ಲಂಡನ್: ವಿಂಬಲ್ಡನ್ ಉಳಿದೆಲ್ಲ ಟೆನಿಸ್ ಗ್ರಾಂಡ್ ಸ್ಲಾಂಗಳಿಗಿಂತ ಭಿನ್ನವಾದ ನಿಯಮಾವಳಿಗಳನ್ನು ಹೊಂದಿದೆ. ಟೂರ್ನಿಯಲ್ಲಿ ಆಡುವ ಎಲ್ಲರೂ ಬಿಳಿ ಸಮವಸ್ತ್ರ ಧರಿಸಬೇಕೆಂಬುದು ಅದರಲ್ಲಿ ಪ್ರಮುಖವಾದ ಕಟ್ಟುಪಾಡು ಆಗಿತ್ತು. ಆದರೆ, ಈ ಬಾರಿ ಸಂಪೂರ್ಣ ಬಿಳಿ ಸಮವಸ್ತ್ರದ ಕಟ್ಟುನಿಟ್ಟಿನ ನಿಯಮವನ್ನು ವಿಂಬಲ್ಡನ್ನಲ್ಲಿ ಸಡಿಲಗೊಳಿಸಲಾಗಿದೆ. ಒಳಉಡುಪುಗಳೂ ಬಿಳಿ ಬಣ್ಣದ್ದಾಗಿರಬೇಕೆಂಬ ನಿಯಮವನ್ನು ಕೈಬಿಡಲಾಗಿದೆ. ಆಟಗಾರ್ತಿಯರ ಋತುಸ್ರಾವದ ದಿನಗಳ ಆತಂಕವನ್ನು ತಪ್ಪಿಸಲು ಈ ಬದಲಾವಣೆ ಮಾಡಲಾಗಿದೆ. ಇದಕ್ಕೆ ವಿಕ್ಟೋರಿಯಾ ಅಜರೆಂಕಾ, ಹೀದರ್ ವ್ಯಾಟ್ಸನ್ ಮತ್ತಿತರ ಆಟಗಾರ್ತಿಯರು ಸಂತಸ ವ್ಯಕ್ತಪಡಿಸಿದ್ದಾರೆ.
ಆಟಗಾರ್ತಿಯರು ಋತುಚಕ್ರದ ದಿನಗಳಲ್ಲಿ ಬಿಳಿ ಒಳಉಡುಪಿನಿಂದಾಗಿ ಸೋರಿಕೆಯಿಂದ ಕಲೆಗಳು ಕಾಣಿಸುವ ಭಯದಿಂದ ಆಡುವಾಗ ಮಾನಸಿಕವಾಗಿ ಕುಗ್ಗುತ್ತಾರೆ ಎಂಬ ಬಗ್ಗೆ ತಜ್ಞರು ವಾದಿಸಿದ್ದರು. ಅಲ್ಲದೆ, ಕೆಲ ಆಟಗಾರ್ತಿಯರು, ಸೂಕ್ತ ತಿಳಿಬಣ್ಣದ ಬ್ರಾ ಸಿಗದೆ, ಬ್ರಾರಹಿತವಾಗಿಯೂ ಆಡಿ ಮುಜುಗರಕ್ಕೀಡಾಗಿದ್ದರು. ಈ ಸಂಬಂಧ ಕಳೆದ ವರ್ಷ ನಡೆದ ಪ್ರತಿಭಟನೆ ನಡೆದಿತ್ತು.
145 ವರ್ಷಗಳ ಇತಿಹಾಸ ಹೊಂದಿರುವ ವಿಂಬಲ್ಡನ್ನಲ್ಲಿ ಕಡ್ಡಾಯ ಬಿಳಿ ಸಮವಸ್ತ್ರದ ನಿಯಮವನ್ನು ಇದುವರೆಗೆ ಕಟ್ಟುನಿಟ್ಟಾಗಿ ಅಳವಡಿಸಿಕೊಂಡು ಬರಲಾಗಿತ್ತು. ಕೆಲ ಆಟಗಾರ್ತಿಯರು ಕೆಂಪು ಬಣ್ಣದ ಶಾರ್ಟ್ಸ್ ಅಥವಾ ಕಪ್ಪು ಬ್ರಾ ಧರಿಸಿ ಕೋರ್ಟ್ಗೆ ಬಂದಾಗ ಅವರನ್ನು ಬಿಳಿ ಬಣ್ಣದ ಒಳಉಡುಪು ಧರಿಸುವಂತೆ ಸೂಚಿಸಿ ಲಾಕರ್ ರೂಮ್ಗೆ ವಾಪಸ್ ಕಳುಹಿಸಿದ ಅಥವಾ ದಂಡ ಶಿಕ್ಷೆ ವಿಧಿಸಿದ ದೃಷ್ಟಾಂತಗಳೂ ಇದ್ದವು. ಆದರೆ ಈ ನಿಯಮವನ್ನು ಬದಲಾಯಿಸಬೇಕೆಂದು ಇತ್ತೀಚಿನ ವರ್ಷಗಳಲ್ಲಿ ಒತ್ತಾಯಗಳು ಕೇಳಿಬಂದಿದ್ದವು. ಕಳೆದ ಆವೃತ್ತಿಯ ವೇಳೆ ಆಲ್ ಇಂಗ್ಲೆಂಡ್ ಕ್ಲಬ್ ಹೊರಗೆ ಪ್ರತಿಭಟನೆಗಳೂ ನಡೆದಿದ್ದವು. ಹೀಗಾಗಿ 2023ರಿಂದ ಆಟಗಾರ್ತಿಯರಿಗೆ ಯಾವುದೇ ಬಣ್ಣದ ಒಳಉಡುಪು ಧರಿಸಿ ಆಡಲು ಅವಕಾಶ ನೀಡಲಾಗಿದೆ. ಇದರಿಂದಾಗಿ ಈ ಬಾರಿ ಆಲ್ ಇಂಗ್ಲೆಂಡ್ ಕ್ಲಬ್ನಲ್ಲಿ ಕಪ್ಪು ಮತ್ತಿತರ ಕಡುಬಣ್ಣದ ಶಾರ್ಟ್ಸ್ ಧರಿಸಿ ಆಡುತ್ತಿರುವುದು ಈಗಾಗಲೆ ಕಾಣಿಸಿದೆ.