ಹಳಿಯಾಳ: ಸರ್ಕಾರದ ನಿಯಮಾವಳಿಯಂತೆ ಸೋಮವಾರದಿಂದ ಮದ್ಯ ಮಾರಾಟ ಮಾಡಲು ಪಟ್ಟಣದಲ್ಲಿ ಭರ್ಜರಿ ಸಿದ್ಧತೆ ನಡೆದಿದೆ.
ಮದ್ಯ ಮಾರಾಟ ಹಿನ್ನೆಲೆಯಲ್ಲಿ ಭಾನುವಾರ ಸಂಜೆ ಮಿನಿ ವಿಧಾನ ಸೌದದಲ್ಲಿ ತಾಲೂಕಾಡಳಿತವು ಮದ್ಯ ಮಾರಾಟಗಾರರ ಸಭೆ ನಡೆಸಿ ಸೂಕ್ತ ನಿರ್ದೇಶನ ನೀಡಿದೆ. ಅಬಕಾರಿ ಇಲಾಖೆ ಎಸ್ಐ ಮಂಜುಕುಮಾರ ನಾಯ್ಕ ನೇತೃತ್ವದ ತಂಡ ಪಟ್ಟಣಕ್ಕೆ ಆಗಮಿಸಿ ಎಲ್ಲ ಸಿಎಲ್-2 ಮತ್ತು 11 ಲೈಸೆನ್ಸ್ ಪಡೆದ ಶಾಪ್ಗಳಿಗೆ ಭೇಟಿ ನೀಡಿ ಸಿದ್ಧತೆ ಪರಿಶೀಲಿಸಿ ಸೂಕ್ತ ಮಾರ್ಗದರ್ಶನ ನೀಡಿದೆ.
ಪಟ್ಟಣದಲ್ಲಿ ಸಿಎಲ್-11 ಲೈಸೆನ್ಸ್ ಪಡೆದಿರುವ ಎಂಎಸ್ಐಎಲ್ ಮಳಿಗೆ 1 ಹಾಗೂ ಸಿಎಲ್ ಲೈಸೆನ್ಸ್ ಹೊಂದಿರುವ 6 ವೈನ್ಶಾಪ್ಗಳಿವೆ. ಗ್ರಾಮಾಂತರ ಭಾಗ ಮುರ್ಕವಾಡದಲ್ಲಿ 1 ವೈನ್ಶಾಪ್ ಇದೆ.
ಬಂದೋಬಸ್ತ್: ಜನಜಂಗುಳಿ ತಡೆಯಲು ಹಾಗೂ ನಿಯಮಾವಳಿಯಂತೆ ಐದು ಜನರಿಗೆ ಸರದಿಯಲ್ಲಿ ಮದ್ಯ ಮಾರಾಟ ಮಾಡಲು ಅನುಕೂಲವಾಗುವಂತೆ ಮದ್ಯದಂಗಡಿಗಳ ಮುಂದೆ ಬ್ಯಾರಿಕೇಡ್ ಅಳವಡಿಸಲಾಗಿದೆ. ಗ್ರಾಹಕರು ಸಾಮಾಜಿಕ ಅಂತರ ಕಾಪಾಡಲು ಚೌಕಾಕಾರದ ಗುರುತು ಮಾಡಲಾಗಿದೆ. ಕೇವಲ ಪಾರ್ಸಲ್ಗೆ ಅವಕಾಶವಿದ್ದು, ವೈನ್ಶಾಪ್ಗಳಲ್ಲಿ ಕುಡಿಯಲು ನಿರ್ಬಂಧ ವಿಧಿಸಿರುವುದರಿಂದ ಜನ ಸಾರ್ವಜನಿಕ ಸ್ಥಳಗಳನ್ನು ಬಳಸುವ ಸಾಧ್ಯತೆಗಳಿವೆ. ತಾಲೂಕು ಕ್ರೀಡಾಂಗಣ, ಮರಡಿ ಗುಡ್ಡ ಹಾಗೂ ಕಿಲ್ಲಾ ಕೋಟೆಯ ನಿಸರ್ಗ ಉದ್ಯಾನಗಳು, ಪುರಸಭೆಯ ವಲ್ಲಭಬಾಯಿ ಉದ್ಯಾನ, ಕುಸ್ತಿ ಅಖಾಡಾ, ಎಪಿಎಂಸಿ ಪ್ರಾಂಗಣ, ಗುತ್ತಿಗೆರೆ ಕೆರೆ ಮೊದಲಾದವುಗಳು ಡ್ರಿಂಕ್ಸ್ ಸ್ಪಾಟ್ಗಳಾಗಿದ್ದು ಈ ಸ್ಥಳಗಳಲ್ಲಿ ತಾಲೂಕಾಡಳಿತ ಬಿಗಿ ಬಂದೋಬಸ್ತ್ ಮಾಡಿದೆ.
