ನವದೆಹಲಿ: ಬಿಹಾರದ ಮುಜಾಫರ್ಪುರದ ರೈಲ್ವೆ ಸ್ಟೇಶನ್ನಲ್ಲಿ ಪುಟ್ಟ ಮಗುವೊಂದು ತನ್ನ ಅಮ್ಮನ ಶವಕ್ಕೆ ಹೊದಿಸಿದ್ದ ಬಟ್ಟೆಯೊಂದಿಗೆ ಆಟವಾಡುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟೆ ವೈರಲ್ ಆಗುತ್ತಿದೆ. ಈ ಕರುಣಾಜನಕ ದೃಶ್ಯವನ್ನು ನೋಡಿದರೆ ಎಂಥವರ ಮನಸ್ಸಾದರೂ ಕರಗುತ್ತದೆ. ಕರುಳು ಹಿಂಡುತ್ತದೆ.
ಶನಿವಾರ ಗುಜರಾತ್ನಿಂದ ಹೊರಟಿದ್ದ ಶ್ರಮಿಕ್ ವಿಶೇಷ ರೈಲಿನಲ್ಲಿ ಪ್ರಯಾಣ ಮಾಡಿದ್ದ ಈ ವಲಸೆ ಕಾರ್ಮಿಕ ಮಹಿಳೆ ಬಿಹಾರ ರೈಲ್ವೆ ಸ್ಟೇಶನ್ನಲ್ಲಿ ಡಿ ಹೈಡ್ರೇಶನ್, ಹಸಿವಿನಿಂದ ಮೃತಪಟ್ಟಿದ್ದರು.
ಆಕೆಯ ಕುಟುಂಬದವರು ಮಾಹಿತಿ ನೀಡಿದ ಪ್ರಕಾರ, ಈಕೆಗೆ ಮೊದಲೇ ಹೃದಯ ಸಮಸ್ಯೆಯಿತ್ತು. ಮಾ.22ರಂದು ಶಸ್ತ್ರಚಿಕಿತ್ಸೆಯೂ ಆಗಿತ್ತು. ಆಸ್ಪತ್ರೆಯಲ್ಲಿ ಇದ್ದ ಅವರು ಇತ್ತೀಚೆಗಷ್ಟೇ ಡಿಸ್ಚಾರ್ಜ್ ಆಗಿದ್ದರು. ಹಾಗೇ ಮೇ 24ರಂದು ಪ್ರಯಾಣ ಬೆಳೆಸಿದ್ದರು.
ಇದನ್ನೂ ಓದಿ: VIDEO: ಜೀವವಿಲ್ಲದೆ ಮಲಗಿರುವ ಅಮ್ಮನ ಶವದ ಹೊದಿಕೆಯೊಂದಿಗೆ ಕಂದನ ಆಟ; ಮನಕಲಕುವ ದೃಶ್ಯ ಇದು
ರೈಲಿನಲ್ಲಿಯೇ ಉಷ್ಣತೆ, ಡಿ ಹೈಡ್ರೇಶನ್ನಿಂದ ಬಳಲುತ್ತಿದ್ದ ಅವರು ಮುಜಾಫರ್ಪುರದ ರೈಲ್ವೆ ಸ್ಟೇಶನ್ನಲ್ಲಿ ಇಳಿಯುತ್ತಿದ್ದಂತೆ ಸಾವನ್ನಪ್ಪಿದ್ದಾರೆ. ಅವರಿಗೆ ಇಬ್ಬರು ಮಕ್ಕಳು. ಅದರಲ್ಲಿ ಒಂದು ತೀರ ಪುಟ್ಟ ಹಸುಗೂಸು. ಆಗಷ್ಟೇ ನಡೆಯಲು ಕಲಿತಂತಿರುವ ಅದು, ಶವವಾಗಿ ಬಿದ್ದ ಅಮ್ಮನನ್ನು ಎಬ್ಬಿಸಲು ಪ್ರಯತ್ನಿಸುತ್ತ, ಆಕೆಗೆ ಹೊದಿಸಿದ್ದ ಚಾರದದೊಂದಿಗೆ ಆಟವಾಡುತ್ತಿತ್ತು. ಈ ವಿಡಿಯೋ ನೋಡಿದ ಅದೆಷ್ಟೋ ಜನ ಶೇರ್ ಮಾಡಿಕೊಂಡು ತೀವ್ರ ದುಃಖ ವ್ಯಕ್ತಪಡಿಸಿದ್ದರು.
