ಬೆಂಗಳೂರು: ಕನ್ನಡ ಚಿತ್ರಗಳ ಆರ್ಭಟ ಜೋರಾಗಿದೆ. ಈ ವರ್ಷ ಕೆಲವು ತಿಂಗಳಗಳ ಕಾಲ ಬಿಡುಗಡೆಯಾದ ಚಿತ್ರಗಳ ಸಂಖ್ಯೆ ಬಹಳ ಕಡಿಮೆ. ಹಾಗೆಯೇ ಕೆಲವು ತಿಂಗಳುಗಳಲ್ಲಿ ಹಲವು ಚಿತ್ರಗಳು ಬಿಡುಗಡೆಯಾಗಿವೆ. ಈ ತಿಂಗಳು 20ಕ್ಕೂ ಹೆಚ್ಚು ಚಿತ್ರಗಳು ಬಿಡುಗಡೆಯಾಗುತ್ತಿದ್ದು, ಆ ಪೈಕಿ ಈ ಶುಕ್ರವಾರ (ನ. 17) ಏಳು ಚಿತ್ರಗಳು ಬಿಡುಗಡೆಯಾಗಲಿಕ್ಕಿದೆ. ಅದರಲ್ಲಿ ಐದು ಹೊಸ ಚಿತ್ರಗಳಾದರೆ, ಎರಡು ಹಳೆಯ ಸೂಪರ್ ಹಿಟ್ ಚಿತ್ರಗಳು ಮರುಬಿಡುಗಡೆಯಾಗುತ್ತಿವೆ.
ಈ ವಾರ ಬಿಡುಗಡೆಯಾಗುತ್ತಿರುವ ಹೊಸ ಚಿತ್ರಗಳ ಪೈಕಿ ಪ್ರಮುಖವಾಗಿದ್ದು ಪ್ರಜ್ವಲ್ ಅಭಿನಯದ ‘ಅಬ್ಬರ’. ರಾಮ್ನಾರಾಯಣ್ ನಿರ್ದೇಶನದ ಈ ಚಿತ್ರದಲ್ಲಿ ಪ್ರಜ್ವಲ್ಗೆ ನಾಯಕಿಯರಾಗಿ ನಿಮಿಕಾ ರತ್ನಾಕರ್, ಲೇಖಾ ಚಂದ್ರ ಮತ್ತು ರಾಜಶ್ರೀ ಪೊನ್ನಪ್ಪ ಅಭಿನಯಿಸಿದ್ದಾರೆ. ಇದೊಂದು ಪಕ್ಕಾ ಕಮರ್ಷಿಯಲ್ ಚಿತ್ರವಾಗಿದ್ದು, ಮೂರು ಶೇಡ್ಗಳಿರುವ ಪಾತ್ರದಲ್ಲಿ ಪ್ರಜ್ವಲ್ ಕಾಣಿಸಿಕೊಂಡಿದ್ದಾರೆ.
ಇದನ್ನೂ ಓದಿ: ಅನಂತ್ ನಾಗ್ ತಾತ, ದಿಗಂತ್ ಮೊಮ್ಮಗ; 30 ವರ್ಷಗಳ ನಂತರ ಭೇಟಿ
ಇದಲ್ಲದೆ, ರವೀಂದ್ರ ವಂಶಿ ನಿರ್ದೇಶನದ ‘ಮಠ’ ಈ ವಾರ ಬಿಡುಗಡೆಯಾಗುತ್ತಿರುವ ಇನ್ನೊಂದು ಪ್ರಮುಖ ಚಿತ್ರ. ಗುರುಪ್ರಸಾದ್, ತಬಲಾ ನಾಣಿ, ಸಾಧು ಕೋಕಿಲ, ಮಂಡ್ಯ ರಮೇಶ್ ಮುಂತಾದವರು ನಟಿಸಿರುವ ಈ ಚಿತ್ರದಲ್ಲಿ ಕರ್ನಾಟಕದಲ್ಲಿರುವ ಮಠಗಳ ಬಗ್ಗೆ ಹಾಗೂ ಅಲ್ಲಿ ನಡೆದಂತ ನೈಜ ಘಟನೆಗಳನ್ನು ಆಧರಿಸಿ ಕಥೆ-ಚಿತ್ರಕಥೆ ರಚಿಸಲಾಗಿದೆ. ಈ ಚಿತ್ರವನ್ನು 25 ಜಿಲ್ಲೆಗಳಲ್ಲಿ ಚಿತ್ರೀಕರಣ ಮಾಡಲಾಗಿರುವುದು ವಿಶೇಷ.
