ನವದೆಹಲಿ : ಭಾರತದ ಸನಾತನ ಪರಂಪರೆಯಾದ ಯೋಗವನ್ನು ಆಧುನಿಕ ತಂತ್ರಜ್ಞಾನದ ಸಹಾಯದೊಂದಿಗೆ ಜಗತ್ತಿನಾದ್ಯಂತದ ಆಸಕ್ತರಿಗೆ ತಲುಪಿಸುವ ಒಂದು ವಿನೂತನ ಪ್ರಯತ್ನವು ಅಂತರಾಷ್ಟ್ರೀಯ ಯೋಗ ದಿನವಾದ ಇಂದು ಆರಂಭವಾಗಿದೆ. ವಿಶ್ವ ಆರೋಗ್ಯ ಸಂಸ್ಥೆ(ಡಬ್ಲ್ಯೂಎಚ್ಒ) ಮತ್ತು ಭಾರತದ ಆಯುಷ್ ಮಂತ್ರಾಲಯ ಜಂಟಿಯಾಗಿ ರೂಪಿಸಿರುವ ಎಂಯೋಗ(WHO mYoga) ಆ್ಯಪ್ಗೆ ಪ್ರಧಾನಿ ನರೇಂದ್ರ ಮೋದಿ ಅವರು ಇಂದು ಚಾಲನೆ ನೀಡಿದ್ದಾರೆ.
“ಡಬ್ಲ್ಯೂಎಚ್ಒ ಸಹಯೋಗದಲ್ಲಿ ಭಾರತ ಮತ್ತೊಂದು ಮುಖ್ಯ ಹೆಜ್ಜೆ ಇಟ್ಟಿದೆ. ಜಗತ್ತಿನ ವಿವಿಧೆಡೆಯ ಜನರಿಗಾಗಿ ವಿಭಿನ್ನ ಭಾಷೆಗಳಲ್ಲಿ ಯೋಗ ತರಬೇತಿ ವಿಡಿಯೋಗಳನ್ನು ಹೊಂದಿರುವ ಎಂಯೋಗ ಆ್ಯಪ್ಗೆ ಚಾಲನೆ ನೀಡುತ್ತಿದ್ದೇವೆ. ಇದು ನಮ್ಮ ‘ಒಂದು ವಿಶ್ವ, ಒಂದು ಆರೋಗ್ಯ’ ಎಂಬ ಧ್ಯೇಯವನ್ನು ಸಾಧಿಸುವಲ್ಲಿ ಸಹಾಯ ಮಾಡಲಿದೆ ಎಂದು ಮೋದಿ ಹೇಳಿದ್ದಾರೆ.
ಇದನ್ನೂ ಓದಿ: ವಿದ್ಯುತ್ ಶಾಕ್ನಿಂದ ಹಸು ಸಾವು: ರೈತನಿಗೆ 90 ಸಾವಿರ ರೂ. ಪರಿಹಾರ ನೀಡಲು ನಿರ್ದೇಶನ
ಯೋಗ ತರಬೇತಿ ಮತ್ತು ಅಭ್ಯಾಸ ವರ್ಗಗಳನ್ನು ಒದಗಿಸುವ ಡಬ್ಲ್ಯೂಎಚ್ಒ ಎಂಯೋಗ ಆ್ಯಪನ್ನು 12 ರಿಂದ 65 ವರ್ಷಗಳವರೆಗಿನ ಜನರು ನಿತ್ಯ ಯೋಗ ಸಂಗಾತಿಯನ್ನಾಗಿ ಬಳಸಬಹುದು. ಇದನ್ನು ವೈಜ್ಞಾನಿಕ ಸಾಹಿತ್ಯ ಮತ್ತು ಅಂತರರಾಷ್ಟ್ರೀಯ ತಜ್ನರೊಂದಿಗೆ ಸಮಾಲೋಚನೆ ಮಾಡಿ ರೂಪಿಸಲಾಗಿದೆ ಎಂದು ಡಬ್ಲ್ಯೂಎಚ್ಒ ತಿಳಿಸಿದೆ.
ಸ್ಮಾರ್ಟ್ ಫೋನ್ ಮೂಲಕ ಒಂದು ಟಚ್ನಿಂದ ಗುಣಮಟ್ಟದ ಯೋಗವನ್ನು ಅಭ್ಯಾಸ ಮಾಡಲು ಅವಕಾಶ ನೀಡುವ ಎಂಯೋಗ, ಸದ್ಯಕ್ಕೆ, ಹಿಂದಿ, ಇಂಗ್ಲೀಷ್ ಮತ್ತು ಫ್ರೆಂಚ್ ಭಾಷೆಗಳಲ್ಲಿ ಲಭ್ಯವಿದೆ. ಇನ್ನು ಮುಂದೆ ಅನ್ಯ ಹಲವಾರು ಭಾಷೆಗಳಲ್ಲಿ ಇದರ ಸೇವೆ ಲಭ್ಯವಾಗುವಂತೆ ಪ್ರಯತ್ನ ನಡೆಯುತ್ತಿದೆ. ಆ್ಯಂಡ್ರಾಯ್ಡ್ ಬಳಕೆದಾರರು ಈ ಆ್ಯಪ್ಅನ್ನು ಗೂಗಲ್ ಪ್ಲೇ ಸ್ಟೋರ್ನಿಂದ ಡೌನ್ಲೋಡ್ ಮಾಡಿಕೊಳ್ಳಬಹುದಾಗಿದೆ. (ಏಜೆನ್ಸೀಸ್)