ಈ ಕರೊನಾ ವೈರಸ್ ಜಗತ್ತಿನ ಪಾಲಿಗೆ ಅದೆಷ್ಟು ಮಾರಕವಾಗಿದೆ ಎಂಬುದನ್ನು ನಾವೆಲ್ಲ ಕಣ್ಣಾರೆ ನೋಡುತ್ತಿದ್ದೇವೆ. ಐದು ತಿಂಗಳುಗಳಿಂದ ಇದು ಸೃಷ್ಟಿಸುತ್ತಿರುವ ಅವಘಡಗಳು ಒಂದೆರಡಲ್ಲ.
ಕರೊನಾ ಸೋಂಕು, ಅದರ ಸ್ವರೂಪ, ಲಕ್ಷಣಗಳನ್ನೆಲ್ಲ ಇನ್ನೂ ವಿಜ್ಞಾನಿಗಳು ಅಧ್ಯಯನ ಮಾಡುತ್ತಿದ್ದಾರೆ. ಅಂಥದ್ದರಲ್ಲಿ ಮಕ್ಕಳಿಗೆಲ್ಲ ಹೇಗೆ ಗೊತ್ತಿರಬೇಕು ಕರೊನಾ ವೈರಸ್ ಬಗ್ಗೆ? ಆದರೆ ಇಲ್ಲೊಬ್ಬ ಪುಟ್ಟ ಬಾಲಕಿ ಕರೊನಾದಿಂದ ಆಗುತ್ತಿರುವ ಅಪಾಯವನ್ನು ಅರ್ಥ ಮಾಡಿಕೊಂಡಿದ್ದಾಳೆ. ಅವಳ ಕೆಲಸವೀಗ ತುಂಬ ಜನರಿಗೆ ಮಾದರಿಯಾಗಿದೆ.
ಈಕೆ ಮಲೇಷಿಯಾದ 9 ವರ್ಷದ ಬಾಲಕಿ. ಹೆಸರು ನೂರ್ ಅಫಿಯಾ ಕಿಸ್ಟಿನಾ ಜಮ್ಜುರಿ. ಇವಳೀಗ ಒಂದು ವಿಧದಲ್ಲಿ ಕರೊನಾ ವಾರಿಯರ್…!
ಕರೊನಾ ವೈರಸ್ ವಿರುದ್ಧ ಹೋರಾಡುತ್ತಿರುವ ಅದೆಷ್ಟೋ ವೈದ್ಯರು, ನರ್ಸ್ಗಳು, ಆಶಾ ಕಾರ್ಯಕರ್ತೆಯರು ಸೂಕ್ತ ಪಿಪಿಇ ಕಿಟ್ (ಪರ್ಸನಲ್ ಪ್ರೊಟೆಕ್ಟಿವ್ ಇಕ್ವಿಪ್ಮೆಂಟ್)ಗಳು ಇಲ್ಲದೆ ಕಷ್ಟಪಡುತ್ತಿದ್ದಾರೆ.
