ವುಹಾನ್: ಕರೊನಾ ವೈರಸ್ ಕಾರಣದಿಂದಾಗಿ ಚೀನಾ ಮತ್ತು ಚೀನಾ ಜನತೆ ಜಾಗತಿಕವಾಗಿ ಭಾರಿ ಟೀಕೆಗೆ ಗುರಿಯಾಗಿದ್ದಾರೆ. ಶೇ. 900ರಷ್ಟು ದ್ವೇಷದ ಮಾತುಗಳು ಚೀನಾ ವಿರುದ್ಧ ಟ್ವಿಟರ್ನಲ್ಲಿ ಹರಿಡಾಡಿವೆ ಎಂಬುದು ಹೊಸ ವರದಿಯೊಂದು ಬಹಿರಂಗಪಡಿಸಿದೆ.
ಆನ್ಲೈನ್ ದ್ವೇಷಪೂರಿತ ಮಾತುಗಳನ್ನು ಅಳೆಯುವುದರಲ್ಲಿ ಪರಿಣಿತಿ ಹೊಂದಿರುವ L1ght ಹೆಸರಿನ ಕಂಪನಿ ಟ್ವಿಟರ್ನಲ್ಲಿ ಚೀನಾ ವಿರುದ್ಧ ಹೆಚ್ಚಾಗಿ ಹರಿದಾಡಿದ ಹ್ಯಾಷ್ಟ್ಯಾಗ್ಗಳನ್ನು ಪಟ್ಟಿ ಮಾಡಿದೆ. ಅವುಗಳಲ್ಲಿ #Kungflu (ಕುಂಗ್ಫ್ಲೂ), #chinesevirus (ಚೀನಾ ವೈರಸ್) ಮತ್ತು #communistvirus (ಕಮ್ಯೂನಿಸ್ಟ್ ವೈರಸ್) ಹ್ಯಾಷ್ಟ್ಯಾಗ್ಗಳು ಪ್ರಸಿದ್ಧಿಯಾಗಿವೆ.
L1ght ಕಂಪನಿಯು ಲಕ್ಷಾಂತರ ವೆಬ್ಸೈಟ್, ಸಾಮಾಜಿಕ ಜಾಲತಾಣ, ಚಾಟಿಂಗ್ ವೇದಿಕೆ ಮತ್ತು ಗೇಮಿಂಗ್ ಸೈಟ್ಗಳ ಕಳೆದ ಡಿಸೆಂಬರ್ನಿಂದ ಈವರೆಗಿನ ಮಾಹಿತಿಯನ್ನು ಕಲೆಹಾಕಿ ವಿಶ್ಲೇಷಿಸಿದೆ. ಸಾಕಷ್ಟು ಫೋಟೋಗಳು, ವಿಡಿಯೋ ಮತ್ತು ವಾಯ್ಸ್ ರೆಕಾರ್ಡಿಂಗ್ಸ್ಗಳನ್ನು ಸಂಗ್ರಹಿಸಿದ್ದು, ಇವೆಲ್ಲವೂ ಚೀನಾ ವಿರುದ್ಧದ ದ್ವೇಷದ ಮಾತುಗಳು ಹೆಚ್ಚಾಗಿವೆ ಎಂಬುದಕ್ಕೆ ಆಧಾರವಾಗಿವೆ.
ಕಳೆದ ಡಿಸೆಂಬರ್ನಲ್ಲಿ ಚೀನಾದ ಹುಬೇ ಪ್ರಾಂತ್ಯದ ವುಹಾನ್ ನಗರದಲ್ಲಿ ಕರೊನಾ ವೈರಸ್ ಸ್ಪೋಟಗೊಂಡಿತು. ಅಲ್ಲಿನ ಪ್ರಾಣಿ ಮಾರುಕಟ್ಟೆಯಿಂದ ಹರಡಿತು ಎಂದು ಹೇಳಲಾಗಿದೆ. ಇದೀಗ ವೈರಸ್ ಜಾಗತಿಕವಾಗಿ ಹರಡಿದ್ದು 27 ಸಾವಿರಕ್ಕೂ ಹೆಚ್ಚು ಮಂದಿಯನ್ನು ಆಹುತಿ ಪಡೆದಿದೆ.
ಮಹಾಮಾರಿ ಕರೊನಾ ವೈರಸ್ ಮಟ್ಟಹಾಕಲು ಜಾಗತಿಕವಾಗಿ ಲಾಕ್ಡೌನ್ ಹೇರಲಾಗಿದ್ದು, ಜನ-ಜೀವನ ಮಾತ್ರವಲ್ಲದೇ ಆರ್ಥಿಕತೆಯ ಮೇಲೂ ಕರೊನಾ ಕೆಂಗಣ್ಣು ಬೀರಿದೆ. ಈ ಲಾಕ್ಡೌನ್ ಸಮಯದಲ್ಲಿ ಹೆಚ್ಚಿನ ಜನರು ಸಾಮಾಜಿಕ ಜಾಲತಾಣ ವೇದಿಕೆಗಳಲ್ಲಿ ಕಳೆಯುತ್ತಿದ್ದು, ಚೀನಾ ಮತ್ತು ಚೀನಾ ಜನತೆಯನ್ನು ಮನಬಂದತೆ ಟೀಕಿಸುತ್ತಿದ್ದಾರೆ. ವಿಶೇಷವಾಗಿ ಚೀನಾದ ಜನಸಂಖ್ಯೆ ಮತ್ತು ಅವರ ಆಹಾರ ಹವ್ಯಾಸ ವಿರುದ್ಧ ಜಗತ್ತಿನ ಜನರು ವಾಗ್ದಾಳಿ ನಡೆಸಿದ್ದಾರೆ. (ಏಜೆನ್ಸೀಸ್)
ಕಿಲ್ಲರ್ ಕರೊನಾ ವಿರುದ್ಧದ ಹೋರಾಟಕ್ಕೆ ಉದ್ಯಮಿ ರತನ್ ಟಾಟಾರಿಂದ 500 ಕೋಟಿ ರೂ. ನೆರವು ಘೋಷಣೆ