ಗುವಾಹಾಟಿ: ಸುಪ್ರೀಂಕೋರ್ಟ್ ಆದೇಶದಂತೆ ಕಳೆದ ಆಗಸ್ಟ್ನಲ್ಲಿ ಪ್ರಕಟವಾಗಿದ್ದ ಅಸ್ಸಾಂನಲ್ಲಿನ ಅಂತಿಮ ನಾಗರಿಕರ ಪಟ್ಟಿಯು ರಾಜ್ಯ ರಾಷ್ಟ್ರೀಯ ನಾಗರಿಕ ನೋಂದಣಿ(ಎನ್ಆರ್ಸಿ) ವೆಬ್ಸೈಟ್ನಿಂದ ನಾಪತ್ತೆಯಾಗಿದ್ದು, ಭಾರಿ ಕುತೂಹಲ ಮೂಡಿಸಿದೆ.
ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಕೇಂದ್ರ ಗೃಸಚಿವಾಲಯ, ಎನ್ಆರ್ಸಿ ಡಾಟಾ ಸುರಕ್ಷಿತವಾಗಿದೆ ಮತ್ತು ಉಲ್ಲೇಖವಾಗಿದೆ. ಕೆಲವು ತಾಂತ್ರಿಕ ಸಮಸ್ಯೆಗಳಿಂದ ವೆಬ್ಸೈಟ್ನಲ್ಲಿ ಕಾಣಿಸುತ್ತಿಲ್ಲ. ಸಮಸ್ಯೆ ಶೀಘ್ರವೇ ಬಗೆಹರಿಯಲಿದೆ ಎಂದು ತಿಳಿಸಿದೆ.
ಐಟಿ ಸಂಸ್ಥೆ ವಿಪ್ರೋ ಜತೆಗಿನ ಒಪ್ಪಂದ ಇನ್ನು ನವೀಕರಣ ಆಗದೇ ಇರುವುದರಿಂದ ಎನ್ಆರ್ಸಿ ಡಾಟಾ ಕಾಣಿಸುತ್ತಿಲ್ಲ ಆದಷ್ಟು ಬೇಗ ಎಲ್ಲವು ಸರಿಯಾಗಲಿದೆ ಎಂದು ಎನ್ಆರ್ಸಿ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಭಾರತೀಯ ನಾಗರಿಕರಲ್ಲಿ ಹೊರಗಿಡುವ ಮತ್ತು ಸೇರ್ಪಡೆಗೊಳ್ಳುವ ಅಸ್ಸಾಂ ಎನ್ಆರ್ಸಿಯ ಸಂಪೂರ್ಣ ಮಾಹಿತಿಯನ್ನು ಅಧಿಕೃತ ”www.nrcassam.nic.in” ವೆಬ್ಸೈಟ್ನಲ್ಲಿ ಅಪ್ಲೋಡ್ ಮಾಡಲಾಗಿತ್ತು. ಸುಪ್ರೀಂಕೋರ್ಟ್ ಆದೇಶದಂತೆ ಕಳೆದ ಆಗಸ್ಟ್ 13, 2019ರಂದು ಅಂತಿಮ ಪಟ್ಟಿ ಪ್ರಕಟವಾಗಿತ್ತು.
ಒಪ್ಪಂದದ ಮೇರೆಗೆ ವಿಪ್ರೋ ಐಟಿ ಸಂಸ್ಥೆ ಡಾಟಾವನ್ನು ಒದಗಿಸುತ್ತಿತ್ತು. ಆದರೆ, ಕಳೆದ ಅಕ್ಟೋಬರ್ನಲ್ಲೇ ಅವರ ಒಪ್ಪಂದ ಮುಗಿದಿದ್ದು, ಇನ್ನೂ ನವೀಕರಣ ಆಗದೇ ಇರುವ ಹಿನ್ನೆಲೆಯಲ್ಲಿ ವಿಪ್ರೋ ಅಮಾನತ್ತಿನಲ್ಲಿಟ್ಟಿದೆ. ಈ ಕಾರಣದಿಂದಾಗಿ ಡಾಟಾವು ಡಿಸೆಂಬರ್ 15ರ ನಂತರ ಆಫ್ಲೈನ್ಗೆ ಹೋಗಿದೆ. ಶೀಘ್ರವೇ ಸರಿ ಹೋಗಲಿದೆ ಎಂದು ಎನ್ಆರ್ಸಿ ರಾಜ್ಯ ಸಂಯೋಜಕ ಹಿತೇಶ್ ದೇವ್ ವರ್ಮಾ ತಿಳಿಸಿದ್ದಾರೆ.
ಅಸ್ಸಾಂನ ನಾಗರಿಕ ಪಟ್ಟಿಯಲ್ಲಿ 19 ಲಕ್ಷ ಮಂದಿಯ ಹೆಸರು ಬಿಟ್ಟು ಹೋಗಿದ್ದು, ತಮ್ಮ ನಾಗರಿಕತ್ವವನ್ನು ಸಾಬೀತು ಪಡಿಸಲು ತಿಳಿಸಲಾಗಿದೆ. ಯಾರ ಹೆಸರು ಪಟ್ಟಿಯಲ್ಲಿ ಉಲ್ಲೇಖವಾಗಿಲ್ಲವೋ ಅವರು ಕಾನೂನಾತ್ಮಕವಾಗಿ ಸಾಬೀತು ಪಡಿಸುವವರೆಗೂ ವಿದೇಶಿಯರು ಎಂದು ಘೋಷಿಸಲಾಗುವುದಿಲ್ಲ ಎಂದು ಕೇಂದ್ರ ಸರ್ಕಾರ ಹೇಳಿದೆ. (ಏಜೆನ್ಸೀಸ್)