ಧರ್ಮಶಾಲಾ: ಮೇ 09ರಂದು ನಡೆದ ಐಪಿಎಲ್ನ 58ನೇ ಪಂದ್ಯದಲ್ಲಿ ಫಾಫ್ ಡು ಪ್ಲೆಸಿಸ್ ನೇತೃತ್ವದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಪಂಜಾಬ್ ಕಿಂಗ್ಸ್ ವಿರುದ್ಧ 60 ರನ್ಗಳ ಭರ್ಜರಿ ಜಯ ಸಾಧಿಸಿದ್ದು, ಆರ್ಸಿಬಿ ತನ್ನ ಪ್ಲೇಆಫ್ ಆಸೆಯನ್ನು ಜೀವಂತವಾಗಿರಿಸಿಕೊಂಡಿದೆ. ಇತ್ತ ಪಂದ್ಯದ ವೇಳೆ ಹಲವು ಸ್ವಾರಸ್ಯಕರ ಘಟನೆಗಳು ನಡೆದಿದ್ದು, ಇದರ ಫೋಟೋ ಹಾಗೂ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಆರ್ಸಿಬಿ ವಿರಾಟ್ ಕೊಹ್ಲಿ (92 ರನ್, 47 ಎಸೆತ, 7 ಬೌಂಡರಿ, 6 ಸಿಕ್ಸರ್), ರಜತ್ ಪಾಟೀದಾರ್ (55 ರನ್, 23 ಎಸೆತ, 3 ಬೌಂಡರಿ, 6 ಸಿಕ್ಸರ್), ಕ್ಯಾಮರೂನ್ ಗ್ರೀನ್ (46 ರನ್, 27 ಎಸೆತ, 5 ಬೌಂಡರಿ, 1 ಸಿಕ್ಸರ್) ಬಿರುಸಿನ ಬ್ಯಾಟಿಂಗ್ ಫಲವಾಗಿ 20 ಓವರ್ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 241 ರನ್ ಗಳಿಸಿತ್ತು. ಬೃಹತ್ ಗುರಿ ಬೆನ್ನತ್ತಿದ್ದ ಪಂಜಾಬ್ ತಂಡವು ರಿಲೀ ರೋಸ್ಸೌ (61 ರನ್, 27 ಎಸೆತ, 9 ಬೌಂಡರಿ, 3 ಸಿಕ್ಸರ್) ಅರ್ಧತಶತದಕ ಫಲವಾಗಿ 17 ಓವರ್ಗಳಲ್ಲಿ 181 ರನ್ಗಳಿಸಿ ಆಲೌಟ್ ಆಗುವ ಮೂಲಕ ಸೋಲೊಪ್ಪಿಕೊಂಡಿತ್ತು.
ಪಂಜಾಬ್ ಪರ ಕೆಲಕಾಲ ಸ್ಫೋಟಕ ಬ್ಯಾಟಿಂಗ್ ನಡೆಸಿದ ರಿಲೀ ರೋಸ್ಸೌ 21 ಎಸೆತಗಳಲ್ಲಿ 225 ಸ್ಟ್ರೈಕ್ ರೇಟ್ನಲ್ಲಿ ತಮ್ಮ ಅರ್ಧಶತಕವನ್ನು ಪೂರ್ಣಗೊಳಿಸಿದರು, ರೋಸ್ಸೌ ಅವರ 27 ಎಸೆತಗಳ ಇನ್ನಿಂಗ್ಸ್ನಲ್ಲಿ 61 ರನ್ ಗಳಿಸಿದರು. ಈ ಅವಧಿಯಲ್ಲಿ ಅವರ ಬ್ಯಾಟ್ನಿಂದ 9 ಬೌಂಡರಿ ಮತ್ತು 3 ಸಿಕ್ಸರ್ಗಳು ಕಾಣಿಸಿಕೊಂಡವು. ಆದರೆ, ಅವರು ಔಟಾದಾಗ ವಿರಾಟ್ ಕೊಹ್ಲಿ ಮಾಡಿದ ಸೆಲೆಬ್ರೇಷನ್ ಸಖತ್ ವೈರಲ್ ಆಗುತ್ತಿದೆ.
