ಬೆಂಗಳೂರು: ಕರೊನಾ ಹಾವಳಿಯ ನಡುವೆ ದೇಶದ 6 ನಗರಗಳ ಬಯೋ-ಬಬಲ್ ವಲಯದಲ್ಲಿ ನಡೆಯಲಿರುವ ದೇಶೀಯ ಕ್ರಿಕೆಟ್ ಋತುವಿನ ಮೊದಲ ಟೂರ್ನಿ ಸಯ್ಯದ್ ಮುಷ್ತಾಕ್ ಅಲಿ ಟ್ರೋಫಿಯ ವೇಳಾಪಟ್ಟಿ ಬಿಡುಗಡೆಯಾಗಿದ್ದು, ಹಾಲಿ ಚಾಂಪಿಯನ್ ಕರ್ನಾಟಕ ತಂಡ ಜನವರಿ 10ರಂದು ತನ್ನ ಮೊದಲ ಪಂದ್ಯದಲ್ಲಿ ಜಮ್ಮು-ಕಾಶ್ಮೀರ ತಂಡವನ್ನು ಎದುರಿಸಲಿದೆ.
ಕರ್ನಾಟಕ ತಂಡ ಎ ಗುಂಪಿನಲ್ಲಿದ್ದು, ಎಲ್ಲ ಪಂದ್ಯಗಳು ಬೆಂಗಳೂರಿನಲ್ಲಿ ನಡೆಯಲಿವೆ. ಕರ್ನಾಟಕ ತಂಡ ಜನವರಿ 12ರಂದು ಪಂಜಾಬ್, ಜನವರಿ 14ರಂದು ತ್ರಿಪುರ, ಜನವರಿ 16ರಂದು ರೈಲ್ವೇಸ್ ಮತ್ತು ಜನವರಿ 16ರಂದು ಉತ್ತರ ಪ್ರದೇಶ ವಿರುದ್ಧ ಆಡಲಿದೆ.
ಇದನ್ನೂ ಓದಿ: ಖೇಲೋ ಇಂಡಿಯಾ ಗೇಮ್ಸ್‌ಗೆ ಮಲ್ಲಕಂಬ ಸ್ಪರ್ಧೆ ಸೇರ್ಪಡೆ
ಇತರ ಗುಂಪಿನ ಪಂದ್ಯಗಳು ಮುಂಬೈ, ಚೆನ್ನೈ, ಕೋಲ್ಕತ, ಇಂದೋರ್, ವಡೋದರದಲ್ಲಿ ನಡೆಯಲಿವೆ. ಎಲ್ಲ ತಂಡಗಳು ಜನವರಿ 2ರೊಳಗಾಗಿ ಆತಿಥೇಯ ನಗರದಲ್ಲಿ ಕರೊನಾ ಪರೀಕ್ಷೆ ಮತ್ತು ಆಯಾ ರಾಜ್ಯಗಳ ಕ್ವಾರಂಟೈನ್ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಿ ಬಯೋ-ಬಬಲ್ ವಲಯವನ್ನು ಪ್ರವೇಶಿಸಬೇಕು ಎಂದು ಬಿಸಿಸಿಐ ತಿಳಿಸಿದೆ.
20 ಆಟಗಾರರ ತಂಡ: ಕರೊನಾ ಭೀತಿಯಿಂದಾಗಿ ಎಲ್ಲ ತಂಡಗಳು ಬಯೋ-ಬಬಲ್‌ನಲ್ಲಿ ಇರಬೇಕಾಗಿರುವ ಕಾರಣ ಪ್ರತಿ ತಂಡಕ್ಕೆ ಗರಿಷ್ಠ 20 ಆಟಗಾರರು ಮತ್ತು 10 ತರಬೇತಿ ಸಿಬ್ಬಂದಿಯನ್ನು ಹೊಂದಿರಲು ಅವಕಾಶ ನೀಡಲಾಗಿದೆ. ಕೋವಿಡ್-19 ಸಂಬಂಧಿತ ವಿಷಯಗಳ ಮೇಲ್ವಿಚಾರಣಗಾಗಿಯೇ ಪ್ರತಿ ತಂಡ ಓರ್ವ ಫಿಸಿಯೋನನ್ನು ಹೊಂದಿರಬೇಕೆಂದು ಬಿಸಿಸಿಐ ಸೂಚಿಸಿದೆ.
ಇದನ್ನೂ ಓದಿ: ದ್ರಾವಿಡ್ ಅವರನ್ನು ಕೂಡಲೆ ಆಸ್ಟ್ರೇಲಿಯಾಕ್ಕೆ ಕಳುಹಿಸಿ ಎಂದು ವೆಂಗ್ಸರ್ಕಾರ್ ಹೇಳಿದ್ದೇಕೆ?
3 ಬಾರಿ ಕರೊನಾ ಪರೀಕ್ಷೆ: ಟೂರ್ನಿಯಲ್ಲಿ ಆಡಲಿರುವ ಎಲ್ಲ ಆಟಗಾರರು ಮತ್ತು ತರಬೇತಿ ಸಿಬ್ಬಂದಿ ಜನವರಿ 2, 4 ಮತ್ತು 6ರಂದು 3 ಬಾರಿ ಕೋವಿಡ್-19 ಪರೀಕ್ಷೆಗೆ ಒಳಪಡಬೇಕಾಗಿದೆ. ಆಯಾ ಪರೀಕ್ಷೆಗಳ ವರದಿಗಳು ಮರುದಿನವೇ ಪ್ರಕಟಗೊಳ್ಳಲಿವೆ. ಬಳಿಕ ನಾಕೌಟ್ ಪಂದ್ಯಗಳಿಗೆ ಮುನ್ನವೂ ಜನವರಿ 20 ಮತ್ತು 22ರಂದು ಆಟಗಾರರು ಮತ್ತೊಮ್ಮೆ ಕೋವಿಡ್-19 ಪರೀಕ್ಷೆಗೆ ಒಳಗಾಗಬೇಕಾಗಿದೆ.
