ಮುಂಬೈ: ವೈಮಾನಿಕ ಮತ್ತು ರಕ್ಷಣಾ ಕ್ಷೇತ್ರದ ಸರ್ಕಾರಿ ಕಂಪನಿ ಭಾರತ್ ಎಲೆಕ್ಟ್ರಾನಿಕ್ಸ್ ಲಿಮಿಟೆಡ್ (ಬಿಇಎಲ್) ಷೇರುಗಳ ಖರೀದಿಗೆ ಬ್ರೋಕರೇಜ್ ಸಂಸ್ಥೆಯಾದ ಐಸಿಐಸಿಐ ಸೆಕ್ಯುರಿಟೀಸ್ ಶಿಫಾರಸು ಮಾಡಿದೆ. ಪ್ರತಿ ಷೇರಿಗೆ ರೂ 215 ಗುರಿಯ ಬೆಲೆಯನ್ನು ನಿಗದಿಪಡಿಸಿದೆ.
ಬಿಇಎಲ್ ಷೇರುಗಳ ಬೆಲೆ ಬುಧವಾರ 188.70 ರೂಪಾಯಿ ತಲುಪಿದೆ. ಈಗ ನೀವು ಈ ಷೇರುಗಳನ್ನು 188.70 ರೂಪಾಯಿಗಳ ಕೊನೆಯ ವಹಿವಾಟಿನ ಬೆಲೆಯಲ್ಲಿ ಖರೀದಿಸಿದರೆ, ನಂತರ ಟಾರ್ಗೆಟ್ ಗುರಿ ಬೆಲೆಗೆ ಮಾರಿದರೆ ನಿಮಗೆ 14% ನಷ್ಟು ಲಾಭ ದೊರೆಯಬಹುದು.
ಕಳೆದ 2 ವರ್ಷಗಳಲ್ಲಿ ಭಾರತ್ ಎಲೆಕ್ಟ್ರಾನಿಕ್ಸ್ ಸ್ಟಾಕ್ ಬೆಲೆ 185% ರಷ್ಟು ಏರಿಕೆಯಾಗಿದೆ. ಬರುವ 23ರಂದು ರಂದು ಅರ್ಹ ಷೇರುದಾರರಿಗೆ ಪ್ರತಿ ಈಕ್ವಿಟಿ ಷೇರಿಗೆ 0.70/- ಮಧ್ಯಂತರ ಲಾಭಾಂಶವನ್ನು (70% ಡಿವಿಡೆಂಡ್) ಪಾವತಿಸಲಾಗುವುದು ಎಂದು ಕಂಪನಿ ಫೆಬ್ರವರಿ 12 ರಂದು ತಿಳಿಸಿದೆ. ಈ ಹಿಂದೆ ಕಂಪನಿಯು 2022 ರಲ್ಲಿ 2:1 ರ ಅನುಪಾತದಲ್ಲಿ ಬೋನಸ್ ಷೇರುಗಳನ್ನು ಘೋಷಿಸಿತ್ತು. ಅಂದರೆ ಷೇರುದಾರರು ಪ್ರತಿ 1 ಷೇರಿಗೆ 2 ಬೋನಸ್ ಷೇರುಗಳನ್ನು ಪಡೆದಿದ್ದರು.
