ಮುಂಬೈ: ಕ್ರಿಕೆಟ್ ಮತ್ತು ದೇಶಪ್ರೇಮ ಎರಡನ್ನೂ ಮೇಳೈಸಿರುವ ರಣವೀರ್ ಸಿಂಗ್ರ ಹೊಸ ಚಿತ್ರ ’83’ ಬಿಡುಗಡೆಗೆ ಸಿದ್ಧವಾಗುತ್ತಿದ್ದು, ಅದರ ಟ್ರೈಲರ್ ಅಭಿಮಾನಿಗಳ ಮನ ಗೆದ್ದಿದೆ. ಇದೀಗ ಈ ಚಿತ್ರ ಮತ್ತೊಂದು ರೀತಿಯಲ್ಲಿ ಸುದ್ದಿ ಮಾಡುತ್ತಿದೆ. ಅದೆಂದರೆ ಯುಎಇ ಮೂಲದ ಫೈನಾನ್ಸರ್ ಒಬ್ಬರು 83 ಚಿತ್ರ ನಿರ್ಮಾಪಕರ ವಿರುದ್ಧ ವಂಚನೆಯ ಆರೋಪ ಮಾಡಿರುವುದು.
ಮುಂಬೈನ ಅಂಧೇರಿ ಮೆಟ್ರೊಪೊಲಿಟನ್ ಮ್ಯಾಜಿಸ್ಟ್ರೇಟ್ ಕೋರ್ಟಿನಲ್ಲಿ 83ರ ಎಲ್ಲಾ ನಿರ್ಮಾಪಕರ ವಿರುದ್ಧ ಫ್ಯೂಚರ್ ರಿಸೋರ್ಸ್ನ ಕಂಪೆನಿಯ ಮಾಲಿಕರು ವಂಚನೆ ಮತ್ತು ಅಪರಾಧಿಕ ಸಂಚಿನ ದೂರು ದಾಖಲಿಸಿದ್ದಾರೆ. ತಮ್ಮ ಕಂಪೆನಿ 83 ಚಿತ್ರದ ನಿರ್ಮಾಣ ಸಂಸ್ಥೆ ವಿಬ್ರಿ ಮೀಡಿಯಾದಿಂದ ಉತ್ತಮ ರಿಟರ್ನ್ಸ್ನ ವಾಯ್ದೆಯ ಮೇರೆಗೆ ಚಿತ್ರದಲ್ಲಿ 15.60 ಕೋಟಿ ರೂ.ಗಳನ್ನು ಹೂಡಿದೆ. ಆದರೆ ಈವರೆಗೆ ತಮಗೆ ಹೇಳಿದಂತೆ ಯಾವುದೇ ಮೊತ್ತ ನೀಡಿಲ್ಲ. ಚಿತ್ರ ನಿರ್ಮಾಣದ ಕಾರ್ಯವನ್ನು ವಿಳಂಬ ಮಾಡಿ, ಬೇರೆ ಬೇರೆ ಕಂಪೆನಿಗಳೊಂದಿಗೆ ಫೈನಾನ್ಸರ್ನ ಅನುಮತಿ ಇಲ್ಲದೆ ಒಪ್ಪಂದ ಮಾಡಿ ಹೆಚ್ಚಿನ ಪ್ರಮಾಣದಲ್ಲಿ ಹಣ ವಿನಿಯೋಗಿಸಲಾಗಿದೆ ಎಂದು ಆರೋಪಿಸಿರುವುದಾಗಿ ದೂರುದಾತ ಫೈನಾನ್ಸರ್ನ ವಕೀಲ ರಿಜ್ವಾನ್ ಸಿದ್ದಿಖಿ ಹೇಳಿದ್ದಾರೆ.
ಇದನ್ನೂ ಓದಿ: VIDEO| ಜೀತೇಗಾ.. ಇಂಡಿಯಾ ಜೀತೇಗಾ! ’83’ ಟ್ರೇಲರ್ ಬಿಡುಗಡೆ
ಚಿತ್ರದ ನಿರ್ಮಾಪಕರಾದ ಕಬೀರ್ ಖಾನ್, ಸಾಜಿದ್ ನಾಡಿಡ್ವಾಲ, ನಟಿ ದೀಪಿಕಾ ಪಡುಕೋಣೆ ಹಾಗೂ ಇನ್ನಿಬ್ಬರನ್ನು ಈ ಪ್ರಕರಣದಲ್ಲಿ ಹೆಸರಿಸಲಾಗಿದೆ. ಈ ಕಾನೂನು ಸಂಕಷ್ಟವು ಬಹುಅಪೇಕ್ಷಿತ ಕ್ರೀಡಾ ವಿಷಯದ ಸಿನಿಮಾ ’83’ ಚಿತ್ರದ ಬಿಡುಗಡೆಗೆ ಅಥವಾ ಅದರ ನಿರ್ಮಾಪಕರಿಗೆ ವೈಯಕ್ತಿಕವಾಗಿ ಯಾವ ರೀತಿ ತೊಂದರೆ ಮಾಡಬಹುದೆಂದು ಕಾದುನೋಡಬೇಕಿದೆ. (ಏಜೆನ್ಸೀಸ್)
ಶಾಲೆಗಳಲ್ಲಿ ಮೊಟ್ಟೆ ವಿತರಣೆಗೆ ಪೇಜಾವರ ಶ್ರೀಗಳ ತೀವ್ರ ವಿರೋಧ: ಇದು ಜೀವನಶೈಲಿ ಬದಲಿಸುವ ಕೃತ್ಯ ಎಂದ ಸ್ವಾಮೀಜಿ