ಇದನ್ನೂ ಓದಿ: ವಿದೇಶದಿಂದ ಬಂದವರಿಗೆ ಫೈವ್ ಸ್ಟಾರ್ ಸೌಲಭ್ಯ, ಶ್ರಮಿಕ್ ರೈಲುಗಳಲ್ಲಿ ವ್ಯಕ್ತಿಗತ ಅಂತರವೂ ಇಲ್ಲ
ಮಲೇಷಿಯಾದಲ್ಲಿ ಈ ಬಾಲಕಿ ಇರುವ ಪ್ರದೇಶದ ಆಸ್ಪತ್ರೆಗಳಲ್ಲೂ ಸಹ ಪಿಪಿಇ ಕಿಟ್ಗಳ ಕೊರತೆ ಇತ್ತು. ಆರೋಗ್ಯ ಸಿಬ್ಬಂದಿ ಸುರಕ್ಷತಾ ಸಾಧನಗಳಿಲ್ಲದೆ ತಮ್ಮ ಜೀವವನ್ನು ಅಪಾಯಕ್ಕೆ ಒಡ್ಡಿ, ಕರೊನಾ ಸೋಂಕಿತರಿಗೆ ಚಿಕಿತ್ಸೆ ನೀಡುತ್ತಿದ್ದರು. ಇದನ್ನು ಕೇಳಿದ ನೂರ್ ಅಫಿಯಾ ಸ್ವತಃ ಪಿಪಿಇ ಕಿಟ್ಗಳನ್ನು ತಯಾರಿಸಿದ್ದಾಳೆ. ಕೇವಲ 9 ವರ್ಷದ ಬಾಲಕಿ ಆರೋಗ್ಯ ಕಾರ್ಯಕರ್ತರ ಆರೋಗ್ಯ ರಕ್ಷಣೆಗೆ ಮುಂದಾಗಿದ್ದಾಳೆ. ಹಲವು ಪಿಪಿಇ ಗೌನ್ಗಳನ್ನು ಹೊಲಿದು ಕೊಟ್ಟಿದ್ದಾಳೆ.
ನೂರ್ ಅಫಿಯಾ ಮಲೇಷಿಯಾದ ನೈಋತ್ಯ ರಾಜ್ಯವಾದ ನೆಗೆರಿ ಸೆಂಬಿಲಾನ್ನ ಕೌಲಾ ಪಿಲಾಜ್ ಪಟ್ಟಣದವಳು. ಅಲ್ಲಿನ ಆಸ್ಪತ್ರೆಗಳಲ್ಲಿ ಕೆಲಸ ಮಾಡುತ್ತಿರುವ ವೈದ್ಯಕೀಯ ಸಿಬ್ಬಂದಿ ಸೇರಿ, ಆರೋಗ್ಯ ಕಾರ್ಯಕರ್ತರಿಗೆ ಪಿಪಿಇ ಕಿಟ್ಗಳ ಪೂರೈಕೆ ಆಗುತ್ತಿಲ್ಲ ಎಂಬ ವಿಚಾರ ಇವಳ ಕಿವಿಗೂ ಬಿತ್ತು. ಸುದ್ದಿ ಕೇಳಿದ್ದೇ ತಡ ಸೀದಾ ತಾಯಿಯ ಬಳಿ ಹೋಗಿ..ಅಮ್ಮ, ಕರೊನಾ ವೈರಸ್ ಅಪಾಯಕಾರಿ ಎಂಬುದು ನನಗೆ ಗೊತ್ತು. ಆದರೆ ಆಸ್ಪತ್ರೆಗಳಲ್ಲಿ ಪಿಪಿಇ ಗೌನ್ಗಳಿಲ್ಲದೆ ಚಿಕಿತ್ಸೆ ನೀಡುತ್ತಿದ್ದಾರೆ ಎಂಬ ವಿಚಾರ ಕೇಳಿ ತುಂಬ ಬೇಸರವಾಗುತ್ತಿದೆ. ಅಂಥವರಿಗೆ ನಾನು ಸಹಾಯ ಮಾಡುತ್ತೇನೆ. ಗೌನ್ ಹೊಲಿದು ಕೊಡುತ್ತೇನೆ ಎಂದು ಹೇಳಿದಳು. ಅದಕ್ಕೆ ನೂರ್ ಅಮ್ಮ ಕೂಡ ಬೆಂಬಲ ನೀಡಿದರು.