ಈ ಕಂಪನಿಯ ಷೇರಿನ 52-ವಾರದ ಗರಿಷ್ಠ ಬೆಲೆ ರೂ. 196.25 ಮತ್ತು ಕನಿಷ್ಠ ಬೆಲೆ ರೂ. 89.68 ಆಗಿದೆ. ಕಂಪನಿಯು 1,37,862.43 ಕೋಟಿ ರೂ.ಗಳ ಮಾರುಕಟ್ಟೆ ಬಂಡವಾಳವನ್ನು ಹೊಂದಿದೆ. ಈ ಷೇರುಗಳು ಕಳೆದ 3-ತಿಂಗಳಲ್ಲಿ 32% ರಷ್ಟು ಏರಿಕೆ ಕಂಡಿವೆ. ಕಳೆದ 1 ವರ್ಷದಲ್ಲಿ 97% ಗಳಿಸಿವೆ. ಕಳೆದ 3 ವರ್ಷಗಳಲ್ಲಿ 318% ನಷ್ಟು ಲಾಭವನ್ನು ನೀಡಿವೆ. ಕಳೆದ 5 ವರ್ಷಗಳಲ್ಲಿ, ಈ ಷೇರುಗಳ ಬೆಲೆ 631% ರಷ್ಟು ಏರಿಕೆ ಕಂಡಿದೆ.
ಈ ಕಂಪನಿಯು ಡಿಸೆಂಬರ್ 31, 2023 ಕ್ಕೆ ಕೊನೆಗೊಂಡ ತ್ರೈಮಾಸಿಕದಲ್ಲಿ ರೂ 859.6 ಕೋಟಿ ನಿವ್ವಳ ಲಾಭವನ್ನು ಘೋಷಿಸಿತ್ತು. ಕಳೆದ ವರ್ಷದ ಇದೇ ತ್ರೈಮಾಸಿಕದಲ್ಲಿ ಘೋಷಿಸಲಾದ ರೂ 613 ಕೋಟಿಗೆ ಹೋಲಿಸಿದರೆ ಇದು 40% ಹೆಚ್ಚಾಗಿದೆ.
1954 ರಲ್ಲಿ ಈ ಕಂಪನಿಯನ್ನು ಸ್ಥಾಪಿಸಲಾಗಿದೆ, ಭಾರತೀಯ ರಕ್ಷಣಾ ಸೇವೆಗಳ ವಿಶೇಷ ಎಲೆಕ್ಟ್ರಾನಿಕ್ ಉಪಕರಣಗಳ ಅಗತ್ಯತೆಗಳ ತಯಾರಿಕೆಯಲ್ಲಿ ಈ ಕಂಪನಿ ತೊಡಗಿದೆ. ರಕ್ಷಣಾ ಸಂವಹನ, ರಾಡಾರ್‌ಗಳು, ನೌಕಾ ವ್ಯವಸ್ಥೆಗಳು, ಶಸ್ತ್ರಾಸ್ತ್ರ ವ್ಯವಸ್ಥೆಗಳು, ಹೋಮ್‌ಲ್ಯಾಂಡ್ ಸೆಕ್ಯುರಿಟಿ, ಟೆಲಿಕಾಂ ಮತ್ತು ಪ್ರಸಾರ ವ್ಯವಸ್ಥೆಗಳು, ಎಲೆಕ್ಟ್ರಾನಿಕ್ ವಾರ್‌ಫೇರ್, ಟ್ಯಾಂಕ್ ಎಲೆಕ್ಟ್ರಾನಿಕ್ಸ್, ಎಲೆಕ್ಟ್ರೋ-ಆಪ್ಟಿಕ್ಸ್, ವೃತ್ತಿಪರ ಎಲೆಕ್ಟ್ರಾನಿಕ್ ಘಟಕಗಳು ಮತ್ತು ಸೌರ ದ್ಯುತಿವಿದ್ಯುಜ್ಜನಕ ವ್ಯವಸ್ಥೆಗಳಂತಹ ಕ್ಷೇತ್ರಗಳಿಗೆ ವ್ಯಾಪಕ ಶ್ರೇಣಿಯ ಉಪಕರಣಗಳನ್ನು ಇದು ಉತ್ಪಾದಿಸುತ್ತದೆ.
6 ದಿನಗಳ ಏರುಪ್ರವೃತ್ತಿಗೆ ಭಂಗ ತಂದ ಕರಡಿ ಕುಣಿತ: 434 ಅಂಕ ಕುಸಿತ ಕಂಡ ಸೂಚ್ಯಂಕ