ಹುಬ್ಬಳ್ಳಿ: ಎಚ್ಡಿಬಿಆರ್ಟಿಎಸ್ ಮಾರ್ಗವನ್ನು ಮತ್ತಷ್ಟು ಸ್ಮಾರ್ಟ್ಗೊಳಿಸುವ ಮೂಲಕ ಈ ಬಸ್ಗಳ ಸಂಚಾರವನ್ನು ಇನ್ನಷ್ಟು ಪರಿಣಾಮಕಾರಿಗೊಳಿಸಲು ಹುಬ್ಬಳ್ಳಿ-ಧಾರವಾಡ ಸ್ಮಾರ್ಟ್ಸಿಟಿ ಕಂಪನಿ ಮುಂದಾಗಿದೆ.
ಅವಳಿ ನಗರ ಮಧ್ಯದ ಬಿಆರ್ಟಿಎಸ್ ಮಾರ್ಗದಲ್ಲಿ ಚಿಗರಿ ಬಸ್ಗಳನ್ನು ಹೊರತುಪಡಿಸಿ ಬೇರೆ ವಾಹನಗಳು ಪ್ರವೇಶಿಸದಂತೆ ಸದ್ಯ ಬ್ಯಾರಿಕೇಡ್ಗಳನ್ನು ಇಡಲಾಗಿದೆ. ಚಿಗರಿ ಬಸ್ ಬಂದಾಗ ಬ್ಯಾರಿಕೇಡ್ ತೆಗೆಯಲು ಹಾಗೂ ಬಸ್ ಹೋದ ನಂತರ ಮತ್ತೆ ಬ್ಯಾರಿಕೇಡ್ ಹಾಕುವುದಕ್ಕಾಗಿ ಖಾಸಗಿ ಭದ್ರತಾ ಸಿಬ್ಬಂದಿ ನೇಮಿಸಲಾಗಿದೆ.
ಖಾಸಗಿ ಭದ್ರತಾ ಸಿಬ್ಬಂದಿಗಾಗಿ ಎಚ್ಡಿಬಿಆರ್ಟಿಎಸ್ ಪ್ರತ್ಯೇಕ ವೇತನ ಪಾವತಿಸುತ್ತಿದೆ. ಬಸ್ ಬರುವುದನ್ನು ದೂರದಿಂದಲೇ ನೋಡಿ, ಸಮೀಪಿಸಿದಾಗ ಬ್ಯಾರಿಕೇಡ್ ತೆಗೆದು, ಮತ್ತೆ ಮೊದಲಿನಂತೆ ಹಾಕುವುದು ಖಾಸಗಿ ಭದ್ರತಾ ಸಿಬ್ಬಂದಿಯ ನಿತ್ಯದ ಕೆಲಸ.
ಈ ಕೆಲಸವನ್ನು ಸ್ಮಾರ್ಟ್ ಆಗಿಸಲು ಹು-ಧಾ ಸ್ಮಾರ್ಟ್ಸಿಟಿ ಕಂಪನಿ 5 ಕೋಟಿ ರೂ. ವೆಚ್ಚದಲ್ಲಿ ಎಚ್ಡಿಬಿಆರ್ಟಿಎಸ್ ಮಾರ್ಗದ ಪ್ರತಿ ಝೀಬ್ರಾ ಕ್ರಾಸ್ ನಂತರದ ಪ್ರವೇಶ ದ್ವಾರದಲ್ಲಿ ಬೂಮ್ ಬ್ಯಾರಿಯರ್ಸ್ (ಸ್ವಯಂ ಚಾಲಿತ ಗೇಟ್) ಅಳವಡಿಸಲಿದೆ.
ಬಿಆರ್ಟಿಎಸ್ ಮಾರ್ಗದಲ್ಲಿ 30ರಷ್ಟು ಝೀಬ್ರಾ ಕ್ರಾಸ್ಗಳಿವೆ. ಚಿಗರಿ ಬಸ್ ಪ್ರವೇಶಿಸುವ ಬಿಆರ್ಟಿಎಸ್ನ ಎರಡೂ ಮಾರ್ಗದಲ್ಲಿ ಬೂಮ್ ಬ್ಯಾರಿಯರ್ಸ್ ಅಳವಡಿಸಲಾಗುವುದು.
ಈಗಾಗಲೇ ಜಾರಿಯಲ್ಲಿರುವ ಫಾಸ್ಟ್ಟ್ಯಾಗ್ ಮಾದರಿಯಲ್ಲಿ ಚಿಗರಿ ಬಸ್ಗಳಿಗೆ ಪ್ರತ್ಯೇಕ ಟ್ಯಾಗ್ ಅಳವಡಿಸಲಾಗುವುದು. ಅಂಥ ಚಿಗರಿ ಬಸ್ ಸಮೀಪಿಸಿದ ತಕ್ಷಣ ಬೂಮ್ ಬ್ಯಾರಿಯರ್ಸ್ ಸ್ವಯಂ ಚಾಲಿತವಾಗಿ ತೆರೆಯುತ್ತದೆ.
