ನವದೆಹಲಿ: ನಾವೆಲ್ಲರೂ ಭಾರತದ ಅಳಿಯ ಎಂದೆಲ್ಲ ಕೊಂಡಾಡಿದ್ದ ರಿಷಿ ಸುನಕ್ ಪ್ರಧಾನಿಯಾಗಿ ಇನ್ನೂ ಒಂದು ತಿಂಗಳು ಕಳೆದಿಲ್ಲ. ಅಷ್ಟರಲ್ಲೇ ಅವರ ಪ್ರಧಾನಿ ಕುರ್ಚಿ ಅಲ್ಲಾಡುತ್ತಿದೆ. ಅವರ ಪಕ್ಷದಲ್ಲೇ ಬೋರಿಸ್ ಜಾನ್ಸನ್ರನ್ನು ಮತ್ತೇ ಪ್ರಧಾನಿ ಮಾಡುವ ಆಲೊಚನೆ ಕನ್ಸರ್ವೇಟಿವ್ ಪಕ್ಷದ ಒಂದು ಬಣದಲ್ಲಿ ನಡೆಯುತ್ತಿದೆ.
ರಿಷಿ ಸುನಕ್ರನ್ನು ಬ್ರಿಟನ್ನ ಪ್ರಧಾನಿ ಮಾಡಿದ್ದೇ ಅಲ್ಲಿನ ಆರ್ಥಿಕತೆಯನ್ನು ಸರಿ ದಾರಿಗೆ ತರಲು. ಆದರೆ ಈಗ ಅವರ ಕಠಿಣ ಆರ್ಥಿಕ ನೀತಿಗೆ ಅಲ್ಲಿನ ಸಂಸತ್ತಿನಲ್ಲಿ ವಿರೋಧ ವ್ಯಕ್ತ ಆಗ್ತಾ ಇದೆ. ರಿಷಿ ಸುನಕ್ ಬ್ರಿಟನ್ನ ಆರ್ಥಿಕತೆಯನ್ನು ಸರಿ ದಾರಿಗೆ ತರಲು ವಾರ್ಷಿಕವಾಗಿ ಒಟ್ಟು 60 ಬಿಲಿಯನ್ ಡಾಲರ್ಗಳ ಉಳಿತಾಯ ಮಾಡಬೇಕು ಎಂದು ಸಲಹೆ ನೀಡಿದ್ದರು.
ಈ ನೀತಿಯ ಪ್ರಕಾರ ಬ್ರಿಟನ್ 2 ವರ್ಷಗಳ ಕಾಲ ಬ್ರಿಟನ್ ಯಾವುದೇ ದೇಶಕ್ಕೆ ಫಾರಿನ್ ಏಡ್ ನೀಡಬಾರದು. ಈ ಹಣವನ್ನು ತಮ್ಮ ದೇಶದಲ್ಲೇ ಹೂಡಿಕೆ ಮಾಡಿ ಅಭಿವೃದ್ಧಿ ಮಾಡುವುದು ಸುನಕ್ ಪ್ಲಾನ್. ಇನ್ನು ಮುಂದಿನ ಹಂತವಾಗಿ ಬ್ರಿಟನ್ನಲ್ಲಿ ತೆರಿಗೆಯನ್ನು ಹೆಚ್ಚಿಸಿ ಸರ್ಕಾರಿ ಖಜಾನೆಯನ್ನು ತುಂಬಿಸಲು ಸುನಕ್ ಶ್ರಮ ಪಡುತ್ತಿದ್ದಾರೆ. ಈ ನೀತಿಗೆ ಅಲ್ಲಿನ ಸಂಸತ್ತಿನಲ್ಲಿ ಭಾರಿ ವಿರೋಧ ವ್ಯಕ್ತವಾಗಿದೆ. ಹಿಂದಿನ ಪ್ರಧಾನಿ ಲಿಝ್ ಟ್ರಸ್ ತೆರಿಗೆಯಲ್ಲಿ ಕಡಿತ ಮಾಡಿ ಆರ್ಥಿಕತೆಯನ್ನು ಕಾಪಾಡಲು ಮುಂದಾಗಿದ್ದರು. ಆದರೆ ಅದರಿಂದಾಗಿ ಶ್ರೀಮಂತರ ಜೇಬು ಮಾತ್ರ ತುಂಬಿತ್ತು.
ಇನ್ನು ಬ್ರಿಟನ್ ಪ್ರಧಾನಿ ಅಲ್ಲಿನ ಹಳ್ಳಿ ಪ್ರದೇಶದಲ್ಲಿ ಕಾಲೊನಿಗಳನ್ನು ನಿರ್ಮಿಸಲು ಮುಂದಾಗಿದ್ದಾರೆ. ಈ ಮೂಲಕ ಅವರ ದೇಶದಲ್ಲೇ ರಿಯಲ್ ಎಸ್ಟೇಟ್ ಮೇಲೆ ಹೂಡಿಕೆ ಮಾಡಿ ಅಲ್ಲಿನ ನಿರಾಶ್ರಿತರಿಗೆ ಈ ಮನೆಗಳನ್ನು ನೀಡುವ ಉಪಾಯ ಮಾಡಿದ್ದರು. ಇದರಿಂದ ಆರ್ಥಿಕ ಚಟುವಟಿಕೆಗಳು ಹೆಚ್ಚಾಗಿ ದೇಶದ ಹಣ ಉಳಿಸಬಹುದು.
ಈ ಮನೆಗಳನ್ನು ನಗರದ ಪಕ್ಕದಲ್ಲಿರುವ ಹಳ್ಳಿಗಳ ಬಳಿ ಕಟ್ಟುವ ಆಲೊಚನೆಯಲ್ಲಿದ್ದರು. ಆದರೆ ಆ ಹಳ್ಳಿಗಳ ಜನರು ಈ ನೀತಿಯ ಕುರಿತು ಅಸಮಾಧಾನ ಹೊಂದಿದ್ದಾರೆ. ಇವರ ವೋಟ್ಗಳೇ ಕನ್ಸರ್ವೇಟಿವ್ ಪಕ್ಷವನ್ನು ಗೆಲ್ಲಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರಿಂದ ಆ ಕ್ಷೇತ್ರದ ಶಾಸಕರಿಗೂ ಇದು ಸವಾಲಾಗಿದೆ. ಈ ನಡುವೆ ಮರು ಚುನಾವಣೆ ನಡೆಸುವ ಆಲೋಚನೆಗಳೂ ಬ್ರಿಟನ್ನಲ್ಲಿ ಹೆಚ್ಚಾಗುತ್ತಿದೆ.
ಹೀಗೆ ಅನೇಕ ಸವಾಲುಗಳ ನಡುವೆ ರಿಷಿ ಸುನಕ್ ಆಡಳಿತ ನಡೆಸುತ್ತಿದ್ದು ಅವರು ಯಾವ ರೀತಿ ತಮ್ಮ ಕುರ್ಚಿಯನ್ನು ಉಳಿಸಿಕೊಳ್ಳುತ್ತಾರೆ ಎನ್ನುವುದೇ ಕುತೂಹಲದ ಸಂಗತಿ.