ಬೀಜಿಂಗ್: ಚೀನಾದಲ್ಲಿ ಮೃತ್ಯುಕೂಪ ಸೃಷ್ಟಿಸಿರುವ ಕೊರೊನಾ ವೈರಸ್ ತನ್ನ ಅಟ್ಟಹಾಸವನ್ನು ಮುಂದುವರಿಸಿದ್ದು, ಸಾವಿನ ಸಂಖ್ಯೆ ಮತ್ತಷ್ಟು ಹೆಚ್ಚಾಗಿದೆ. ವೈರಸ್ ಹೆಚ್ಚಾಗಿ ಹರಡಿರುವ ಹುಬೇ ಪ್ರಾಂತ್ಯದಲ್ಲಿ 81 ಹೊಸ ಸಾವಿನ ಪ್ರಕರಣಗಳು ದಾಖಲಾಗುವ ಮೂಲಕ ಭಾನುವಾರದ ಆರಂಭದ ಹೊತ್ತಿಗೆ ಒಟ್ಟು ಮೃತರ ಸಂಖ್ಯೆ 803ಕ್ಕೆ ಏರಿದ್ದು, ಮತ್ತಷ್ಟು ಹೆಚ್ಚಾಗುವ ಸಂಭವವಿದೆ.
ಈ ಹಿಂದೆ ತೀವ್ರ ಉಸಿರಾಟದ ತೊಂದರೆಯ ಸಾರ್ಸ್(ಸಿವಿಯರ್ ಅಕ್ಯೂಟ್ ರೆಸ್ಪಿರೇಟರಿ ಸಿಂಡ್ರೋಮ್) ವೈರಸ್ ಸೋಂಕಿನಿಂದ ಜಾಗತಿಕ ಮಟ್ಟದಲ್ಲಿ ಉಂಟಾಗಿದ್ದ ಸಾವಿನ ಸಂಖ್ಯೆಯನ್ನು ಕೊರೊನಾ ವೈರಸ್ ಮೀರಿಸಿದೆ. 2002-2003ರಲ್ಲಿ ಸಾರ್ಸ್ನಿಂದ 774 ಮಂದಿ ಸಾವಿಗೀಡಾಗಿದ್ದರು. ಇದೀಗ ಕೊರೊನಾ ದಾಳಿಯಿಂದ 803 ಮಂದಿ ಮೃತರಾಗಿದ್ದು, ಮತ್ತಷ್ಟು ಬಲಿಪಶುಗಳಾಗುವ ಸಾಧ್ಯತೆ ಇದೆ ಎಂದು ಹೇಳಲಾಗಿದೆ.
ಕೇಂದ್ರೀ ಪ್ರಾಂತ್ಯ ಹುಬೇನಲ್ಲಿ 2,147 ಹೊಸ ಕೊರೊನಾ ವೈರಸ್ ಸೋಂಕು ಪ್ರಕರಣಗಳು ಪತ್ತೆಯಾಗಿರುವುದಾಗಿ ಹುಬೇ ಆರೋಗ್ಯ ಸಚಿವಾಲಯವು ಮಾಹಿತಿ ಖಚಿತಪಡಿಸಿದೆ. ಕಳೆದ ಡಿಸೆಂಬರ್ನಲ್ಲಿ ಕೊರೊನಾ ವೈರಸ್ ಹರಡಲು ಆರಂಭಿಸಿತು. ಸದ್ಯ ಚೀನಾದ್ಯಂತ 36,690ಕ್ಕೂ ಹೆಚ್ಚು ಸೋಂಕು ತಗುಲಿರುವ ಪ್ರಕರಣಗಳು ದಾಖಲಾಗಿದವೆ.
ಹುಬೇ ರಾಜಧಾನಿ ವುಹಾನ್ನಲ್ಲಿನ ಜೀವಂತ ಕಾಡು ಪ್ರಾಣಿ ಮಾರಾಟ ಮಾರುಕಟ್ಟೆಯಲ್ಲಿ ಕೊರೊನಾ ವೈರಸ್ ಉದಯಿಸಿತು ಎಂದು ನಂಬಲಾಗಿದೆ. ಇಲ್ಲಿ ಸ್ಫೋಟಗೊಂಡ ವೈರಸ್ ಇದೀಗ ಚೀನಾದೆಲ್ಲಡೆ ಹರಡಿದ್ದು, ಜಗತ್ತಿನ ಕೆಲ ದೇಶಗಳಿಗೂ ಹಬ್ಬಿದೆ. ಹೀಗಾಗಿ ಕೊರೊನಾ ವೈರಸ್ ಜಾಗತಿಕ ಮಟ್ಟದಲ್ಲಿ ಭೀತಿ ಸೃಷ್ಟಿಸಿದೆ. (ಏಜೆನ್ಸೀಸ್)