ಕರ್ನಾಟಕದ ಪಂದ್ಯಗಳು
ದಿನಾಂಕ: ಎದುರಾಳಿ
ಜನವರಿ 10: ಜಮ್ಮು-ಕಾಶ್ಮೀರ
ಜನವರಿ 12: ಪಂಜಾಬ್
ಜನವರಿ 14: ತ್ರಿಪುರ
ಜನವರಿ 16: ರೈಲ್ವೇಸ್
ಜನವರಿ 18: ಉತ್ತರ ಪ್ರದೇಶ
ಅಗ್ರ ತಂಡಗಳು ನಾಕೌಟ್‌ಗೆ
38 ತಂಡಗಳನ್ನು 6 ಗುಂಪುಗಳಲ್ಲಿ ವಿಭಾಗಿಸಲಾಗಿದ್ದು, ಇದರಲ್ಲಿ ತಲಾ 6 ತಂಗಳ 5 ಎಲೈಟ್ ಮತ್ತು 8 ತಂಡಗಳ 1 ಪ್ಲೇಟ್ ಗುಂಪು ಇವೆ. ರೌಂಡ್ ರಾಬಿನ್ ಲೀಗ್ ಹಂತದ ಬಳಿಕ ಪ್ರತಿ ಗುಂಪಿನ ಅಗ್ರ ತಂಡಗಳು ನಾಕೌಟ್ ಹಂತಕ್ಕೇರಲಿವೆ. ಇದಲ್ಲದೆ 5 ಎಲೈಟ್ ಗುಂಪಿನಿಂದ 2ನೇ ಸ್ಥಾನ ಪಡೆದ 2 ಅತ್ಯುತ್ತಮ ತಂಡಗಳು ನಾಕೌಟ್ ಹಂತಕ್ಕೇರಲಿವೆ. ನಾಕೌಟ್ ಪಂದ್ಯಗಳು ಜನವರಿ 26ರಿಂದ ಅಹಮದಾಬಾದ್‌ನಲ್ಲಿ ನಡೆಯಲಿವೆ. ಜನವರಿ 26 ಮತ್ತು 27ರಂದು ಕ್ವಾರ್ಟರ್ಫೈನಲ್, ಜನವರಿ 29ರಂದು ಸೆಮಿಫೈನಲ್ಸ್ ಮತ್ತು ಜನವರಿ 31ರಂದು ಫೈನಲ್ ಪಂದ್ಯ ನಡೆಯಲಿದೆ.
ಗುಂಪುಗಳು:
ಎಲೈಟ್ ಎ: ಕರ್ನಾಟಕ, ಪಂಜಾಬ್, ಉತ್ತರ ಪ್ರದೇಶ, ಜಮ್ಮು-ಕಾಶ್ಮೀರ, ರೈಲ್ವೇಸ್, ತ್ರಿಪುರ; ಸ್ಥಳ: ಬೆಂಗಳೂರು.
ಎಲೈಟ್ ಬಿ: ಒಡಿಶಾ, ಬಂಗಾಳ, ಜಾರ್ಖಂಡ್, ತಮಿಳುನಾಡು, ಅಸ್ಸಾಂ, ಹೈದರಾಬಾದ್; ಸ್ಥಳ: ಕೋಲ್ಕತ.
ಎಲೈಟ್ ಸಿ: ಗುಜರಾತ್, ಮಹಾರಾಷ್ಟ್ರ, ಛತ್ತೀಸ್‌ಗಢ, ಹಿಮಾಚಲ ಪ್ರದೇಶ, ಬರೋಡ, ಉತ್ತರಾಖಂಡ; ಸ್ಥಳ: ವಡೋದರ.
ಎಲೈಟ್ ಡಿ: ಸರ್ವಿಸಸ್, ಸೌರಾಷ್ಟ್ರ, ವಿದರ್ಭ, ರಾಜಸ್ಥಾನ, ಮಧ್ಯಪ್ರದೇಶ, ಗೋವಾ; ಸ್ಥಳ: ಇಂದೋರ್.
ಎಲೈಟ್ ಇ: ಹರಿಯಾಣ, ಆಂಧ್ರ ಪ್ರದೇಶ, ದೆಹಲಿ, ಮುಂಬೈ, ಕೇರಳ, ಪುದುಚೇರಿ; ಸ್ಥಳ: ಮುಂಬೈ.
ಪ್ಲೇಟ್: ಚಂಡೀಗಢ, ಮೇಘಾಲಯ, ಬಿಹಾರ, ನಾಗಾಲ್ಯಾಂಡ್, ಮಣಿಪುರ, ಮಿಜೋರಾಂ, ಸಿಕ್ಕಿಂ, ಅರುಣಾಚಲ ಪ್ರದೇಶ; ಸ್ಥಳ: ಚೆನ್ನೈ.
ಬಾಕ್ಸಿಂಗ್ ಡೇ ಟೆಸ್ಟ್‌ಗೆ ಟೀಮ್ ಇಂಡಿಯಾದಲ್ಲಿ ಏನೇನು ಬದಲಾವಣೆಯಾಗಲಿದೆ ಗೊತ್ತಾ?
ಟೀಮ್ ಇಂಡಿಯಾ ಕೋಚ್ ರವಿಶಾಸ್ತ್ರಿ ವಜಾಗೊಳಿಸಲು ಕ್ರಿಕೆಟ್ ಪ್ರೇಮಿಗಳ ಆಗ್ರಹ