ಜಿನೇವಾ: ಕರೊನಾ ವೈರಸ್ COVID19ರ ಕೆಟ್ಟ ಪರಿಣಾಮ ಇನ್ನೂ ವ್ಯಕ್ತವಾಗಿಲ್ಲ. ಅದು ಇನ್ನು ಮುಂದಿದೆ. ಅದನ್ನು ಎದುರಿಸುವುದಕ್ಕೆ ಸಜ್ಜಾಗಬೇಕು ಎಂದು ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯುಎಚ್ಒ) ಡೈರೆಕ್ಟರ್ ಜನರಲ್ ಟೆಡ್ರೋಸ್ ಅಧನೊಂ ಘೆಬ್ರೆಯೆಸೆಸ್ ಎಚ್ಚರಿಸಿದ್ದಾರೆ.
ಜಗತ್ತಿನಾದ್ಯಂತ ಲಕ್ಷಾಂತರ ಜನರಿಗೆ ತಗುಲಿರುವ ಸೋಂಕು, ಸಾವಿರಾರು ಜನರ ಪ್ರಾಣವನ್ನೂ ಬಲಿತೆಗೆದುಕೊಂಡಿದೆ. ಈ ಸಾಂಕ್ರಾಮಿಕ ರೋಗದ ಭೀಕರತೆ ಇನ್ನಷ್ಟೇ ಗೋಚರಿಸಲಿದೆ. ಅದಕ್ಕಾಗಿ ಸಿದ್ಧರಾಗಬೇಕು ಎಂದು ಟೆಡ್ರೋಸ್ ಸುದ್ದಿಗೋಷ್ಠಿಯಲ್ಲಿ ಹೇಳಿದ್ದಾರೆ.
ನಮ್ಮನ್ನು ನಂಬಿ. ಮುಂದೆ ಭಾರಿ ಕೆಟ್ಟ ಪರಿಣಾಮಗಳನ್ನು ಎದುರಿಸಬೇಕಾಗಿದೆ. ದುರಂತವನ್ನು ತಡೆಯೋಣ. ಸೋಂಕು ಹರಡುತ್ತಿರುವುದು ವೈರಸ್ ಎಂಬುದು ಇನ್ನೂ ಅನೇಕ ಜನರು ಅರ್ಥಮಾಡಿಕೊಳ್ಳುತ್ತಿಲ್ಲ. ಡಬ್ಲ್ಯುಎಚ್ಒ ಆರೋಗ್ಯಕ್ಕೆ ಸಂಬಂಧಿಸಿದ ವಿಚಾರದಲ್ಲಿ ಗೌಪ್ಯತೆ ಮಾಡುತ್ತಿಲ್ಲ. ಮುಚ್ಚಿಸುವಂತಹ ಯಾವ ವಿಷಯವೂ ಇಲ್ಲಿಲ್ಲ. ಈ ವೈರಸ್ ಬಹಳ ಅಪಾಯಕಾರಿಯಾದುದು. ನಮ್ಮೊಳಗೆ ಭಿನ್ನಾಭಿಪ್ರಾಯಗಳು ಬಂದಾಗ ಅದರ ಲಾಭ ವೈರಸ್ ಪಾಲಾಗುತ್ತದೆ ಎಂದು ಟೆಡ್ರೋಸ್ ಪರೋಕ್ಷವಾಗಿ ಅಮೆರಿಕವನ್ನು ಎಚ್ಚರಿಸಿದ್ದಾರೆ.
ಅಮೆರಿಕದ ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್ ಆ್ಯಂಡ್ ಪ್ರಿವೆನ್ಶನ್ ಸಿಬ್ಬಂದಿ ಡಬ್ಲ್ಯುಎಚ್ಒ ಕೆಲಸವನ್ನು ಬೆಂಬಲಿಸುತ್ತಿದ್ದಾರೆ. ಇದು ಡಬ್ಲ್ಯುಎಚ್ಒ ಇಟ್ಟುಕೊಂಡಿರುವ ಪಾರದರ್ಶಕತೆಯ ಫಲ. ಅಮೆರಿಕದಿಂದ ಮುಚ್ಚಿಡುವಂತದ್ದು ಏನೂ ಇಲ್ಲ. ನಮ್ಮಲ್ಲಿರುವ ಮಾಹಿತಿಯನ್ನು ಯಾರು ಕೇಳಿದರೂ ತತ್ಕ್ಷಣವೇ ಕೊಡುತ್ತಿದ್ದೇವೆ ಇದು ಸಿಡಿಸಿ ಸಿಬ್ಬಂದಿಗಳಿಗೂ ಗೊತ್ತಿರುವ ವಿಚಾರವೇ ಎಂದು ಟೆಡ್ರೋಸ್ ತಮ್ಮ ನಡೆಯನ್ನು, ನಿಲುವನ್ನು ಸಮರ್ಥಿಸಿಕೊಳ್ಳುವ ಪ್ರಯತ್ನಮಾಡಿದ್ದಾರೆ. (ಏಜೆನ್ಸೀಸ್)
ಡಬ್ಲ್ಯುಎಚ್ಒ ಮುಖ್ಯಸ್ಥ ರಾಜೀನಾಮೆ ಕೊಡಲಿ- ಇಲ್ಲಾಂದ್ರೆ ಫಂಡ್ ಕೊಡಬೇಡಿ- ಅಧ್ಯಕ್ಷ ಟ್ರಂಪ್ಗೆ ರಿಪಬ್ಲಿಕನ್ನರ ಒತ್ತಡ