ನಾನು ಕೊಹ್ಲಿಯ ಡೈ ಹಾರ್ಡ್​ ಫ್ಯಾನ್​, ಆರ್​ಸಿಬಿ ಕಪ್​ ಗೆಲ್ಲಬೇಕೆಂಬುದೇ ನನ್ನ ಕನಸೆಂದ ತಮಿಳು ನಟಿ!

ನವದೆಹಲಿ: ರನ್​ ಮೆಷಿನ್​, ರೆಕಾರ್ಡ್​ ಕಿಂಗ್​ ವಿರಾಟ್​ ಕೊಹ್ಲಿಗೆ ವಿಶ್ವದಾದ್ಯಂತ ಸಾಕಷ್ಟು ಅಭಿಮಾನಿಗಳಿದ್ದಾರೆ. ಸಾಮಾನ್ಯ ಜನರಿಂದಿಡಿದು ಸೆಲೆಬ್ರಿಟಿಗಳವರೆಗೆ ಕೊಹ್ಲಿಯನ್ನು ಆರಾಧಿಸುತ್ತಾರೆ. ಗಮನಾರ್ಹ ಸಂಗತಿ ಏನೆಂದರೆ, ಈವರೆಗೆ ಯಾವುದೇ ಐಪಿಎಲ್​ ಫ್ರಾಂಚೈಸಿ ಬದಲಾಯಿಸದೇ ಒಂದೇ ತಂಡದಲ್ಲಿ ಆಡುತ್ತಿರುವ ಏಕೈಕ ಆಟಗಾರ ಅಂದರೆ ಅದು ಕೊಹ್ಲಿ. ರಾಯಲ್​ ಚಾಲೆಂಜರ್ಸ್​ ತಂಡವನ್ನು ಕೊಹ್ಲಿ ಪ್ರತಿನಿಧಿಸುತ್ತಿದ್ದಾರೆ.

ಇಲ್ಲಿಯವರೆಗೆ ಐಪಿಎಲ್​ನ 16 ಸೀಸನ್​ ಮುಕ್ತಾಯವಾದರೂ ಆರ್​ಸಿಬಿ ಮಾತ್ರ ಒಂದು ಬಾರಿಯೂ ಟ್ರೋಫಿಗೆ ಮುತ್ತಿಟ್ಟಿಲ್ಲ. ಆರ್​ಸಿಬಿಗೆ ಇಂದಿಗೂ ಐಪಿಎಲ್​ ಟ್ರೋಫಿ ಎಟುಕದ ನಕ್ಷತ್ರವಾಗಿದೆ. ಆರ್​ಸಿಬಿ ಟ್ರೋಫಿ ಗೆಲ್ಲಬೇಕೆಂಬುದು ಅನೇಕರ ಕನಸಾಗಿದೆ. ಅದರಲ್ಲಿ ನಟಿ ವರ್ಷಾ ಬೊಲ್ಲಮ್ಮ ಕೂಡ ಒಬ್ಬರು. ವರ್ಷಾ ಅವರು ಕರ್ನಾಟಕದ ಕೊಡಗಿನ ಕುವರಿಯಾದರೂ ತಮಿಳು ಹಾಗೂ ತೆಲುಗಿನಲ್ಲಿ ಹೆಚ್ಚು ಸದ್ದು ಮಾಡುತ್ತಿದ್ದಾರೆ.

ವಿಜಯ್​ ನಟನೆಯ ಬಿಗಿಲ್​, ವಿಜಯ್​ ಸೇತುಪತಿ ಅಭಿನಯದ 96 ಸೇರಿದಂತೆ ಅನೇಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ತೆಲುಗಿನಲ್ಲೂ ಸಾಕಷ್ಟು ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ. ಕನ್ನಡದಲ್ಲಿ ಮನೆ ನಂಬರ್​ 13 ಸಿನಿಮಾದಲ್ಲಿ ನಟಿಸಿದ್ದು, ಈ ಸಿನಿಮಾ 2020ರಲ್ಲಿ ಅಮೇಜಾನ್​ ಪ್ರೈಮ್​ನಲ್ಲಿ ಬಿಡುಗಡೆಯಾಯಿತು. ಆದರೆ, ಹೇಳಿಕೊಳ್ಳುವಷ್ಟು ಹಿಟ್​ ಆಗಲಿಲ್ಲ. ತಮಿಳು ಮತ್ತು ತೆಲುಗಿನಲ್ಲಿ ಸಾಕಷ್ಟು ಸಿನಿಮಾಗಳಲ್ಲಿ ವರ್ಷಾ ಬಿಜಿಯಾಗಿದ್ದಾರೆ.