ಗ್ರಾಹಕರು ಕಡ್ಡಾಯವಾಗಿ ಮಾಸ್ಕ್ ಧರಿಸಬೇಕು. ಮಾಸ್ಕ್ ಧರಿಸದವರಿಗೆ ಮದ್ಯ ಮಾರಾಟ ಮಾಡಬಾರದು. ಸರ್ಕಾರದ ನಿಯಮಾವಳಿ ಉಲ್ಲಂಘಿಸಿ ಮದ್ಯ ಮಾರಾಟ ಮಾಡುವುದು ಕಂಡು ಬಂದಲ್ಲಿ ಅಂತಹವರ ಪರವಾನಗಿ ರದ್ದುಗೊಳಿಸುತ್ತೇವೆ.
| ಮಂಜುಕುಮಾರ ನಾಯ್ಕ ಅಬಕಾರಿ ಇಲಾಖೆ ಎಸ್ಐ
ಅಂಗಡಿಗಳ ಮುಂದೆ ಮಾರ್ಕ್
ಮುಂಡಗೋಡ: ಸಾಮಾಜಿಕ ಅಂತರ ಕಾಯ್ದುಕೊಳ್ಳಲು ಪಟ್ಟಣದ ವೈನ್ಶಾಪ್ ಮಾಲೀಕರು ಅಂಗಡಿಗಳ ಮುಂದೆ ಮಾರ್ಕ್ ಮಾಡಿದ್ದಾರೆ. ತಾಲೂಕಿನಲ್ಲಿ ಒಟ್ಟು 5 ಮದ್ಯದ ಅಂಗಡಿಗಳಿವೆ. ಪಟ್ಟಣದಲ್ಲಿರುವ 3 ಮದ್ಯದ ಅಂಗಡಿ ಬ್ಯಾರಿಕೇಡ್ಗಳನ್ನು ಅಳವಡಿಸಲಾಗಿದೆ. ಜನಸಂದಣಿ ಜಾಸ್ತಿ ಆಗುವ ಸಾಧ್ಯತೆ ಇರುವುದರಿಂದ ಮದ್ಯದಂಗಡಿಯ ಮಾಲೀಕರು ಈಗಾಗಲೇ ಎಲ್ಲ ತಯಾರಿ ಮಾಡಿಕೊಂಡಿದ್ದಾರೆ. ಬೆಳಗ್ಗೆ 9ರಿಂದ ಸಾಯಂಕಾಲ 7 ಗಂಟೆಯವರೆಗೆ ಮದ್ಯದಂಗಡಿ ತೆರೆಯಲು ಅವಕಾಶ ನೀಡಲಾಗಿದೆ. ಮಾ. 24ರಿಂದ ಮದ್ಯದಂಗಡಿಗಳು ಬಂದ್ ಆಗಿದ್ದವು. ದೀರ್ಘ ಸಮಯದ ನಂತರ ಮತ್ತೆ ಮದ್ಯದಂಗಡಿಗಳ ಬಾಗಿಲು ತೆರೆಯುತ್ತಿರುವುದರಿಂದ ಮದ್ಯ ಪ್ರಿಯರಿಗೆ ಸಂತಸ ಉಂಟು ಮಾಡಿದೆ.