ಮುಂಬೈ: ಲಾಕ್ಡೌನ್ ನಂತರ ಎಲ್ಲಾ ಭಾಷೆಗಳಲ್ಲೂ ದೊಡ್ಡ ಬಜೆಟ್ನ ಮತ್ತು ಸ್ಟಾರ್ ನಟರ ಚಿತ್ರಗಳು ಬಿಡುಗಡೆಯಾಗುವುದಕ್ಕೆ ಹಿಂದೇಟು ಹಾಕಿದ್ದವು. ಜನರು ಚಿತ್ರಮಂದಿರಕ್ಕೆ ಬರುತ್ತಾರಾ ಎಂಬ ಸಂಶಯದಲ್ಲಿ ಕಳೆದ ವರ್ಷ ಬಿಡುಗಡೆಯಾಗಬೇಕಿದ್ದ ಎಲ್ಲಾ ದೊಡ್ಡ ಚಿತ್ರಗಳು ಈ ವರ್ಷಕ್ಕೆ ಮುಂದೂಡಲ್ಪಟ್ಟವು.
ಇದನ್ನೂ ಓದಿ: ಆಸ್ಕರ್ ಸ್ಪರ್ಧೆಗೆ ಎಂಟ್ರಿ ಕೊಟ್ಟ ‘ಸೂರರೈ ಪೋಟ್ರು’
ಈಗ ಎಲ್ಲಾ ಭಾಷೆಗಳಲ್ಲೂ ದೊಡ್ಡ ಬಜೆಟ್ನ ಮತ್ತು ಸ್ಟಾರ್ ಚಿತ್ರಗಳ ಬಿಡುಗಡೆ ದಿನಾಂಕ ಘೋಷಿಸಲಾಗಿದೆ. ಸ್ಯಾಂಡಲ್ವುಡ್, ಕಾಲಿವುಡ್, ಟಾಲಿವುಡ್ ಹೀಗೆ ಎಲ್ಲಾ ವುಡ್ಗಳಲ್ಲಿ ದೊಡ್ಡ ಚಿತ್ರಗಳು ಬಿಡುಗಡೆಯಾಗುವುದಕ್ಕೆ ಪೈಪೋಟಿ ನಡೆಸಿದರೆ, ಬಾಲಿವುಡ್ನಲ್ಲಿ ಮಾತ್ರ ಸಲ್ಮಾನ್ ಖಾನ್ ಅಭಿನಯದ ‘ರಾಧೇ’ ಚಿತ್ರವೊಂದನ್ನು ಬಿಟ್ಟು, ಬೇರೆ ಯಾರೂ ಚಿತ್ರವನ್ನು ಘೋಷಿಸಿಲ್ಲ.
ಹಾಗೆ ನೋಡಿದರೆ, ಅಕ್ಷಯ್ ಕುಮಾರ್ ಅಭಿನಯದ ‘ಸೂರ್ಯವಂಶಿ’, ರಣವೀರ್ ಸಿಂಗ್ ಅಭಿನಯದ ’83’ ಸೇರಿದಂತೆ ಹಲವು ಚಿತ್ರಗಳು ಬಿಡುಗಡೆಯಾವುದಕ್ಕೆ ಸಜ್ಜಾಗಿದೆ. ಎಲ್ಲಾ ಅಂದುಕೊಂಡಂತೆ ಆಗಿದ್ದರೆ, ಕಳೆದ ವರ್ಷ ಮಾರ್ಚ್ನಲ್ಲೇ ಈ ಚಿತ್ರಗಳು ಬಿಡುಗಡೆಯಾಗಬೇಕಿದ್ದವು. ಆದರೆ, ಲಾಕ್ಡೌನ್ನಿಂದ ಇದುವರೆಗೂ ಬಿಡುಗಡೆಯಾಗುವುದಕ್ಕೆ ಸಾಧ್ಯವಾಗಿಲ್ಲ.
ಇದೀಗ ಚಿತ್ರಮಂದಿರಗಳಲ್ಲಿ ಅರ್ಧಕ್ಕಿಂತ ಹೆಚ್ಚು ಹಾಜರಾತಿಗೆ ಕೇಂದ್ರ ಸರ್ಕಾರವು ಅನುಮತಿ ನೀಡಿರುವುದರಿಂದ, ಯಾವೆಲ್ಲಾ ಚಿತ್ರಗಳು ಬರುತ್ತವೆ ಎಂಬ ಕುತೂಹಲ ಎಲ್ಲರಲ್ಲೂ ಇದೆ. ಈಗಾಗಲೇ ‘ರಾಧೇ’ ಚಿತ್ರವು ಮೇ ತಿಂಗಳಲ್ಲಿ ಬಿಡುಗಡೆಯಾಗುತ್ತದೆ ಎಂದು ಘೋಷಿಸಲಾಗಿದೆ. ಈ ವರ್ಷ ಬಾಲಿವುಡ್ನಲ್ಲಿ ಅದೇ ಮೊದಲ ದೊಡ್ಡ ಚಿತ್ರವಾಗುತ್ತದೋ ಅಥವಾ ಅದಕ್ಕಿಂತ ಮುಂಚೆ ‘ಸೂರ್ಯವಂಶಿ’, ’83’ ಮುಂತಾದ ಚಿತ್ರಗಳು ಬಿಡುಗಡೆಯಾಗುತ್ತವೋ ಎಂಬ ಕುತೂಹಲ ಎಲ್ಲರಲ್ಲೂ ಇದೆ.
ಇದನ್ನೂ ಓದಿ: ಸಿನಿಮಾಗಳಲ್ಲೇ ಮುಳುಗಿದ ಹರಿಪ್ರಿಯಾ
ಆದರೆ, ಇದುವರೆಗೂ ದೊಡ್ಡ ಬಜೆಟ್ನ ಮತ್ತು ಸ್ಟಾರ್ ಚಿತ್ರಗಳ ಯಾವೊಬ್ಬ ನಿರ್ಮಾಪಕರು ಸಹ ಮೊದಲ ಮೂರ್ನಾಲ್ಕು ತಿಂಗಳುಗಳಲ್ಲಿ ತಮ್ಮ ಚಿತ್ರವನ್ನು ಘೋಷಿಸಿಲ್ಲ. ಒಂದು ಪಕ್ಷ ‘ಸೂರ್ಯವಂಶಿ’ ಚಿತ್ರವೇನಾದರೂ ಮುಂದಿನ ಎರಡ್ಮೂರು ತಿಂಗಳುಗಳಲ್ಲಿ ಬಿಡುಗಡೆಯಾದರೆ, ಅದೇ ಈ ವರ್ಷದ ಬಾಲಿವುಡ್ನ ಮೊದಲ ಬಿಗ್ ಚಿತ್ರವಾದಂತಾಗುತ್ತದೆ. ಯಾವುದಕ್ಕೂ ಇನ್ನೂ ಒಂದಿಷ್ಟು ದಿನ ಕಾದು ನೋಡಬೇಕಿದೆ.