ಜನ್ಮ ದಿನಾಂಕಕ್ಕೆ ಪುರಾವೆಯಾಗದು ಆಧಾರ್​ ಕಾರ್ಡ್​: ಹಾಗಿದ್ದರೆ ನೀವು ನೀಡಬೇಕಾದ ಬೇರೆ ದಾಖಲೆಗಳೇನು?

ನವದೆಹಲಿ: ಕೇಂದ್ರ ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯದ ಅಡಿಯಲ್ಲಿ ಬರುವ ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆ (ಇಪಿಎಫ್‌ಒ) ತನ್ನ ಎಲ್ಲ ವಲಯ ಮತ್ತು ಪ್ರಾದೇಶಿಕ ಕಚೇರಿಗಳಿಗೆ ಹೊಸ ಸೂಚನೆಯನ್ನು ಜಾರಿಗೆ ತರಲು ಸುತ್ತೋಲೆ ಹೊರಡಿಸಿದೆ. ಈ ನಿಟ್ಟಿನಲ್ಲಿ ಅಗತ್ಯ ಮಾರ್ಪಾಡುಗಳನ್ನು ಮಾಡುವಂತೆ ಆಂತರಿಕ ವ್ಯವಸ್ಥೆ ವಿಭಾಗಕ್ಕೂ ನಿರ್ದೇಶನ ನೀಡಿದೆ. ಈ ಸೂಚನೆಯಲ್ಲಿ ಜನ್ಮ ದಿನಾಂಕಕ್ಕೆ ಪುರಾವೆಯಾಗಿ ಆಧಾರ್​ ಕಾರ್ಡ್​ಗೆ ಮಾನ್ಯತೆ ನೀಡುವುದಿಲ್ಲ ಎಂದು ಹೇಳಿದೆ.

ಹುಟ್ಟಿದ ದಿನಾಂಕದ ಪುರಾವೆಯಾಗಿ ಆಧಾರ್ ಅನ್ನು ಏಕೆ ತೆಗೆದುಹಾಕಲಾಗಿದೆ?

ಇಪಿಎಫ್‌ಒ, ಸುತ್ತೋಲೆ ಸಂಖ್ಯೆ. ಡಬ್ಲ್ಯುಎಸ್‌ಯು/2024/1/ಯುಐಡಿಎಐ ಮ್ಯಾಟರ್/4090ರ ಪ್ರಕಾರ, ಭಾರತೀಯ ವಿಶಿಷ್ಟ ಗುರುತು ಪ್ರಾಧಿಕಾರ (ಯುಐಡಿಎಐ) ಹೊರಡಿಸಿದ ನಿರ್ದೇಶನದಂತೆ ಕೇಂದ್ರ ಭವಿಷ್ಯ ನಿಧಿ ಆಯುಕ್ತರ ಅನುಮೋದನೆಯ ನಂತರ ಈ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ ಎಂದು ಹೇಳಲಾಗಿದೆ.

ಆಧಾರ್ ಕಾರ್ಡ್​ ಒಂದು ಅನನ್ಯ ಗುರುತು ಪತ್ರವಾಗಿದೆ. ಆದ್ದರಿಂದ ಇದನ್ನು ಗುರುತು ಮತ್ತು ವಿಳಾಸದ ಪುರಾವೆಯಾಗಿ ಬಳಸಬಹುದು ಎಂದು ಹೇಳಿದೆ. ಆದರೆ, ಆಧಾರ್ ಕಾಯ್ದೆ, 2016 ರ ಪ್ರಕಾರ ಜನ್ಮ ದಿನಾಂಕದ ಪುರಾವೆಯಾಗಿ ಆಧಾರ್ ಅನ್ನು ಗುರುತಿಸಲಾಗಿಲ್ಲ ಎಂದು ಅದು ಹೇಳಿದೆ.

