ನವದೆಹಲಿ: ಇತ್ತೀಚೆಗೆ ಮಕ್ಕಳಲ್ಲಿ ಜನಪ್ರಿಯವಾಗಿರುವ ಆನ್ಲೈನ್ ಗೇಮಿಂಗ್ನ ವಿಧವಿಧವಾದ ದುಷ್ಪರಿಣಾಮಗಳ ಬಗ್ಗೆ ಪಾಲಕರು ಎಚ್ಚರಿಕೆ ವಹಿಸಬೇಕೆಂದು ಭಾರತ ಸರ್ಕಾರ ಹೇಳಿದೆ. ಗೇಮಿಂಗ್ ಎಂಬುದು ಚಟವಾಗಿ ಬೆಳೆಯದಂತೆ, ಮಕ್ಕಳ ಶಾಲಾ ಕಲಿಕೆ ಮತ್ತು ಸಾಮಾಜಿಕ ಜೀವನವನ್ನು ಹಾಳುಮಾಡದಂತೆ ತೆಗೆದುಕೊಳ್ಳಬೇಕಾದ ಕೆಲವು ಕ್ರಮಗಳನ್ನು ಸರ್ಕಾರ ಪ್ರಕಟಿಸಿದೆ.
ಕರೊನಾದಿಂದ ಆರಂಭವಾದ ಆನ್ಲೈನ್ ಕ್ಲಾಸ್ಗಳ ಹಿನ್ನೆಲೆಯಲ್ಲಿ ಇಂಟರ್ನೆಟ್ ಮತ್ತು ಗ್ಯಾಜೆಟ್ಗಳ ಮೇಲೆ ಮಕ್ಕಳು ಹೆಚ್ಚಿನ ಹಿಡಿತ ಹೊಂದಿದ್ದಾರೆ. ಇದರಿಂದ ಆನ್ಲೈನ್ ಗೇಮಿಂಗ್ ಕೂಡ ಹೆಚ್ಚಾಗಿದೆ. ಆದರೆ, ಈ ಆಟಗಳನ್ನು ಆಡುವುದು ಒಂದು ಗಂಭೀರವಾದ ಕೆಟ್ಟ ಅಭ್ಯಾಸವಾಗಿ ಬೆಳೆದು ‘ಗೇಮಿಂಗ್ ಡಿಸಾರ್ಡರ್’ ಎನ್ನುವ ಆರೋಗ್ಯ ಸಮಸ್ಯೆಗೆ ಕಾರಣವಾಗಬಹುದು. ಈ ನಿಟ್ಟಿನಲ್ಲಿ ಮಕ್ಕಳಲ್ಲಿ ಮಾನಸಿಕ ಮತ್ತು ದೈಹಿಕ ಒತ್ತಡಗಳನ್ನು ಉಂಟುಮಾಡಬಲ್ಲ ಆನ್ಲೈನ್ ಗೇಮಿಂಗ್ನ ದುಷ್ಪರಿಣಾಮಗಳನ್ನು ತಡೆಯಲು ಪಾಲಕರಿಗೆ ಮತ್ತು ಶಿಕ್ಷಕರಿಗೆ ಸರ್ಕಾರ ಹಲವು ಸಲಹೆಗಳನ್ನು ನೀಡಿದೆ. ಏನು ಮಾಡಬೇಕು, ಏನು ಮಾಡಬಾರದು ಎಂಬ ಪಟ್ಟಿ ನೀಡಿರುವ ಈ ಅಡ್ವೈಸರಿಯನ್ನು ಎಲ್ಲರಿಗೂ ತಲುಪುವಂತೆ ಪ್ರಚಾರ ಮಾಡಿ ಎಂದೂ ಹೇಳಿದೆ.
