ವಾಟ್ಸ್ಆ್ಯಪ್ ವೆಬ್ನ ಭದ್ರತೆ ಶೀಘ್ರ ನಿಮ್ಮ ಬೆರಳ ತುದಿಯಲ್ಲೇ ಸಿಗಲಿದೆ. ಅಂದರೆ, ಫಿಂಗರ್ ಪ್ರಿಂಟ್ ಕೊಟ್ಟರಷ್ಟೇ ವೆಬ್ನಲ್ಲಿ ವಾಟ್ಸ್ಆ್ಯಪ್ ಸೆಷನ್ ಸಾಧ್ಯವಾಗಿಸುವಂಥ ವ್ಯವಸ್ಥೆ ನೀಡಲು ಕಂಪನಿ ಮುಂದಾಗಿದೆ.
ಬಳಕೆದಾರರ ಖಾಸಗಿತನಕ್ಕೆ ಹೆಚ್ಚಿನ ಸುರಕ್ಷತೆ ನೀಡುವ ಸಲುವಾಗಿ ವಾಟ್ಸ್ಆ್ಯಪ್ ವೆಬ್ ಸಂಪರ್ಕಕ್ಕೆ ಫಿಂಗರ್ ಪ್ರಿಂಟ್ ಮೂಲಕ ಅಥೆಂಟಿಕೇಷನ್ ನೀಡುವಂತಹ ಟೆಕ್ನಾಲಜಿಯನ್ನು ಸಂಸ್ಥೆ ರೂಪಿಸುತ್ತಿದ್ದು, ಶೀಘ್ರದಲ್ಲೇ ಹೊಸ ಅಪ್ಡೇಟ್ನಲ್ಲಿ ಇದು ಲಭಿಸಲಿದೆ.
ಸದ್ಯ ವೆಬ್ ಮೂಲಕ ವಾಟ್ಸ್ಆ್ಯಪ್ ಬಳಸುವ ಗ್ರಾಹಕರು ತಮ್ಮ ಮೊಬೈಲ್ಫೋನ್ ಮೂಲಕ ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಬೇಕಿದೆ. ಆದರೆ ಈ ಹೊಸ ಟೆಕ್ನಾಲಜಿಯಲ್ಲಿ ಫಿಂಗರ್ ಪ್ರಿಂಟ್ ಮೂಲಕ ಅಥೆಂಟಿಕೇಷನ್ ನಡೆಯಲಿದೆ. ಇದರಿಂದ ಗ್ರಾಹಕರಿಗೆ ಚಾಟ್ಗೆ ಹೆಚ್ಚಿನ ಸುರಕ್ಷತೆ ಸಿಗಲಿದೆ. ಮಾತ್ರವಲ್ಲ ಗ್ರಾಹಕರ ಗ್ರಹಿಕೆಗೆ ಬರದಂತೆ ಇತರರು ಅವರ ಸೆಷನ್ ಬಳಸದಂಥ ಭದ್ರತೆಯೂ ಇದರಿಂದ ಸಿಗಲಿದೆ ಎಂಬುದನ್ನು ವಾಟ್ಸ್ಆ್ಯಪ್ ಬೀಟಾ ಇನ್ಫೋ ವರದಿ ತಿಳಿಸಿದೆ. (ಏಜೆನ್ಸೀಸ್)