ನವದೆಹಲಿ: ಟೀಮ್ ಇಂಡಿಯಾದ ಮಾಜಿ ನಾಯಕ ಹಾಗೂ ಬ್ಯಾಟಿಂಗ್ ತಾರೆ ವಿರಾಟ್ ಕೊಹ್ಲಿ ಇನ್ಸ್ಟಾಗ್ರಾಂನಲ್ಲಿ ಮಾಡುವ ಪ್ರತಿ ಪ್ರಾಯೋಜಿತ ಪೋಸ್ಟ್ಗೂ 11.45 ಕೋಟಿ ರೂ. ಪಡೆಯುತ್ತಾರೆ ಎಂದು ಸಾಮಾಜಿಕ ಜಾಲತಾಣಗಳ ಮಾರ್ಕೆಟಿಂಗ್ ಸಂಸ್ಥೆ ‘ಹಾಪರ್ ಎಚ್ಕ್ಯೂ’ ವರದಿ ಮಾಡಿದೆ. ಈ ಮೂಲಕ ಕೊಹ್ಲಿ ಇನ್ಸ್ಟಾಗ್ರಾಂ ಪೋಸ್ಟ್ ಮೂಲಕ ಅತ್ಯಧಿಕ ಹಣ ಸಂಪಾದಿಸುವ ಏಷ್ಯನ್, ಭಾರತೀಯ, ಕ್ರಿಕೆಟಿಗ ಮತ್ತು ವಿಶ್ವದ 3ನೇ ಕ್ರೀಡಾಪಟು ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
‘ಹಾಪರ್ ಎಚ್ಕ್ಯೂ’ ಪ್ರಕಟಿಸಿರುವ 100 ಸೆಲೆಬ್ರಿಟಿ-ಕ್ರೀಡಾಪಟುಗಳ ಪ್ರತಿ ಪೋಸ್ಟ್ ಸಂಪಾದನೆಯ ಲೆಕ್ಕಾಚಾರದಲ್ಲಿ ಕೊಹ್ಲಿ ಅಗ್ರ 20ರೊಳಗಿರುವ ಏಕೈಕ ಭಾರತೀಯರೂ ಆಗಿದ್ದಾರೆ. ಪ್ರತಿ ಪೋಸ್ಟ್ಗೆ 26.7 ಕೋಟಿ ರೂ. ಪಡೆಯುವ ಪೋರ್ಚುಗಲ್ ಫುಟ್ಬಾಲ್ ತಾರೆ ಕ್ರಿಶ್ಚಿಯಾನೊ ರೊನಾಲ್ಡೊ ಅಗ್ರಸ್ಥಾನದಲ್ಲಿದ್ದರೆ, 21.5 ಕೋಟಿ ರೂ. ಪಡೆಯುವ ಅರ್ಜೆಂಟೀನಾದ ಫುಟ್ಬಾಲ್ ತಾರೆ ಲಿಯೋನೆಲ್ ಮೆಸ್ಸಿ 2ನೇ ಸ್ಥಾನದಲ್ಲಿದ್ದಾರೆ. ನಂತರದಲ್ಲಿ ಕೆಲ ಸೆಲೆಬ್ರಿಟಿಗಳಿದ್ದು, 14ನೇ ಸ್ಥಾನದಲ್ಲಿರುವ ವಿರಾಟ್ ಕೊಹ್ಲಿ ಅವರೇ ನಂತರದ ಕ್ರೀಡಾತಾರೆಯಾಗಿದ್ದಾರೆ. ಬ್ರೆಜಿಲ್ ಫುಟ್ಬಾಲ್ ತಾರೆ ನೇಮರ್ (19ನೇ ಸ್ಥಾನ), ಫ್ರಾನ್ಸ್ನ ಕೈಲಿಯನ್ ಎಂಬಾಪೆ (27) ಅವರಿಗಿಂತಲೂ ಕೊಹ್ಲಿ ಮೇಲಿನ ಸ್ಥಾನದಲ್ಲಿದ್ದಾರೆ.
