ನಾಯ್ಡಾ: ಉತ್ತರಪ್ರದೇಶದ ನಾಯ್ಡಾದಲ್ಲಿ ಕರೊನಾ ನಿರ್ಬಂಧಗಳನ್ನು ಗಾಳಿಗೆ ತೂರಿ ‘ಪೂಲ್ ಪಾರ್ಟಿ’ ನಡೆಸುತ್ತಿದ್ದ 61 ಜನರನ್ನು ಪೊಲೀಸರು ಬಂಧಿಸಿದ್ದಾರೆ. ಯಮುನಾ ಎಕ್ಸ್ಪ್ರೆಸ್ವೇ ಠಾಣಾ ವ್ಯಾಪ್ತಿಯಲ್ಲಿ ಬರುವ ಖಾಸಗಿ ಫಾರ್ಮ್ಹೌಸ್ ಒಂದರಲ್ಲಿ ಭಾನುವಾರ ರಾತ್ರಿ ಈ ಪ್ರಕರಣ ನಡೆದಿದೆ.
“ಸೆಕ್ಟರ್ 135 ರ ಯಮುನಾ ಪ್ರವಾಹ ಪ್ರದೇಶದಲ್ಲಿನ ಗ್ರೀನ್ ಬ್ಯೂಟಿ ಫಾರ್ಮ್ಹೌಸ್ನಲ್ಲಿ, ಕೋವಿಡ್ -19 ಪ್ರೋಟೋಕಾಲ್ಗಳನ್ನು ಉಲ್ಲಂಘಿಸಿ, ಪೂಲ್ ಪಾರ್ಟಿ ನಡೆಸಲಾಗುತ್ತಿತ್ತು. ಒಟ್ಟು 46 ಪುರುಷರು ಮತ್ತು 15 ಮಹಿಳೆಯರನ್ನು ಬಂಧಿಸಲಾಗಿದೆ” ಎಂದು ಪೊಲೀಸ್ ವಕ್ತಾರರು ತಿಳಿಸಿದ್ದಾರೆ.
“ಕರೊನಾ ಮುನ್ನೆಚ್ಚರಿಕೆಯನ್ನು ಮರೆತು ಆರೋಪಿಗಳು ಸ್ವಿಮ್ಮಿಂಗ್ ಪೂಲ್ನಲ್ಲಿ ಸ್ನಾನ ಮಾಡುತ್ತಿದ್ದರು. ಯಾರೂ ಮಾಸ್ಕ್ ತೊಟ್ಟಿರಲಿಲ್ಲ ಮತ್ತು ಕೆಲವರು ಫಾರ್ಮ್ ಹೌಸಿನ ಆವರಣದಲ್ಲಿ ಉಗಿಯುತ್ತಿದ್ದುದೂ ಕಂಡುಬಂತು” ಎಂದು ಪೊಲೀಸರು ತಿಳಿಸಿದ್ದಾರೆ. ಸ್ಥಳದಿಂದ ಹರಿಯಾಣದ ಸೀಲ್ ಹೊಂದಿದ 12 ಬಾಟಲ್ ಬೀರ್ ಮತ್ತು 2 ಬಾಟಲ್ ವಿಸ್ಕಿಯನ್ನು ಜಪ್ತಿಪಡಿಸಿಕೊಳ್ಳಲಾಗಿದೆ.
ಅನೇಕ ಆರೋಪಿಗಳು ದೆಹಲಿ ನಿವಾಸಿಗಳಾಗಿದ್ದು ಕೆಲವರು ಘಾಜಿಯಾಬಾದ್ ಮತ್ತು ಎನ್ಸಿಆರ್ನ ಪಟ್ಟಣಗಳಿಂದ ಬಂದವರಾಗಿದ್ದಾರೆ. ಕರೊನಾ ಮುನ್ನೆಚ್ಚರಿಕೆ ಮತ್ತು ನಿರ್ಬಂಧಗಳನ್ನು ಉಲ್ಲಂಘಿಸಿರುವುದರಿಂದ ಐಪಿಸಿ ಸೆಕ್ಷನ್ 188, 269 ಮತ್ತು 270 ರಡಿ ಎಫ್.ಐ.ಆರ್. ದಾಖಲಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. (ಏಜೆನ್ಸೀಸ್)
ಸಿದ್ದರಾಮಯ್ಯ ಸಿಎಂ ಆದ್ರೂ ಉಚಿತ ಬಿತ್ತನೆ ಬೀಜ, ಗೊಬ್ಬರ ಕೊಡಲು ಸಾಧ್ಯವಿಲ್ಲ : ಕೃಷಿ ಸಚಿವ ಬಿ.ಸಿ.ಪಾಟೀಲ್ ಟಾಂಗ್
VIDEO | ನೀರುತುಂಬಿದ ರಸ್ತೆಯಲ್ಲಿ ಕೂರಿಸಿ ಕಂಟ್ರಾಕ್ಟರ್ಗೆ ಕಸದ ಅಭಿಷೇಕ!