ಹಿರಿಯ ನಿರ್ದೇಶಕ ವೇಮಗಲ್ ಜಗನ್ನಾಥ ರಾವ್ ನಿರ್ದೇಶನದ ‘ಆವರ್ತ’, ‘ಖಾಸಗೀ ಪುಟಗಳು’ ಮತ್ತು ‘ಕುಳ್ಳನ ಹೆಂಡತಿ’ ಎಂಬ ಹೊಸಬರ ಚಿತ್ರಗಳು ಈ ವಾರ ಬಿಡುಗಡೆಯಾಗುತ್ತಿರುವ ಇನ್ನಿತರ ಚಿತ್ರಗಳು.
ಇದನ್ನೂ ಓದಿ: ಬಾಲ ಕಲಾವಿದರೆಲ್ಲ ಒಂದೇ ವೇದಿಕೆಯಲ್ಲಿ; ಅಪ್ಪು ನೆನಪಲ್ಲಿ ಮಕ್ಕಳ ಚಿತ್ರೋತ್ಸವ
ಇವೆಲ್ಲ ಹೊಸ ಚಿತ್ರಗಳಾದರೆ, ಹಿಂದೊಮ್ಮೆ ಬಿಡುಗಡೆಯಾಗಿ ಸೂಪರ್ ಹಿಟ್ ಆದ ಕನ್ನಡದ ಎರಡು ಎವರ್ಗ್ರೀನ್ ಚಿತ್ರಗಳು ಈ ವಾರ ಪುನಃ ಬಿಡುಗಡೆಯಾಗುತ್ತಿದೆ. ಒಂದು ಡಾ. ರಾಜಕುಮಾರ್ ಅಭಿನಯದ ‘ಭಾಗ್ಯವಂತರು’. ಇನ್ನೊಂದು ಶಂಕರ್ ನಾಗ್ ಅಭಿನಯದ ‘ಸಾಂಗ್ಲಿಯಾನ’. ಈ ಎರಡೂ ಚಿತ್ರಗಳು ಹೊಸ ತಂತ್ರಜ್ನಾನದಲ್ಲಿ ಬಿಡುಗಡೆಯಾಗುತ್ತಿರುವುದು ವಿಶೇಷ.
ಈ ಏಳು ಚಿತ್ರಗಳ ಪೈಕಿ ಪ್ರೇಕ್ಷಕರ ಕೃಪಾಕಟಾಕ್ಷ ಹೊಸ ಚಿತ್ರಗಳ ಮೇಲಿರುತ್ತದೋ ಅಥವಾ ಹಳೆಯ ಚಿತ್ರಗಳನ್ನೇ ಇನ್ನೊಮ್ಮೆ ಕಣ್ತುಂಬಿಕೊಳ್ಳುತ್ತಾರೋ ಎಂಬುದು ಶುಕ್ರವಾರ ಗೊತ್ತಾಗಲಿದೆ.
ಥಾಯ್ ಭಾಷೆಗೆ ಡಬ್ ಆದ ‘777 ಚಾರ್ಲಿ; ಡಿ.1ಕ್ಕೆ ಥಾಯ್ಲೆಂಡ್ನಲ್ಲಿ ಬಿಡುಗಡೆ