29ನೇ ಸ್ಥಾನದಲ್ಲಿರುವ ಬಾಲಿವುಡ್ ನಟಿ ಪ್ರಿಯಾಂಕಾ ಚೋಪ್ರಾ (ಪ್ರತಿ ಪೋಸ್ಟ್ಗೆ 4.40 ಕೋಟಿ ರೂ.) ಈ ಪಟ್ಟಿಯಲ್ಲಿರುವ ಮತ್ತೋರ್ವ ಭಾರತೀಯರಾಗಿದ್ದಾರೆ. ದಕ್ಷಿಣ ಆಫ್ರಿಕಾ ಮತ್ತು ಆರ್ಸಿಬಿ ತಂಡದದ ಮಾಜಿ ಆಟಗಾರ ಎಬಿ ಡಿವಿಲಿಯರ್ಸ್ (ಪ್ರತಿ ಪೋಸ್ಟ್ಗೆ 1 ಕೋಟಿ ರೂ.) 76ನೇ ಸ್ಥಾನದಲ್ಲಿದ್ದು, ಈ ಪಟ್ಟಿಯಲ್ಲಿರುವ ಮತ್ತೋರ್ವ ಕ್ರಿಕೆಟಿಗರಾಗಿದ್ದಾರೆ.
ಇದು ಆಧುನಿಕ ಮಾರ್ಕೆಟಿಂಗ್ ತಂತ್ರ!
ಸೆಲೆಬ್ರಿಟಿಗಳು ಇನ್ಸ್ಟಾಗ್ರಾಂನಿಂದ ಎಲ್ಲ ವೈಯಕ್ತಿಕ ಪೋಸ್ಟ್ಗಳಿಗೂ ಹಣ ಸಂಪಾದಿಸುವುದಿಲ್ಲ. ಇದು ಪ್ರಾಯೋಜಿತ ಪೋಸ್ಟ್ಗಳಿಗೆ ಮಾತ್ರ ಅನ್ವಯಿಸುತ್ತದೆ. ಯಾವ ಉತ್ಪನ್ನ ಅಥವಾ ಬ್ರಾಂಡ್ ಬಗ್ಗೆ ಪೋಸ್ಟ್ ಮಾಡುತ್ತಾರೋ ಆ ಕಂಪನಿಯಿಂದ ಕ್ರೀಡಾಪಟುವಿಗೆ ಹಣ ಸಂದಾಯವಾಗುತ್ತದೆ. ಇದು ಆಧುನಿಕ ಮಾರ್ಕೆಟಿಂಗ್ ತಂತ್ರವಾಗಿದ್ದು, ಇನ್ಸ್ಟಾಗ್ರಾಂ ಈಗ ವಿವಿಧ ಬ್ರಾಂಡ್ಗಳ ಪ್ರಚಾರಕ್ಕೂ ಬಳಕೆಯಾಗುತ್ತಿದೆ. ಜನಪ್ರಿಯ ಮತ್ತು ಹೆಚ್ಚಿನ ಹಿಂಬಾಲಕರನ್ನು ಹೊಂದಿರುವ ಸೆಲೆಬ್ರಿಟಿಗಳು ವಿವಿಧ ಬ್ರಾಂಡ್ಗಳ ಬಗ್ಗೆ ಪೋಸ್ಟ್ ಮಾಡುವ ಮೂಲಕ ಅಭಿಮಾನಿಗಳ ಮೇಲೆ ಪ್ರಭಾವ ಬೀರುತ್ತಾರೆ. ಇದು ಈಗಾಗಲೆ ಜನಪ್ರಿಯವಾಗಿರುವ ಹೊಸ ರೀತಿಯ ಜಾಹೀರಾತು ಮಾರ್ಗವಾಗಿದೆ. ಇನ್ಸ್ಟಾಗ್ರಾಂನಲ್ಲಿ ಹೊಂದಿರುವ ಹಿಂಬಾಲಕರ ಸಂಖ್ಯೆಗೆ ಅನುಗುಣವಾಗಿ ಕಂಪನಿಗಳು ಹಣ ಪಾವತಿ ಮಾಡುತ್ತವೆ. ಕೊಹ್ಲಿ ಸದ್ಯ 25.52 ಕೋಟಿ ಹಿಂಬಾಲಕರನ್ನು ಹೊಂದಿದ್ದರೆ, ರೊನಾಲ್ಡೊಗೆ ಗರಿಷ್ಠ 59.68 ಕೋಟಿ ಹಿಂಬಾಲಕರಿದ್ದಾರೆ.
ಕೀನ್ಯಾ ವಿರುದ್ಧ ಬೇಕಿದ್ದರೂ ಸೋಲಿರಿ, ಪಾಕ್ ವಿರುದ್ಧ ಸೋಲಬೇಡಿ ಎನ್ನುತ್ತಿದ್ದರು ಎಂದ ಕುಂಬ್ಳೆ
ಹಾಲಿ ವಿಶ್ವ ನಂ. 1 ಟೆನಿಸ್ ಆಟಗಾರನ ಕ್ರಷ್ ಈ ಮಾಜಿ ನಂ. 1 ಆಟಗಾರ್ತಿ!