- ಸೇಂಟ್ ಜೋಸೆಫ್ಸ್ ಶಾಲೆ ಮೈದಾನದಲ್ಲಿ ಕೇಕ್ ಶೋ
- ಚಂದ್ರಯಾನ-3, ಶಿವಾಜಿ, ದುರ್ಗಾದೇವಿ ಮತ್ತಿತರ ಆಕೃತಿಗಳ ಅನಾವರಣ
ಬೆಂಗಳೂರು: ಕ್ರಿಸ್ಮಸ್ ಹಾಗೂ ಹೊಸ ವರ್ಷದ ಪ್ರಯುಕ್ತ “ಇನ್ಸ್ಟ್ಟಿಟ್ಯೂಟ್ ಆ್ ಬೇಕಿಂಗ್ ಆ್ಯಂಡ್ ಕೇಕ್ ಆರ್ಟ್’ (ಐಬಿಸಿಎ) ಮತ್ತು “ಮೈ ಬೇಕರ್ಸ್ ಮಾರ್ಟ್’ ಸಹಯೋಗದಲ್ಲಿ ಯುಬಿ ಸಿಟಿ ಬಳಿಯ ಸೇಂಟ್ ಜೋಸೆಫ್ಸ್ ಶಾಲಾ ಮೈದಾನದಲ್ಲಿ ಶುಕ್ರವಾರದಿಂದ ಹದಿನೈದು ದಿನಗಳ ಕಾಲ (ಡಿ.15& ಜ.1) 49ನೇ ಕೇಕ್ ಶೋ ಆಯೋಜಿಸಲಾಗಿದೆ.
ನವದೆಹಲಿಯ ನೂತನ ಸಂಸತ್ ಭವನ ಹಾಗೂ “ಚಂದ್ರಯಾನ&3′ ಈ ಬಾರಿಯ ಮತ್ತು ರಾಜ್ಯ ಸರ್ಕಾರದ ಐದು ಗ್ಯಾರಂಟಿಗಳಲ್ಲಿ ಒಂದಾದ ಉಚಿತ ಬಸ್ ಪ್ರಯಾಣ ಯೋಜನೆ ಪರಿಚಯಿಸುವ “ಶಕ್ತಿ’ ಕೇಕ್ ಪ್ರದರ್ಶನದ ಪ್ರಮುಖ ಆಕರ್ಷಣೆಗಳಾಗಿವೆ. ಇವಲ್ಲದೆ ಶಿವಾಜಿ ಮಹಾರಾಜ್ ಕೇಕ್, ದುರ್ಗಾದೇವಿ, ಶಾಪಿಂಗ್ ಕ್ಯಾಮಲ್ ಕೇಕ್, ಅಲಿಗೇಟರ್ ಇನ್ ಎ ಸ್ವಾಂಪ್ ಕೇಕ್, ಡಾಲ್ ಕೇಕ್ ಸೇರಿ 20ಕ್ಕೂ ಹೆಚ್ಚು ಕೇಕ್ ಆಕೃತಿಗಳು ಪ್ರೇಕ್ಷಕರನ್ನು ಚಕಿತಗೊಳಿಸಲು ಅಣಿಯಾಗಿವೆ.