“ಆಧಾರ್ ಒಬ್ಬ ನಿವಾಸಿಗೆ ಅವನ/ಅವಳ ಜನಸಂಖ್ಯಾ ಮತ್ತು ಬಯೋಮೆಟ್ರಿಕ್ ಮಾಹಿತಿಯನ್ನು ಸಲ್ಲಿಸುವ ಮೂಲಕ ದಾಖಲಾತಿ ಪ್ರಕ್ರಿಯೆಗೆ ಒಳಗಾದ ನಂತರ ನೀಡಲಾದ ಅನನ್ಯ 12 ಅಂಕಿಯ ಐಡಿ (ಗುರುತುಪತ್ರ) ಎಂದು ನಮೂದಿಸುವುದು ಸೂಕ್ತವಾಗಿದೆ. ದಾಖಲಾತಿ/ಅಪ್‌ಡೇಟ್ ಸಮಯದಲ್ಲಿ, ಯುಐಡಿಎಐ ವೆಬ್‌ಸೈಟ್‌ನಲ್ಲಿ ಒದಗಿಸಲಾದ ಆಧಾರ್ ದಾಖಲಾತಿಗಾಗಿ ಪೋಷಕ ದಾಖಲೆಗಳ ಪಟ್ಟಿಯಡಿಯಲ್ಲಿ ನಿರ್ದಿಷ್ಟಪಡಿಸಿದಂತೆ, ಅವರು ಸಲ್ಲಿಸಿದ ದಾಖಲೆಗಳ ಆಧಾರದ ಮೇಲೆ, ನಿವಾಸಿಗಳು ಕ್ಲೈಮ್ ಮಾಡಿದ ಜ್ಮ ದಿನಾಂಕವನ್ನು ಯುಐಡಿಎಐ ದಾಖಲಿಸುತ್ತದೆ” ಎಂದು ಯುಐಡಿಎಐ ಹೇಳಿದೆ.

ಜನ್ಮ ದಿನಾಂಕದ ಪುರಾವೆಯಾಗಿ ಮಾನ್ಯ ಮಾಡಿದ ದಾಖಲೆಗಳ ಪಟ್ಟಿ ಈ ರೀತಿ ಇದೆ.
1) ಜನನ ಪ್ರಮಾಣಪತ್ರ
2) ಸರ್ಕಾರಿ ಮಂಡಳಿ ಅಥವಾ ವಿಶ್ವವಿದ್ಯಾನಿಲಯದಿಂದ ನೀಡಲಾದ ಮಾರ್ಕ್ ಶೀಟ್ (ಅಂಕ ಪಟ್ಟಿ)
3) ಶಾಲೆ ಬಿಡುವ ಪ್ರಮಾಣಪತ್ರ (ಲೀವಿಂಗ್ ಸರ್ಟಿಫಿಕೇಟ್), ಶಾಲಾ ವರ್ಗಾವಣೆ ಪ್ರಮಾಣಪತ್ರ ಅಥವಾ ಎಸ್​ಎಸ್​ಎಲ್​ಸಿ ಪ್ರಮಾಣಪತ್ರ
4) PAN ಕಾರ್ಡ್
5) ಪಾಸ್​ಪೋರ್ಟ್​
6) ಸೇವಾ ದಾಖಲೆಗಳ ಆಧಾರದ ಮೇಲೆ ಪ್ರಮಾಣಪತ್ರ
7) ಕೇಂದ್ರ ಅಥವಾ ರಾಜ್ಯ ಹೊರಡಿಸಿದ ಪಿಂಚಣಿ ಪಾವತಿ ಆದೇಶ
8) ಸರ್ಕಾರ ನೀಡಿದ ನಿವಾಸ ಪ್ರಮಾಣಪತ್ರ
9) ಸಿವಿಲ್ ಸರ್ಜನ್ ನೀಡಿದ ವೈದ್ಯಕೀಯ ಪ್ರಮಾಣಪತ್ರ
10) ಸರ್ಕಾರ ನೀಡಿದ ಇತರ ದಾಖಲೆಗಳು

https://www.vijayavani.net/rs-362-crore-order-shares-of-cable-company-expected-to-double-after-1025-56-gain

https://www.vijayavani.net/you-woould-have-been-crorepatil-if-you-invested-rs-2-33-lakhs-3-years-back-do-you-know-what-this-penny-stock-is

https://www.vijayavani.net/you-too-can-profit-from-the-400-return-stock-stock-split-for-small-investors