ಭಾರತೀಯ ಚಿತ್ರರಂಗದಲ್ಲೇ ನೂರು ಕೋಟಿ ಸಂಪಾದಿಸಿದ ಚಿತ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾದ ಚಿತ್ರದ ಎಂದರೆ ಅದು ಸಲ್ಮಾನ್ ಖಾನ್ ಮತ್ತು ಮಾಧುರಿ ದೀಕ್ಷಿತ್ ಅಭಿನಯದ ‘ಹಂ ಆಪ್ಕೆ ಹೇ ಕೌನ್’. ಈ ಚಿತ್ರ ಆ ಕಾಲಕ್ಕೆ ಅದೆಂಥಾ ಹವಾ ಸೃಷ್ಟಿಸಿತ್ತು ಎಂದರೆ, ಚಿತ್ರ ಬಿಡುಗಡೆಯಾಗಿ ಎರಡ್ಮೂರು ವರ್ಷಗಳ ಕಾಲ ಅದರ ಬಗ್ಗೆಯೇ ಚರ್ಚೆಯಾಗಿತ್ತು.
ಈಗ್ಯಾಕೆ ಈ ಚಿತ್ರದ ವಿಷಯವೆಂದರೆ, ಈ ಐಕಾನಿಕ್ ಚಿತ್ರ ಬಿಡುಗಡೆಯಾಗಿ ಇಂದಿಗೆ 26 ವರ್ಷಗಳಾಗಿವೆ. 1994ರಲ್ಲಿ ಇದೇ ದಿನ ಈ ಚಿತ್ರ ಬಿಡುಗಡೆಯಾಗಿತ್ತು. ಚಿತ್ರದ ಅವಧಿ ಹೆಚ್ಚಿದ್ದರಿಂದ, ಇಷ್ಟೊಂದು ದೊಡ್ಡ ಚಿತ್ರವನ್ನು ಯಾರು ನೋಡುತ್ತಾರೆ ಎಂಬ ಪ್ರಶ್ನೆ ಕೇಳಿಬಂದಿತ್ತು.
ಇದನ್ನೂ ಓದಿ: ನವೆಂಬರ್ನಲ್ಲಿ ಫೀಲ್ಡ್ಗೆ ಇಳಿಯುತ್ತಾರಂತೆ ಸಲ್ಮಾನ್ ಖಾನ್
ಏಕೆಂದರೆ, ಅದಕ್ಕೂ ಮುಂಚಿನ ಕೆಲವು ವರ್ಷಗಳಲ್ಲಿ, ಅಷ್ಟೊಂದು ದೊಡ್ಡ ಚಿತ್ರ ಯಾವುದೂ ಬಂದಿರಲಿಲ್ಲ. ಹಾಗಾಗಿ ‘ಹಂ ಆಪ್ಕೆ ಹೇ ಕೌನ್’ ಚಿತ್ರವನ್ನು ಜನ ನೋಡುತ್ತಾರಾ ಎಂಬ ಪ್ರಶ್ನೆ ಸಹಜವಾಗಿಯೇ ಬಾಲಿವುಡ್ ವಲಯದಲ್ಲಿ ಇತ್ತು. ಆದರೆ, ಎಲ್ಲರ ನಿರೀಕ್ಷೆಗಳನ್ನು ತಲೆಕೆಳಗೆ ಮಾಡಿ, ಚಿತ್ರ ಅದ್ಭುತ ಯಶಸ್ಸು ಸಾಧಿಸಿತು. ಈ ಚಿತ್ರದ ನಂತರ ಸಲ್ಮಾನ್ ಖಾನ್ ಸೂಪರ್ ಸ್ಟಾರ್ ಆದರು.
ಈಗ ಚಿತ್ರ 26 ವರ್ಷಗಳನ್ನು ಪೂರೈಸಿದ ಖುಷಿಯನ್ನು, ಆ ಚಿತ್ರದ ನಾಯಕಿ ಮಾಧುರಿ ದೀಕ್ಷಿತ್ ಹಂಚಿಕೊಂಡಿದ್ದಾರೆ. ಅಷ್ಟೇ ಅಲ್ಲ, ಆ ಚಿತ್ರದ ಒಂದು ಐಕಾನಿಕ್ ಫೋಟೋ ಜತೆಗೆ, ಅದೇ ಮಾದರಿಯಲ್ಲಿ ನಂತರದ ವರ್ಷಗಳಲ್ಲಿ ತೆಗೆದು ಇನ್ನೊಂದು ಫೋಟೋ ಸೇರಿಸಿ ತಮ್ಮ ಅಭಿಮಾನಿಗಳ ಜತೆಗೆ ಹಂಚಿಕೊಂಡಿದ್ದಾರೆ.
ಇದನ್ನೂ ಓದಿ: ಸಲ್ಮಾನ್ ಖಾನ್ ಟೈಗರ್ ಸರಣಿಯ ಮೂರನೇ ಚಿತ್ರ ನಿರ್ದೇಶಿಸುವವರು ಇವರೇ!
ಈ ಕುರಿತು ಟ್ವೀಟ್ ಮಾಡಿರುವ ಅವರು. ”ಹಂ ಆಪ್ಕೆ ಹೇ ಕೌನ್’ ಚಿತ್ರಕ್ಕೆ 26 ವರ್ಷಗಳು ಪೂರೈಸಿವೆ ಎಂಬುದನ್ನು ನಂಬುವುದಕ್ಕೇ ಸಾಧ್ಯವಾಗುತ್ತಿಲ್ಲ. ಆ ಚಿತ್ರವು ಇನ್ನೂ ನೆನಪಲ್ಲಿ ಹಸಿರಾಗಿದೆ. ಅದಕ್ಕೆ ಕಾರಣ, ಒಂದು ಅದ್ಭುತ ತಂಡದ ಪರಿಶ್ರಮ. ಪ್ರತಿಯೊಂದು ದೃಶ್ಯ ಸೆರೆ ಹಿಡಿಯುವುದಕ್ಕೆ ಚಿತ್ರತಂಡ ಪಟ್ಟ ಶ್ರಮ ಅದ್ಭುತ. ಆ ಚಿತ್ರ ಹಿಟ್ ಆಗಿದ್ದಷ್ಟೇ ಅಲ್ಲ, ಈಗಲೂ ಜನ ಅದರ ಬಗ್ಗೆ ಮಾತಾಡಿಕೊಳ್ಳುತ್ತಾರೆ. ಇಂಥದ್ದೊಂದು ಚಿತ್ರವನ್ನು ಯಶಸ್ವಿಗೊಳಿಸಿದ ಎಲ್ಲರಿಗೂ ಥ್ಯಾಂಕ್ಸ್’ ಎಂದು ಅವರು ಧನ್ಯವಾದ ಹೇಳಿದ್ದಾರೆ.
‘ಹಂ ಆಪ್ಕೆ ಹೇ ಕೌನ್’ ಚಿತ್ರದಲ್ಲಿ ಸಲ್ಮಾನ್ ಮತ್ತು ಮಾಧುರಿ ಜತೆಗೆ ಅನುಪಂ ಖೇರ್, ರೀಮಾ ಲಾಗೂ, ಅಲೋಕ್ ನಾಥ್, ರೇಣುಕಾ ಶಹಾನೆ, ಮೊನಿಶ್ ಬೆಹ್ಲ್ ಮುಂತಾದವರು ಅಭಿನಯಿಸಿದ್ದು, ಸೂರಜ್ ಬರ್ಜಾತ್ಯ ನಿರ್ದೇಶನ ಮಾಡಿದ್ದಾರೆ.