ನವದೆಹಲಿ: ಭಾರತೀಯ ಬಳಕೆದಾರರಿಗೆ ಹೊಸ ಪ್ರೈವೆಸಿ ನೀತಿ ಜಾರಿಗೊಳಿಸುವ ವಾಟ್ಸ್ಆ್ಯಪ್ ಪ್ರಸ್ತಾವನೆಯು ಇದೀಗ ಸುಪ್ರೀಂ ಕೋರ್ಟ್ನಲ್ಲಿ ಚರ್ಚೆಯಾಗಲಿದೆ. ಈ ಬಗ್ಗೆ ಸಲ್ಲಿಸಿರುವ ರಿಟ್ ಅರ್ಜಿಯ ಮೇಲೆ ಕೇಂದ್ರ ಸರ್ಕಾರ, ವಾಟ್ಸ್ಆ್ಯಪ್ ಮತ್ತು ಅದರ ಒಡೆತನ ಹೊಂದಿರುವ ಫೇಸ್ಬುಕ್ಗೆ ನೋಟೀಸು ಜಾರಿಮಾಡಿರುವ ಸರ್ವೋಚ್ಛ ನ್ಯಾಯಾಲಯ, “ಜನರ ಗೌಪ್ಯತೆಯನ್ನು ಕಾಪಾಡಬೇಕು” ಎಂದಿದೆ.
ವಾಟ್ಸ್ಆ್ಯಪ್ ಪ್ರೈವೆಸಿ ನೀತಿ ಬದಲಾವಣೆಗೆ ತಡೆ ಕೋರಿ ಕರ್ಮಣ್ಯ ಸಿಂಗ್ ಸರೀನ್ ಮತ್ತು ಇತರರು ಸಲ್ಲಿಸಿರುವ ರಿಟ್ ಅರ್ಜಿ ಸೋಮವಾರ ವಿಚಾರಣೆಗೆ ಬಂದಿತು. “ವಾಟ್ಸ್ಆ್ಯಪ್ ಮೂಲಕ ಜನರು ಕಳುಹಿಸುವ ಸಂದೇಶಗಳ ಸರ್ಕ್ಯೂಟ್ಅನ್ನು ಫೇಸ್ಬುಕ್ಗೆ ಖುಲಾಸೆ ಮಾಡಲಾಗುವುದು ಎಂದು ಕೇಳಿದ್ದೇವೆ. ಜನರು ಡೇಟಾ ಮತ್ತು ಪ್ರೈವೆಸಿಯನ್ನು ಕಳೆದುಕೊಳ್ಳಬಹುದೆಂದು ಆತಂಕಕ್ಕೀಡಾಗಿದ್ದಾರೆ” ಎಂದು ಮುಖ್ಯ ನ್ಯಾಯಮೂರ್ತಿ ಶರದ್ ಎ.ಬೋಬ್ಡೆ ಹೇಳಿದರು. ವಾಟ್ಸ್ಅ್ಯಪ್ ವಕೀಲರಾದ ಕಪಿಲ್ ಸಿಬಾಲ್ ಇದನ್ನು “ತಪ್ಪು ಮಾಹಿತಿ” ಎಂದಾಗ, ಮುಖ್ಯ ನ್ಯಾಯಮೂರ್ತಿಗಳು ಈ ಬಗ್ಗೆ ಪ್ರಮಾಣ ಮಾಡಿ ಹೇಳಿ ಎಂದು ಕೇಳಿದರು.
ಇದನ್ನೂ ಓದಿ: ವಾಟ್ಸ್ಆ್ಯಪ್ ನಿಯಮ ಹಿಂಪಡೆಯಲು ಸೂಚನೆ; ಭಾರತೀಯರ ಡೇಟಾ ರಕ್ಷಣೆಗೆ ಕೇಂದ್ರ ಕ್ರಮ
ಪ್ರೈವೆಸಿ ಸ್ಟಾಡಂರ್ಡ್ಗಳ ವಿಷಯದಲ್ಲಿ ವಾಟ್ಸ್ಆ್ಯಪ್ ಭಾರತೀಯ ಮತ್ತು ಯುರೋಪೀಯ ಬಳಕೆದಾರರ ನಡುವೆ ಭೇದಭಾವ ಮಾಡುತ್ತಿದೆ. ಇಲ್ಲಿನ ಬಳಕೆದಾರರ ಮಾಹಿತಿಯನ್ನು ಲಾಭಕ್ಕಾಗಿ ಇತರ ಕಂಪೆನಿಗಳೊಂದಿಗೆ ಶೇರ್ ಮಾಡಿಕೊಳ್ಳಲು ಮುಂದಾಗಿದೆ ಎಂದು ಅರ್ಜಿದಾರರ ವಕೀಲ ಶ್ಯಾಂ ದಿವಾನ್ ಆರೋಪಿಸಿದರು. ವಾಟ್ಸ್ಆ್ಯಪ್ ವಕೀಲರು, “ಡೇಟಾ ರಕ್ಷಣೆಗಾಗಿ ಯುರೋಪಿನಲ್ಲಿ ವಿಶೇಷ ಕಾನೂನು ಇದೆ. ಆ ಕಾನೂನಿನ ಪ್ರಕಾರ ನಡೆದುಕೊಳ್ಳುತ್ತಿದ್ದೇವೆ. ಭಾರತದ ಸಂಸತ್ತು ಕಾನೂನು ರಚಿಸಿದರೆ ನಾವದನ್ನು ಪಾಲಿಸುತ್ತೇವೆ” ಎಂದರು.