ಇದನ್ನೂ ಓದಿ: ದುಬೈನಲ್ಲಿ ಕಳವಾಗಿದ್ದ ಫುಟ್ಬಾಲ್ ದಂತಕಥೆ ಡಿಯಾಗೋ ಮರಡೋನಾ ವಾಚ್ ಅಸ್ಸಾಂನಲ್ಲಿ ಪತ್ತೆ! ಓರ್ವನ ಬಂಧನ
ಆರ್ಥಿಕ ಅಪಾಯ: ಪಾಲಕರು ಮನೆಯಲ್ಲಿ ಮಕ್ಕಳು ಇಂಟರ್ನೆಟ್ನಲ್ಲಿ ಹೆಚ್ಚು ಕಾಲ ಕಳೆಯದಂತೆ ನಿಗಾ ಇಡುವುದರೊಂದಿಗೆ, ಮಕ್ಕಳಲ್ಲಿ ಓದಿನಲ್ಲಿ ಆಸಕ್ತಿ ಕಡಿಮೆಯಾಗುವುದು ಇಲ್ಲವೇ ಮಾರ್ಕ್ಸ್ ಕಡಿಮೆ ಬರುವುದು ಮುಂತಾದ ಲಕ್ಷಣಗಳ ಬಗ್ಗೆ ಶಿಕ್ಷಕರೂ ಎಚ್ಚರದಿಂದಿರಬೇಕು ಎಂದು ಹೇಳಿದೆ. ಜೊತೆಗೆ, ಗೇಮಿಂಗ್ ಕಂಪೆನಿಗಳು ಮಕ್ಕಳನ್ನು ಹೆಚ್ಚು ಲೆವೆಲ್ಗಳನ್ನು ಕೊಳ್ಳುವಂತೆ ಇನ್-ಆ್ಯಪ್ ಪರ್ಚೇಸ್ಗಳನ್ನು ಮಾಡುವಂತೆ ಬಲವಂತ ಮಾಡುವುದೂ ಉಂಟು. ಹೀಗಾಗಿ ನಿಮ್ಮ ಕ್ರೆಡಿಟ್ ಅಥವಾ ಡೆಬಿಟ್ ಕಾರ್ಡ್ಗಳನ್ನು ಆ್ಯಪ್ಗಳ ಸಬ್ಸ್ಕ್ರಿಪ್ಷನ್ನಿಗೆ, ಗೇಮ್ಗಳ ಪರ್ಚೇಸ್ಗೆ ಬಳಸಬೇಡಿ ಅಥವಾ ಅಪ್ಪರ್ ಲಿಮಿಟ್ ನಿಗದಿಪಡಿಸಿ. ಇನ್ನೂ ಉತ್ತಮವೆಂದರೆ ಇನ್-ಗೇಮ್ ಖರೀದಿಗಳನ್ನು ಪೇರೆಂಟಲ್ ಕನ್ಸೆಂಟ್ ಇಲ್ಲದೆ ಮಾಡದಂತೆ ಸೆಟ್ ಮಾಡಿಬಿಡಿ ಎಂದು ಸರ್ಕಾರ ಹೇಳಿದೆ.
ದುಷ್ಕರ್ಮಿಗಳಿಂದ ಎಚ್ಚರ: ಆನ್ಲೈನ್ ಗೇಮ್ಗಳನ್ನು ಆಡುವಾಗ ಸ್ವಂತ ಹೆಸರು ಕೊಡಬಾರದು. ಬದಲಿಗೆ ಸ್ಕ್ರೀನ್ ನೇಮ್ ಅಥವಾ ಅವತಾರ್ಗಳನ್ನು ಬಳಸಿ ತಮ್ಮ ಗುರುತನ್ನು ಕಾಪಾಡಿಕೊಳ್ಳಬೇಕು. ಮಲ್ಟಿಪ್ಲೇಯರ್ ಗೇಮ್ಗಳಲ್ಲಿ ಯಾವುದಾದರೂ ಆಟಗಾರ ಸಂಪರ್ಕಿಸಲು ಪ್ರಯತ್ನಿಸಿದರೆ ಅಥವಾ ಅಸಂಬದ್ಧ ಪ್ರಶ್ನೆಗಳನ್ನು ಕೇಳಿದರೆ ತಕ್ಷಣ ಅವರನ್ನು ಅನ್ಫ್ರೆಂಡ್ ಅಥವಾ ಬ್ಲಾಕ್ ಮಾಡಬೇಕು. ಆನ್ಲೈನ್ ಮೂಲಕ ದೌರ್ಜನ್ಯ ಎಸಗುವ ಅಥವಾ ಕಿರುಕುಳ ನೀಡುವವರಿಂದ ಮಕ್ಕಳನ್ನು ಸುರಕ್ಷಿತವಾಗಿರಿಸಲು ಅಪರಿಚಿತ ವೆಬ್ಸೈಟ್ಗಳಿಗೆ ಹೋಗದಂತೆ, ಪಾಪ್-ಅಪ್ಗಳಿಗೆ ಪ್ರತಿಕ್ರಿಯಿಸದಂತೆ ಮತ್ತು ಮಕ್ಕಳ ಮೇಲೆ ನಿಗಾ ಇಡುವಂತೆ ಕೂಡ ಸರ್ಕಾರ ಎಚ್ಚರಿಸಿದೆ.