ಸದ್ಯ ವರ್ಷಾ ಅವರು ಊರು ಪೇರು ಭೈರವಕೋಣ ಹೆಸರಿನ ಸಿನಿಮಾದಲ್ಲಿ ನಟಿಸಿದ್ದಾರೆ. ಈ ಸಿನಿಮಾ ಇನ್ನೇನು ಕೆಲವೇ ದಿನಗಳಲ್ಲಿ ಬಿಡುಗಡೆಯಾಗಲಿದ್ದು, ಸಿನಿಮಾ ಪ್ರಚಾರ ಆರಂಭವಾಗಿದೆ. ಇತ್ತೀಚೆಗೆ ವರ್ಷಾ ಮಾಧ್ಯಮ ಸಂದರ್ಶನದಲ್ಲಿ ಭಾಗವಹಿಸಿದ್ದರು. ಈ ವೇಳೆ ಅವರಿಗೆ ಕ್ರಿಕೆಟ್​ ಬಗ್ಗೆ ಕೇಳಿದಾಗ, ವಿರಾಟ್​ ಕೊಹ್ಲಿ ಅಂದರೆ ನನಗೆ ತುಂಬಾ ಇಷ್ಟ. ಕೊಹ್ಲಿ ಒಮ್ಮೆಯಾದರೂ ಐಪಿಎಲ್​ ಟ್ರೋಫಿ ಎತ್ತಿಡಿಯಬೇಕು ಎಂಬುದು ನನ್ನ ಕನಸಾಗಿದೆ. ನಾನು ಆರ್​ಸಿಬಿ ಹಾಗೂ ಕೊಹ್ಲಿಯ ಡೈ ಹಾರ್ಡ್​ ಫ್ಯಾನ್​ ಮತ್ತು ವಿರಾಟ್​ ಕೊಹ್ಲಿಗಾಗಿಯೇ ನಾನು ಐಪಿಎಲ್​ ನೋಡುತ್ತೇನೆ. ಈ ಬಾರಿ ನನ್ನ ಕನಸು ಖಂಡಿತ ನನಸಾಗಲಿದೆ ಎಂದು ವರ್ಷಾ ಹೇಳಿಕೊಂಡಿದ್ದಾರೆ.

ವರ್ಷಾ ಅವರು ಕೊಹ್ಲಿ ಬಗ್ಗೆ ಮಾತನಾಡಿರುವ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್​ ಆಗಿದೆ. ವಿಡಿಯೋ ನೋಡಿ ಅನೇಕ ಆರ್​​ಸಿಬಿ ಅಭಿಮಾನಿಗಳು ಪ್ರತಿಕ್ರಿಯಿಸಿದ್ದು, ಟ್ರೋಫಿ ಜಯಿಸಬೇಕೆಂಬುದು ನಮ್ಮ ಕನಸು ಕೂಡ ಹೌದು ಎಂದಿದ್ದಾರೆ. ಅಂದಹಾಗೆ ಈ ಬಾರಿಯ ಐಪಿಎಲ್​ ಮಾರ್ಚ್​ 22ರಿಂದ ಆರಂಭವಾಗಲಿದೆ. ಮೊದಲ ಪಂದ್ಯದಲ್ಲೇ ಆರ್​ಸಿಬಿ ಮತ್ತು ಚೆನ್ನೈ ಸೂಪರ್​ ಕಿಂಗ್ಸ್​ ಮುಖಾಮುಖಿಯಾಗಲಿದೆ. (ಏಜೆನ್ಸೀಸ್​)

https://www.vijayavani.net/worlds-most-profitable-film-made-in-rs-6-lakh-earned-rs-800-crore

https://www.vijayavani.net/i-am-always-said-that-i-would-never-get-married-says-anant-ambani