ಮುಂಬೈ ಗುರಗಾಂವ್ನ ಟೆಕ್ನೊಕ್ರ್ಯಾಟ್ಸ್ ಸೆಕ್ಯುರಿಟಿ ಸಿಸ್ಟಮ್ ಪ್ರೖೆ.ಲಿ. ಸಂಸ್ಥೆಗೆ ಬೂಮ್ ಬ್ಯಾರಿಯರ್ಸ್ ಅಳವಡಿಸುವ ಒಪ್ಪಂದದ ಜೊತೆಗೆ 5 ವರ್ಷ ನಿರ್ವಹಣೆಯ ಗುತ್ತಿಗೆ ನೀಡಲಾಗಿದೆ. ಈ ಸಂಸ್ಥೆ 3.87 ಕೋಟಿ ರೂ. ವೆಚ್ಚದಲ್ಲಿ ಎಚ್ಡಿಬಿಆರ್ಟಿಎಸ್ ಮಾರ್ಗದಲ್ಲಿ ಬೂಮ್ ಬ್ಯಾರಿಯರ್ಸ್ ಅಳವಡಿಸಲಿದೆ. ಇನ್ನುಳಿದ ಬಾಕಿ ಹಣವನ್ನು ಎಚ್ಡಿಬಿಆರ್ಟಿಎಸ್ ಬಳಕೆ ಮಾಡಿಕೊಳ್ಳಲಿದೆ.
15 ದಿನಗಳಲ್ಲಿ ಟೆಕ್ನೊಕ್ರ್ಯಾಟ್ಸ್ ಸೆಕ್ಯುರಿಟಿ ಸಿಸ್ಟೆಮ್ ಪ್ರೖೆ.ಲಿ. ಸಂಸ್ಥೆ ಬೂಮ್ ಬ್ಯಾರಿಯರ್ಸ್ ಅಳವಡಿಸುವುದಕ್ಕಾಗಿ ಸ್ಮಾರ್ಟ್ಸಿಟಿ ಕಂಪನಿಯೊಂದಿಗೆ ಒಪ್ಪಂದಕ್ಕೆ ಸಹಿ ಹಾಕಲಿದ್ದು, ನಂತರದ 12 ತಿಂಗಳೊಳಗೆ ಬ್ಯಾರಿಯರ್ಸ್ ಅಳವಡಿಸುವ ಕಾರ್ಯ ಪೂರ್ಣಗೊಳಿಸಲಿದೆ.
ಯಾರ್ಯಾರಿಗೆ ಫಾಸ್ಟ್ಟ್ಯಾಗ್?
ಚಿಗರಿ ಬಸ್ಗಳ ಜೊತೆಗೆ ಜಿಲ್ಲೆ ಹಾಗೂ ಅಕ್ಕಪಕ್ಕದ ಜಿಲ್ಲೆಗಳ ಎಲ್ಲ ಆಂಬುಲೆನ್ಸ್ಗಳಿಗೆ, ಅಗ್ನಿಶಾಮಕ ವಾಹನಗಳಿಗೆ, ಜಿಲ್ಲಾಧಿಕಾರಿ, ಪೊಲೀಸ್ ಆಯುಕ್ತರು, ಎಸ್ಪಿ, ಪ್ರಮುಖ ಅಧಿಕಾರಿಗಳ ಮತ್ತು ಬೆಂಗಾವಲು ಪಡೆಗಳ ವಾಹನಗಳಿಗೆ ಫಾಸ್ಟ್ಟ್ಯಾಗ್ ಮಾದರಿಯ ಟ್ಯಾಗ್ ಅಳವಡಿಸಲಾಗುವುದು.
ದೇಶದ ವಿವಿಧೆಡೆ ಇರುವ ಬಿಆರ್ಟಿಎಸ್ ಬಸ್ನ ಯಾವುದೇ ಮಾರ್ಗದಲ್ಲಿ ಬೂಮ್ ಬ್ಯಾರಿಯರ್ಸ್ ಅಳವಡಿಸಿಲ್ಲ. ಎಚ್ಡಿಬಿಆರ್ಟಿಎಸ್ ಮಾರ್ಗದಲ್ಲಿ ಅಳವಡಿಸುತ್ತಿರುವ ಬೂಮ್ ಬ್ಯಾರಿಯರ್ಸ್ ಒಂದು ಮಾದರಿಯಾಗಿರಲಿದೆ.
| ಎಸ್.ಎಚ್. ನರೇಗಲ್, ಹು-ಧಾ ಸ್ಮಾರ್ಟ್ಸಿಟಿ ಕಂಪನಿ ವಿಶೇಷ ಅಧಿಕಾರಿ