ಸಂಸತ್ ಭವನದ ಪ್ರತಿಕೃತಿ: ನವದೆಹಲಿಯ ನೂತನ ಸಂಸತ್ ಭವನ ವೇದಕಾಲದಿಂದ ಈವರೆಗಿನ ಪರಂಪರೆಯ ಕಥೆಗಳನ್ನು ಸಾರಿದೆ. ದೇಶದಲ್ಲಿ ಪ್ರಜಾಪ್ರಭುತ್ವ ವ್ಯವಸ್ಥೆ ಬೆಳೆದುಬಂದ ಹಾದಿಯನ್ನು ಬಿಂಬಿಸುವ ಹಲವು ವಸ್ತುಗಳನ್ನು ಇದರಲ್ಲಿ ಪ್ರದರ್ಶಿಸಲಾಗಿದೆ. ಸುಮಾರು 14 ಅಡಿ ಅಗಲ, 14 ಅಡಿ ಉದ್ದ ಹಾಗೂ 9 ಅಡಿ ಎತ್ತರ ಇರುವ 1,120 ಕೆ.ಜಿ. ತೂಕದ ಈ ಕೇಕ್ ಅನ್ನು ಸಂಪೂರ್ಣ ಸಕ್ಕರೆ ಮತ್ತು ಆಹಾರದ ಬಣ್ಣ ಬಳಸಿ ನಿರ್ಮಿಸಲಾಗಿದ್ದು, ಇದಕ್ಕಾಗಿ ಕಲಾವಿದರು ಎರಡೂವರೆ ತಿಂಗಳ ಕಾಲ ಶ್ರಮಪಟ್ಟಿದ್ದಾರೆ.
ಚಂದ್ರಯಾನ 3: ಭಾರತದ ಹೆಮ್ಮೆಯ ಕ್ಷಣವಾದ ಚಂದ್ರಯಾನ & 3 ಉಡಾವಣೆಯ ಸಂಭ್ರಮಾಚರಣೆಗಾಗಿ ಲ್ಯಾಂಡರ್ ಮತ್ತು ರೋವರ್ನ ಸಕ್ಕರೆ ಪ್ರತಿಕೃತಿಯನ್ನು ರಚಿಸಲಾಗಿದೆ. ಇದು ಮಿಷನ್ನ ನಿಖರತೆ ಮತ್ತು ನಾವೀನ್ಯತೆಯನ್ನು ಪ್ರತಿಬಿಂಬಿಸುತ್ತದೆ. ಇದರ ಮೂಲಕ ಬಾಹ್ಯಾಕಾಶ ಸಂಶೋಧನೆಯ ಸಾರವನ್ನು ಮರುಸೃಷ್ಟಿಸಲಾಗಿದೆ. ಸುಮಾರು 4 ಅಡಿ ಅಗಲ, 4 ಅಡಿ ಉದ್ದ ಹಾಗೂ 3 ಅಡಿ ಎತ್ತರದ ಈ ಕೇಕ್ಅನ್ನು 25 ದಿನಗಳ ಶ್ರಮದೊಂದಿಗೆ ಕಲಾವಿದರು ನಿರ್ಮಿಸಿದ್ದಾರೆ.
ಕಲಾವಿದರ ಕೈಚಳಕ: ಸಕ್ಕರೆ, ಚಾಕೊಲೇಟ್, ಕ್ರೀಮ್, ಮೊಟ್ಟೆ, ಕಾರ್ನ್ ಫ್ಲೋರ್, ಎಡಿಬಲ್ ಗಮ್ ಹಾಗೂ ಇತರ ಪರಿಕರಗಳನ್ನು ಬಳಸಿ 20ಕ್ಕೂ ಹೆಚ್ಚು ಅಕರ್ಷಕ ಕೇಕ್ ಕಲಾಕೃತಿಗಳನ್ನು ನಿರ್ಮಿಸಲಾಗಿದೆ. ಸುಮಾರು 20 ಸಾವಿರ ಚದರ ಮೀಟರ್ ವ್ಯಾಪ್ತಿಯಲ್ಲಿ ಅನಾವರಣಗೊಳ್ಳಲಿವೆ.
ಪ್ರವೇಶ ದರ : ಕೇಕ್ ಪ್ರಸದರ್ಶನ ಕಣ್ತುಂಬಿಕೊಳ್ಳಲು ಬಯಸುವವ ಎಲ್ಲ ವಯೋಮಾನದವರಿಗೆ 100 ರೂ. ಪ್ರವೇಶ ದರ ನಿಗದಿಪಡಿಲಾಗಿದೆ. ನಿತ್ಯ ಬೆಳಗ್ಗೆ 11ರಿಂದ ರಾತ್ರಿ 9ರವರೆಗೆ ಪ್ರದರ್ಶನ ನಡೆಯಲಿದೆ.