ಬೆಂಗಳೂರು: ನಿಖಿಲ್ ಕುಮಾರಸ್ವಾಮಿ ಮತ್ತು ರೇವತಿ ದಂಪತಿ ಪುತ್ರನ ನಾಮಕರಣ ಶಾಸ್ತ್ರೋಕ್ತವಾಗಿ ಬೆಂಗಳೂರಿನ ಜೆಪಿ ನಗರದ ಲಕ್ಷ್ಮೀ ವೆಂಕಟೇಶ್ವರ ದೇವಸ್ಥಾನದಲ್ಲಿ ಬುಧವಾರ ನೆರವೇರಿತು. ಕುಟುಂಬಸ್ಥರ ಸಮ್ಮುಖದಲ್ಲಿ ಮಾಜಿ ಪ್ರಧಾನಿ ದೇವೇಗೌಡರ ಮರಿ ಮೊಮ್ಮಗನಿಗೆ ‘ಅವ್ಯಾನ್ ದೇವ್ ಎನ್.ಕೆ.’ ಎಂದು ಹೆಸರಿಡಲಾಗಿದೆ. ‘ಅವ್ಯಾನ್’ ಹೆಸರಿನ ಅರ್ಥವೇನು? ‘ದೇವ್’ ಎಂದರೆ ದೇವೇಗೌಡರ ಹೆಸರೇ? ಎಂಬಿತ್ಯಾದಿ ಪ್ರಶ್ನೆಗಳು ಅಭಿಮಾನಿಗಳು ಮತ್ತು ಜನರ ಮನದಲ್ಲಿ ಮೂಡಿದೆ. ಹಲವರು ಈ ಹೆಸರಿನ ಅರ್ಥವನ್ನು ಗೂಗಲ್ನಲ್ಲಿ ಹುಡುಕಾಡಿದ್ದಾರೆ. ನಾಮಕರಣ ಮುಗಿದ ಬಳಿಕ ಈ ಹೆಸರಿನ ಅರ್ಥವನ್ನು ನಿಖಿಲ್ ಅವರೇ ಸುದ್ದಿಗಾರರ ಬಳಿ ವಿವರಿಸಿದ್ದಾರೆ.
ಅವ್ಯಾನ್ ದೇವ್ ದೇವರ ಹೆಸರು. ಅದೃಷ್ಟದಿಂದ ಜನಿಸಿದವನು ಎಂದು ಸೂಚಿಸುತ್ತದೆ. ಅವ್ಯಾನ್ ಅಂದ್ರೆ ಗಣೇಶ ಮತ್ತು ವಿಷ್ಣು ದೇವರ ಮತ್ತೊಂದು ಹೆಸರು. ನನ್ನ ಹೆಂಡತಿಯೇ ಈ ಹೆಸರನ್ನು ಹುಡುಕಿರೋದು. ನನ್ನ ತಂದೆ-ತಾಯಿ ಮತ್ತು ಅಜ್ಜಿ-ತಾತನನ್ನು ಕೇಳಿ ನಂತರ ಈ ಹೆಸರನ್ನು ಫೈನಲ್ ಮಾಡಿದ್ದು. ನ್ಯೂಮರಾಲಜಿಯಲ್ಲೂ ಈ ಹೆಸರು ಮ್ಯಾಚ್ ಆಯ್ತು. ನಮ್ಮ ತಾತನ ಮೇಲಿನ ಭಾವನಾತ್ಮಕ ಫೀಲ್ನಿಂದ ನನ್ನ ಮಗನ ಹೆಸರಲ್ಲಿ ದೇವ್ ಅಂತಾನೂ ಸೇರಿಸಿದ್ದೇನೆ ಎಂದು ನಿಖಿಲ್ ವಿವರಿಸಿದರು.
2021ರ ಸೆಪ್ಟೆಂಬರ್ 24ರಂದು ಅವ್ಯಾನ್ ದೇವ್ ಜನಿಸಿದ್ದು, ಬೆಂಗಳೂರಿನ ಜೆಪಿ ನಗರದ ಲಕ್ಷ್ಮೀ ವೆಂಕಟೇಶ್ವರ ದೇವಸ್ಥಾನದಲ್ಲಿ ಬುಧವಾರ ಕುಮಾರಸ್ವಾಮಿ, ಅನಿತಾ ಕುಮಾರಸ್ವಾಮಿ ಸೇರಿದಂತೆ ದೇವೇಗೌಡರ ಕುಟುಂಬಸ್ಥರ ಸಮ್ಮುಖದಲ್ಲಿ ಶಾಸ್ತ್ರೋಕ್ತವಾಗಿ ನಾಮಕರಣ ಕಾರ್ಯಕ್ರಮ ನೆರವೇರಿತು.
ನಿಖಿಲ್ ಕುಮಾರಸ್ವಾಮಿ ಪುತ್ರನ ನಾಮಕರಣ ಶಾಸ್ತ್ರ: ದೇವೇಗೌಡರ ಮರಿಮೊಮ್ಮಗನ ಹೆಸರು ಹೀಗಿದೆ