“ನೀವು (ಫೇಸ್ಬುಕ್ ಮತ್ತು ವಾಟ್ಸ್ಆ್ಯಪ್) ಎರಡು ಅಥವಾ ಮೂರು ಟ್ರಿಲಿಯನ್ ಡಾಲರ್ ಕಂಪೆನಿಯಾಗಿರಬಹುದು. ಆದರೆ ಜನರು ಅವರ ಪ್ರೈವೆಸಿಗೆ ಬೆಲೆ ಕೊಡುತ್ತಾರೆ. ಜನರ ಪ್ರೈವೆಸಿಯನ್ನು ರಕ್ಷಿಸುವುದು ನಮ್ಮ ಕರ್ತವ್ಯವಾಗಿದೆ” ಎಂದು ಮುಖ್ಯ ನ್ಯಾಯಮೂರ್ತಿ ಬೊಬ್ಡೆ ಹೇಳಿದರು. ಎರಡೂ ಕಂಪೆನಿಗಳಿಗೆ ಮತ್ತು ಕೇಂದ್ರ ಸರ್ಕಾರಕ್ಕೆ ಈ ಕುರಿತು ವಿವರಣೆ ನೀಡಿ ನಾಲ್ಕು ವಾರಗಳೊಳಗೆ ಹೇಳಿಕೆ ಸಲ್ಲಿಸಲು ಸೂಚಿಸಿದರು.
ಇದನ್ನೂ ಓದಿ: ನಿಮ್ಮ ಖಾಸಗಿ ವಿಷಯ ನೀವೇ ಇಟ್ಕೊಳಿ, ನಮಗೆ ಬೇಡಪ್ಪ ಎಂದ ವಾಟ್ಸ್ಆ್ಯಪ್ ಏನು ಹೇಳಿದೆ ನೋಡಿ…
ಫೆಬ್ರವರಿ 8 ರಿಂದ ತನ್ನ ಹೊಸ ಸೇವಾ ಷರತ್ತುಗಳನ್ನು ಜಾರಿಗೆ ತರುವುದಾಗಿ ವಾಟ್ಸ್ಆ್ಯಪ್ ಸೂಚನೆ ನೀಡಿತ್ತು. ಬಳಕೆದಾರರಲ್ಲಿ ಈ ಬಗ್ಗೆ ಭಾರೀ ಪ್ರಮಾಣದಲ್ಲಿ ಅಸಮಾಧಾನ ವ್ಯಕ್ತವಾದ ಹಿನ್ನೆಲೆಯಲ್ಲಿ ಅದರ ಅನುಷ್ಠಾನವನ್ನು ಮೂರು ತಿಂಗಳ ಕಾಲ ಮುಂದಕ್ಕೆ ಹಾಕಿದೆ.(ಏಜೆನ್ಸೀಸ್)
ಟೂಲ್ಕಿಟ್ ಪ್ರಕರಣದಲ್ಲಿ ದಿಶಾ ನಂತರ ವಕೀಲೆ ನಿಕಿತಾ ಸೇರಿ ಇಬ್ಬರಿಗೆ ವಾರಂಟ್; ಜೂಮ್ನಲ್ಲೇ ನಡೆದಿತ್ತು ದಾಳಿಯ ಸಂಚು!
ನಿರುದ್ಯೋಗ ಕೊನೆಗಾಣಿಸಲು ಪಣ ತೊಟ್ಟ ಸೋನು ಸೂದ್; ಈ ಬಾರಿ ಅವರು ಮಾಡಿರುವ ಕೆಲಸ ಹೇಗಿದೆ ನೋಡಿ…