ಇದನ್ನೂ ಓದಿ: ವಿರಾಟ್ ಸಿಡಿಲಬ್ಬರದ ಬ್ಯಾಟಿಂಗ್ಗೆ ರೆಕಾರ್ಡ್ಗಳು ಉಡೀಸ್; ಐಪಿಎಲ್ನಲ್ಲಿ ಐತಿಹಾಸಿಕ ದಾಖಲೆ ಬರೆದ ಕಿಂಗ್ ಕೊಹ್ಲಿ
ಪಂಜಾಬ್ ಪರ ರಿಲೀ ರೋಸ್ಸೌ ಅರ್ಧಶತಕ ಸಿಡಿಸಿದಾಗ ಗನ್ ಸೆಲೆಬ್ರೇಷನ್ ಮಾಡಿದರು. ಬಳಿಕ 9 ನೇ ಓವರ್ನ ಕರ್ಣ್ ಶರ್ಮಾ ಬೌಲಿಂಗ್ನಲ್ಲಿ ವಿಲ್ ಜ್ಯಾಕಸ್ಗೆ ಬೌಂಡರಿ ಲೈನ್ ಬಳಿ ಕ್ಯಾಚ್ ನೀಡಿ ರಿಲೀ ಔಟಾದರು. ಈ ಸಂದರ್ಭ ವಿರಾಟ್ ಕೊಹ್ಲಿ ಸೇಡು ತೀರಿಸಿಕೊಂಡರು. ರುಸ್ಸೋ ಔಟಾದ ನಂತರ ವಿರಾಟ್ ಕೂಡ ಗನ್ ಸೆಲೆಬ್ರೇಷನ್ ಮಾಡುವ ಮೂಲಕ ಅವರನ್ನು ಟ್ರೋಲ್ ಮಾಡಿದ್ದಾರೆ. ಈ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗಿದೆ.
ಇನ್ನೂ ಪಂದ್ಯದ 14ನೇ ಓವರ್ ವೇಳೆ ರೋಚಕ ರನ್ ಔಟ್ ಘಟನೆ ನಡೆದಿದೆ. ಲಾಕಿ ಫರ್ಗುಸನ್ ಅವರ ನಾಲ್ಕನೇ ಎಸೆತದಲ್ಲಿ, ಸ್ಯಾಮ್ ಕರ್ರಾನ್ ಮಿಡ್-ವಿಕೆಟ್ ಕಡೆಗೆ ಚೆಂಡನ್ನು ಅಟ್ಟಿ ಎರಡು ರನ್ ಗಳಿಸಲು ಬಯಸಿದರು. ಬೌಂಡರಿಯಲ್ಲಿ ಬಾಲ್ಗಾಗಿ ಕಾದುಕುಳಿತಿದ್ದ ವಿರಾಟ್ ಚಿರತೆಯ ವೇಗದಲ್ಲಿ 30 ಯಾರ್ಡ್ ವೃತ್ತದವರೆಗೆ ಓಡಿ ಬಂದರು. ಚೆಂಡನ್ನು ಕೈಗೆತ್ತಿಕೊಂಡು ನೇರವಾಗಿ ನಾನ್ ಸ್ಟ್ರೈಕರ್ನ ತುದಿಗೆ ಗುರಿಯಿಟ್ಟರು. ಚೆಂಡು ನೇರವಾಗಿ ವಿಕೆಟ್ಗೆ ಬಡಿದಿದೆ. ಸಮಯಕ್ಕೆ ಕ್ರೀಸ್ ತಲುಪಲು ಸಾಧ್ಯವಾಗದ ಶಶಾಂಕ್ ಸಿಂಗ್ ರನ್ ಔಟ್ಗೆ ಬಲಿಯಾದರು. ರ್ಸಿಬಿ ಗೆಲುವಿನ ಹಾದಿ ಮತ್ತಷ್ಟು ಸುಗಮವಾಯಿತು. ಇದೀಗ ಕೊಹ್ಲಿಯ ಅದ್ಭುತ ರನ್ ಔಟ್ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗುತ್ತಿದೆ.