ಇದೀಗ ಕಾಂಗ್ರೆಸ್ ಹಿರಿಯ ಮುಖಂಡ, ನ್ಯಾಯವಾದಿ ಕಪಿಲ್ ಸಿಬಲ್ ಅವರೂ ಕೂಡ ಟ್ವೀಟ್ ಮಾಡಿ ವಿಷಾದ ವ್ಯಕ್ತಪಡಿಸಿದ್ದಾರೆ. ನಾವೆಲ್ಲ ತಲೆತಗ್ಗಿಸುವಂಥ ಸನ್ನಿವೇಶ ಇದು ಎಂದು ದುಃಖ ಭರಿತರಾಗಿ ಟ್ವೀಟ್ ಮಾಡಿದ್ದಾರೆ.
ವಲಸೆ ಕಾರ್ಮಿಕರ ಸುರಕ್ಷತೆ ನಮ್ಮ ಜವಾಬ್ದಾರಿಯಲ್ಲವೇ? ಆ ತಾಯಿ ಬಾಯಾರಿಕೆ, ಹಸಿವಿನಿಂದ ಸಾವನ್ನಪ್ಪಿದ್ದರೆ, ಅವರ ಹಸುಗೂಸು ಅಮ್ಮನನ್ನು ಎಬ್ಬಿಸಲು ಪ್ರಯತ್ನಿಸುತ್ತಿದೆ. ಶ್ರಮಿಕ್ ವಿಶೇಷ ರೈಲಿನಲ್ಲಿ ಆಹಾರವಿಲ್ಲ..ನೀರಿಲ್ಲ. ಸ್ವಚ್ಛವಿಲ್ಲದ, ವಾಸನೆ ಹೊಡೆಯುತ್ತಿರುವ ಶೌಚಗೃಹಗಳು, ಪೂರ್ತಿಯಾಗಿ ಮುಚ್ಚಿದ ಬೋಗಿಗಳು. ಇದು ಶ್ರಮಿಕ್ ರೈಲಿನ ಅವ್ಯವಸ್ಥೆ. ನಾವೇ ನಮ್ಮ ತಲೆಯನ್ನು ನೇಣಿನ ಕುಣಿಕೆಗೆ ಹಾಕಿಕೊಳ್ಳುವಷ್ಟು ನಾಚಿಕೆಯ ವಿಷಯ ಇದು ಎಂದು ಕಪಿಲ್ ಸಿಬಲ್ ಟ್ವೀಟ್ ಮೂಲಕ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ: ರಾಜಕೀಯ ಮುಖಂಡನ ಮಗನ ಮದುವೇಲಿ ನರ್ತಕಿಯಿಂದ ಭರ್ಜರಿ ಡ್ಯಾನ್ಸ್; ಪೊಲೀಸರು ಮಾಡಿದ್ದೇನು?
ಈ ಮಹಿಳೆ ತನ್ನ ಸಹೋದರಿ ಮತ್ತು ಸೋದರ ಮಾವನೊಂದಿಗೆ ರೈಲಿನಲ್ಲಿ ಸೂರತ್ನಿಂದ ಬಂದಿದ್ದಾರೆ. ಬರುವಾಗಲೇ ಮೃತಪಟ್ಟಿದ್ದರು. ಅವರ ದೇಹವನ್ನು ಮುಜಾಫರ್ಪುರದಲ್ಲಿ ಇಳಿಸಲಾಯಿತು ಎಂದು ರೈಲ್ವೆ ಪೊಲೀಸ್ ಡಿವೈಎಸ್ಪಿ ತಿಳಿಸಿದ್ದಾರೆ.
ಈ ಮಹಿಳೆ ರೈಲಿನಲ್ಲಿ ಅಸ್ವಸ್ಥರಾಗಿದ್ದರು, ರೈಲ್ವೆ ಸ್ಟೇಶನ್ನಲ್ಲಿ ಇಳಿಯುತ್ತಿದ್ದಂತೆ ಜೀವ ಹೋಗಿದೆ ಎಂದು ಕುಟುಂಬದವರು ನಿನ್ನೆ ಹೇಳಿದ್ದರು. ಆದರೆ ವಿಡಿಯೋ ನೋಡಿದ ಅನೇಕರು ದುಃಖ ವ್ಯಕ್ತಪಡಿಸಿದ್ದಾರೆ. ಇಂಥ ಸನ್ನಿವೇಶ ನೋಡಲು ಸಾಧ್ಯವಿಲ್ಲ ಎಂದಿದ್ದಾರೆ. (ಏಜೆನ್ಸೀಸ್)
ಅಮ್ಮಂಗೆ ಜೀವ ಇಲ್ಲ..ಅವಳ ಕಂದನಿಗೆ ಆಟ ಮುಗೀತಿಲ್ಲ…: ಬಿಹಾರದ ರೈಲ್ವೆ ಸ್ಟೇಶನ್ನಲ್ಲಿ ಕಂಡುಬಂದ ಮನಕಲಕುವ ದೃಶ್ಯ…https://t.co/zLd2ph0moG pic.twitter.com/n5jvV0WHHW
— Vijayavani (@VVani4U) May 27, 2020