ನವದೆಹಲಿ: ಮದುವೆ, ಮುಂಜಿಯಂಥ ಶುಭ ಕಾರ್ಯಗಳಿಗೆ ಸದ್ಯಕ್ಕಂತೂ ಅವಕಾಶವಿಲ್ಲ. ಮದುವೆ ದಿನ ಗುರುತು ಮಾಡಿಕೊಂಡಿದ್ದವರೆಇಗೆ ಮುಂದೂಡದೇ ವಿಧಿಯಲ್ಲ ಅಥವಾ ಹತ್ತಾರು ಜನರೆದುರು ಮದುವೆ ಶಾಸ್ತ್ರ ಮುಗಿಸಿಕೊಳ್ಳಬೇಕಷ್ಟೇ.
ಇದು ಮದುಮಗಳು- ಮದುಮಗ ಒಟ್ಟಿಗೆ ಇದ್ದಾಗ ಓಕೆ ಎನ್ನೋಣ. ಇಬ್ಬರೂ ಸಾವಿರಾರು ಕಿ.ಮೀ. ದೂರದಲ್ಲಿದ್ದರೆ, ಮೊಬೈಲ್ನಲ್ಲಿ ಹುಡುಗಿ ವಿಡಿಯೋ ನೋಡಿಯೋ ಅಥವಾ ವಿಡಿಯೋ ಕಾಲ್ ಮಾಡಿಯೋ ತಾಳಿ ಕಟ್ಟಿದ್ರಾಯ್ತು….!!!
ಹೌದು… ಇದನ್ನು ಲಾಕ್ಡೌನ್ ಸಮಯದ ಮದುವೆ ಎನ್ನಲಾಗುತ್ತಿದೆ…. ಇಂಥ ಹಲವಾರು ಮದುವೆಗಳು ಈಗಾಗಲೇ ವಿಶ್ವಾದ್ಯಂತ ನಡೆದಿವೆ. ಅಮೆರಿಕದಲ್ಲಂತೂ ಇಂಟರ್ನೆಟ್ ಮದುವೆಗೆ ಮಾನ್ಯತೆ ಇದೆ. ಅಂಥದ್ದೇ ಮದುವೆಗೆ ಇದೊಂದು ಉದಾಹರಣೆ.
ಜನವರಿಯಲ್ಲಿ ನಿಶ್ಚಯವಾಗಿದ್ದ ಮದುವೆಯದು. ಆದರೆ, ಅದ್ಯಾವುದೋ ಕಾರಣದಿಂದ ಏಪ್ರಿಲ್ 26ಕ್ಕೆ ಮುಂದೂಡಿದರು. ಆದರೆ, ಮದುವೆಯ ದಿನ ಹತ್ತಿರ ಬರುತ್ತಿದ್ದಂತೆ ತಾವೆಂಥ ತಪ್ಪು ಮಾಡಿದ್ದೇವೆಂಬುದು ಅವರಿಗೆ ಅರ್ಥವಾಗತೊಡಗಿತು.
ಮೊದಲ ಹಂತದ ಲಾಕ್ಡೌನ್ ಮುಗಿಯುತ್ತಿದ್ದಂತೆ ಸಿದ್ಧತೆಗಳನ್ನು ಜೋರಾಗಿ ನಡೆಸಿದರೆ ಅಂತಹ ಸಂಕಷ್ಟ ಎದುರಾಗಲಿಕ್ಕಿಲ್ಲ ಎಂದೇ ಅವರಂದುಕೊಂಡಿದ್ದರು. ಆದರೆ, ಮೇ 3ರವರೆಗೆ ಲಾಕ್ಡೌನ್ ಅವಧಿ ವಿಸ್ತರಣೆಯಾಗಿದ್ದು ಘೋಷಣೆಯಾಗುತ್ತಿದ್ದಂತೆ ಮದುವೆಯ ಆಸೆಯನ್ನೇ ಕೈ ಬಿಟ್ಟಿತ್ತು ಆ ಜೋಡಿ.
ಉತ್ತರಪ್ರದೇಶದ ಐಟಿ ಉದ್ಯೋಗಿ 28 ವರ್ಷದ ಪಿ. ಅಂಜನಾ ಹಾಗೂ ಕೇರಳದ ಕೊಟ್ಟಾಯಂನ 30 ವರ್ಷದ ಶ್ರೀಜಿತ್ ನದೇಸನ್ ಜೋಡಿ ಏ.26ರಂದು ಹಸೆಮಣೆ ಏರಬೇಕಿತ್ತು. ಲಾಕ್ಡೌನ್ ಕಾರಣದಿಂದಾಗಿ ಲಕ್ನೋದಿಂದ ಕೇರಳಕ್ಕೆ ಬರಲು ವಧುವಿಗೆ ಸಾಧ್ಯವಾಗಲಿಲ್ಲ. ಆದರೆ, ಇಬ್ಬರೂ ಟೆಕ್ಕಿಗಳಾಗಿದ್ದರಿಂದ ಟೆಕ್ನಾಲಜಿ ಮೂಲಕವೇ ಮದುವೆಯಾಗಲು ನಿರ್ಧರಿಸಿದರು. ಇದಕ್ಕಾಗಿ ವಿಡಿಯೋ ಕಾಲಿಂಗ್ ಆ್ಯಪ್ ಬಳಸಿದರು.
ಮೂರು ನಿಮಿಷಗಳ ವಿಡಿಯೋ ಈಗ ಆನ್ಲೈನ್ನಲ್ಲಿ ವೈರಲ್ ಆಗಿದೆ. ರೇಷ್ಮೇ ಸೀರೆ, ಬಂಗಾರದೊಡವೆ ಧರಿಸಿ ಮೊಬೈಲ್ ಎದುರು ವಧು ಕುಳಿತಿದ್ದಾಳೆ. ಇತ್ತ ಕಡೆಯಲ್ಲಿ ವಧು ಕಾಣುತ್ತಿದ್ದ ಮೊಬೈಲ್ಗೆ ತಾಳಿ ಕಟ್ಟುತ್ತಾನೆ ವರ. ಇದೇ ವೇಳೆ ಅತ್ತ ವಧು ಮನೆಯವರ ಸಹಾಯದಿಂದ ತನ್ನ ಕುತ್ತಿಗೆಗೆ ತಾಳಿ ಕಟ್ಟಿಸಿಕೊಳ್ಳುತ್ತಾಳೆ. ಅಲ್ಲಿಗೆ ಮದುವೆ ಪರಿಸಮಾಪ್ತಿಯಾಯ್ತು. ಆದರೆ, ಭೂರಿ ಭೋಜನವಾಗಬೇಕಲ್ಲ, ಲಾಕ್ಡೌನ್ ಮುಗೀಲಿ ಪಾರ್ಟಿ ಕೊಡಿಸ್ತೀವಿ ಅಂತಾ ವಧು-ವರರಿಬ್ಬರೂ ಒಪ್ಪಿಕೊಂಡಿದ್ದಾರಂತೆ.
ಕರೊನಾ ವಿರುದ್ಧದ ಹೋರಾಟಕ್ಕೆ ಈ ಅಸ್ತ್ರ ಬಳಸಿ; ಸರ್ಕಾರಿ ನೌಕರರಿಗೆ ಕೇಂದ್ರದಿಂದಲೇ ಬಂತು ಸೂಚನೆ