲೀಸರು ಹಾಗೂ ಸೈಬರ್ ಸೆಲ್ನವರು ನಡೆಸಿದ ಜಂಟಿ ಕಾರ್ಯಾಚರಣೆಯಲ್ಲಿ ಪ್ರಕರಣ ಬೆಳಕಿಗೆ ಬಂದಿದ್ದು ಆರೋಪಿಗಳಿಗೆ ಖೆಡ್ಡಾ ತೋಡುವಲ್ಲಿ ಅಧಿಕಾರಿಗಳು ಯಶಸ್ವಿಯಾಗಿದ್ದಾರೆ.
ಇಬ್ಬರ ಬಂಧನ
ಘಟನೆ ಸಂಬಂಧ ರಿಷಿ ರಾಜ್ ಸಿಂಗ್ ಹಾಗೂ ರೋಹಿತ್ ಕುಮಾರ್ ಎಂಬುವವರನ್ನು ಪೊಲೀಸರು ಬಂಧಿಸಿದ್ದು ಆರೋಪಿಗಳ ಬಳಿ ಇದ್ದ 194 ಬೆರಳಚ್ಚು ಪ್ರತಿಗಳನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ರಾಜೇಶ್ ಭಾರತಿ ತಿಳಿಸಿದ್ದಾರೆ.
ತಮ್ಮ ಬ್ಯಾಂಕ್ ಖಾತೆಯಿಂದ ಹಣ ಕಳೆದುಕೊಂಡಿರುವ ಬಗ್ಗೆ ಮಿಶ್ರಿಲಾಲ್ ಹಾಗೂ ಬಿಂದು ಸಿಂಗ್ ಎಂಬುವವರು ದೂರು ದಾಖಲಿಸಿದ್ದರು. ಈ ಕುರಿತು ತನಿಖೆ ನಡೆಸಿದಾಗ ನಕಲಿ ಬೆರಳಚ್ಚುಗಳನ್ನು ಬಳಸಿ ಹಣ ಪಡೆದಿರುವುದು ಬೆಳಕಿಗೆ ಬಂದಿದೆ.
ಇದನ್ನೂ ಓದಿ: ಪೊಲೀಸರ ಹೆಸರಿನಲ್ಲಿ ಬಹುಕೋಟಿ ರೂಪಾಯಿ ವಂಚನೆ; ಆರೋಪಿ ಬಂಧನ
ಬೆರಳಚ್ಚು ನಕಲು
ಬಂಧಿತ ಆರೋಪಿಗಳು ಆಧಾರ್ ಆಧಾರಿತ ಪೇಮೆಂಟ್ ವ್ಯವಸ್ಥೆಗಳನ್ನು ನಕಲಿ ಬಯೋಮೆಟ್ರಿಕ್ ಹೆಬ್ಬೆರಳಿನ ನಕಲಿ ಗುರುತುಗಳಿಂದ ಹಣ ಪಡೆಯುತ್ತಿದ್ದರು.
ಆರೋಪಿಗಳು ನಕಲಿ ಬೆರಳಚ್ಚುಗಳನ್ನು ತಯಾರಿಸಲು ವಿವಿಧ ವೆಬ್ಸೈಟ್ಗಳಿಂದ ಬಟರ್ ಪೇಪರ್ ಮೇಲೆ ಗುರುತನ್ನು ನಕಲು ಮಾಡಿ ಹಣ ದೋಚುತ್ತಿದ್ದರು ಎಂದು ಮಾಹಿತಿ ನೀಡಿದ್ದಾರೆ.
ಯೂಟ್ಯೂಬ್ ಮೂಲಕ ಕಲಿಕೆ
ಆರೋಪಿಗಳು ಹೆಬ್ಬರಳ ಕ್ಲೋನಿಂಗ್ಅನ್ನು ಯೂಟ್ಯೂಬ್ ಮೂಲಕ ಕಲಿತ್ತಿದ್ದಾರೆ. ಅನೇಕ ಚಾನೆಲ್ಗಳು ಈ ರೀತಿಯ ಮಾಹಿತಿ ನೀಡುವುದರಿಂದ ಸೈಬರ್ ಕಳ್ಳರ ಹಾವಳಿ ಹೆಚ್ಚಾಗಿದೆ. ಸರ್ಕಾರ ಈ ರೀತಿಯ ಚಾನೆಲ್ಗಳನ್ನು ನಿಷೇಧಿಸಬೇಕು ಎಂದು ಆಗ್ರಹಿಸಿದ್ದಾರೆ.
ಬಂಧಿತ ಆರೋಪಿಗಳಿಂದ ಪಾಲಿ ಸ್ಟ್ಯಾಂಪರ್ ಮೆಷಿನ್, ಪ್ರಿಂಟರ್, ಬಯೋಮೆಟ್ರಿಕ್ ಡಿವೈಸ್, ಒಟಿಜಿ, ಎಂಓಪಿಎಸ್, 5 ಎಟಿಎಮ್ ಕಾರ್ಡ್ಗಳು, 3 ಮೊಬೈಲ್ ಫೋನ್ಗಳನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ರಾಜೇಶ್ ಭಾರತಿ ಮಾಹಿತಿ ನೀಡಿದ್ದಾರೆ.