ಮನೆಯಲ್ಲಿ ಎಲ್ಲರೂ ಓಡಾಡುವ ಕಡೆ ಇರಿಸಿದ ಕಂಪ್ಯೂಟರ್ನಲ್ಲಿ ಗೇಮ್ಗಳನ್ನು ಆಡಲು ಜಾಗ ಮಾಡಿ. ಆನ್ಲೈನ್ ಗೇಮ್ಗಳ ಏಜ್ ರೇಟಿಂಗ್ ಅಂದರೆ ಎಷ್ಟು ವಯಸ್ಸಿನ ಮಕ್ಕಳಿಗೆ ಆಡಲು ಸೂಕ್ತ ಎಂಬ ವಿವರವನ್ನು ಪರಿಶೀಲಿಸಿಯೇ ಆಡಲು ಅನುಮತಿ ಕೊಡಿ. ಅನಗತ್ಯ ಗೌಪ್ಯತೆ ಅಥವಾ ಏಕಾಂಗಿತನ ಬಯಸುವುದು, ಮೊಬೈಲ್ ಅಥವಾ ಕಂಪ್ಯೂಟರ್ ಮುಂದೆ ತುಂಬಾ ಸಮಯ ಕಳೆಯುವುದು ಉತ್ತಮ ಲಕ್ಷಣಗಳಲ್ಲ; ಈ ವರ್ತನೆ ಕಂಡರೆ ತಕ್ಷಣ ಸಹಾಯ ಒದಗಿಸಿ ಅಥವಾ ಪಡೆಯಿರಿ ಎಂದು ಸರ್ಕಾರ ವಿವರಿಸಿದೆ.
ಯಾವುದೇ ಅಹಿತಕರ ಘಟನೆಯಾದಲ್ಲಿ ಅಥವಾ ಹೆಚ್ಚಿನ ವಿವರಗಳಿಗೆ, ಈ ರಾಷ್ಟ್ರೀಯ ಹೆಲ್ಪ್ಲೈನ್ ಅನ್ನು ಸಂಪರ್ಕಿಸಬಹುದು –https://cybercrime.gov.in/Webform/Helpline.aspx ಅಥವಾ ರಾಜ್ಯವಾರು ನೋಡಲ್ ಅಧಿಕಾರಿಗಳನ್ನು ಸಂಪರ್ಕಿಸಬಹುದು – https://cybercrime.gov.in/Webform/Crime_NodalGrivanceList.aspx.
ಶಿಕ್ಷಕನ ತಲೆ ಮೇಲೆ ಕಸದಬುಟ್ಟಿ ಹಾಕಿ ಪುಂಡಾಟ ಮೆರೆದಿದ್ದ 6 ವಿದ್ಯಾರ್ಥಿಗಳ ವಿರುದ್ಧ ದಾಖಲಾಯ್ತು ಪೊಲೀಸ್ ಕೇಸ್