ಅಗತ್ಯ ವಸ್ತುಗಳನ್ನೆಲ್ಲ ತಂದ ಪುಟಾಣಿ, ದಿನವೊಂದಕ್ಕೆ ನಾಲ್ಕು ಪಿಪಿಇ ಗೌನ್ಗಳನ್ನು ಹೊಲಿಯುತ್ತಿದ್ದಾಳೆ. ಸ್ಕೂಲ್ಗೆ ಹೋಗುತ್ತಿಲ್ಲವಾದರೂ ಆನ್ಲೈನ್ನಲ್ಲಿ ಪಾಠ ನಡೆಯುತ್ತಿದೆ. ಅದರಲ್ಲೂ ಪಾಲ್ಗೊಂಡು, ಸ್ವಲ್ಪ ಹೊತ್ತು ಆಟವಾಡುತ್ತಾಳೆ. ನಂತರ ಈ ಗೌನ್ಗಳನ್ನು ಹೊಲಿಯುತ್ತಿದ್ದಾಳೆ.
ಇದನ್ನೂ ಓದಿ: ನಿರ್ದೇಶಕ ಪುರಿ ಜಗನ್ನಾಥ್ ಚಿತ್ರದಲ್ಲಿ ಆಸ್ಟ್ರೇಲಿಯಾ ಕ್ರಿಕೆಟಿಗ!? ಯಾರವರು ಎಂಬುದಕ್ಕೆ ಇಲ್ಲಿದೆ ಉತ್ತರ!
ನೂರ್ ಈವರೆಗೆ ಸುಮಾರು 130 ಪಿಪಿಇ ಗೌನ್ಗಳನ್ನು ಹೊಲಿದು, ಸ್ಥಳೀಯ ಆಸ್ಪತ್ರೆಗಳಿಗೆ ನೀಡಿದ್ದಾಳೆ. ಇನ್ನೂ 60 ಪೀಸ್ಗಳನ್ನು ಹೊಲಿಯುವ ತಯಾರಿಯಲ್ಲಿದ್ದಾಳೆ. ಆದರೆ ಸದ್ಯ ರಮಜಾನ್ ಇರುವುದರಿಂದ ಸ್ವಲ್ಪ ಕುಟುಂಬವೆಲ್ಲ ಹಬ್ಬದ ಆಚರಣೆಯಲ್ಲಿ ತೊಡಗಿದೆ. ಉಪವಾಸ ಮಾಡುತ್ತಿದ್ದಾರೆ. ನೂರ್ ಕೂಡ ಉಪವಾಸ ಮಾಡುತ್ತಾಳೆ. ಆದರೆ ಕೆಲಸವನ್ನು ಮಾತ್ರ ನಿಲ್ಲಿಸಿಲ್ಲ. ಮುಂಜಾನೆ ಉಪಹಾರಾದ ನಂತರ ಮತ್ತೆ ಗೌನ್ಗಳ ಹೊಲಿಗೆಯಲ್ಲಿ ತೊಡಗಿಸಿಕೊಳ್ಳುತ್ತಿದ್ದಾಳೆ.
ನೂರ್ ಅಫಿಯಾ ಅಮ್ಮ ಸ್ವತಃ ಟೇಲರ್. ಹಾಗಾಗಿ ಮಗಳ ಕೆಲಸಕ್ಕೆ ಸಂಪೂರ್ಣ ಬೆಂಬಲ ನೀಡುತ್ತಿದ್ದಾರೆ. ಗೌನ್ಗಳ ಹೊಲಿಯುತ್ತ ನೂರ್ ಕೌಶಲ ಕೂಡ ಹೆಚ್ಚಾಗುತ್ತಿದೆ. ಒಂದೊಳ್ಳೆ ಕೆಲಸವೂ ಆಕೆಯಿಂದ ನಡೆಯುತ್ತಿದೆ. (ಏಜೆನ್ಸೀಸ್)
ಇದನ್ನೂ ಓದಿ: ಪಾದರಾಯನಪುರದಲ್ಲಿ ಕ್ವಾರಂಟೈನ್ನಲ್ಲಿದ್ದ ಮಹಿಳೆಯರ ಮಿತಿಮೀರಿದ ವರ್ತನೆ: ಆರೋಗ್ಯ ಸಚಿವರಿಂದ ಎಚ್ಚರಿಕೆ