ಮುಂಬೈ: ಮಹಾರಾಷ್ಟ್ರದ ವಿಕಟ್ಗಡ್ನಲ್ಲಿರುವ ಛತ್ರಪತಿ ಶಿವಾಜಿ ಮಹಾರಾಜರ ಕೋಟೆಯ ಬಳಿ ಹೊಸವರ್ಷ ಆಚರಣೆಯ ನೆಪದಲ್ಲಿ ಮದ್ಯಪಾನ ಮಾಡುತ್ತಿದ್ದ ಯುವಕರ ಮೇಲೆ ತಾವು ಶಿವಾಜಿ ಮಹಾರಾಜರ ಫಾಲೋವರ್ಸ್ ಎಂದು ಹೇಳಿಕೊಂಡು ಬಂದ ಗುಂಪೊಂದು ಹಲ್ಲೆ ನಡೆಸಿದೆ.
ಸುಮಾರು 11 ಯುವಕರನ್ನು ಅರೆಬೆತ್ತಲೆಗೊಳಿಸಿ, ಅವರನ್ನು ಮೊಳಕಾಲ ಮೇಲೆ ಕೂರಿಸಿ ಬಳಿಕ ಹಲ್ಲೆ ನಡೆಸಲಾಗಿದೆ. ಈ ವಿಡಿಯೋ ಈಗ ಸಿಕ್ಕಾಪಟೆ ವೈರಲ್ ಆಗುತ್ತಿದೆ. ಸೋಷಿಯಲ್ ಮೀಡಿಯಾದಲ್ಲಿ ವಿಡಿಯೋ ನೋಡಿದ ಪೊಲೀಸರು ಹಲ್ಲೆ ನಡೆಸಿದ ಸ್ವಯಂಘೋಷಿತ ಕೋಟೆ ರಕ್ಷಕರ ವಿರುದ್ಧ ಎಫ್ಐಆರ್ ದಾಖಲಿಸಿಕೊಂಡು ಪ್ರಕರಣದ ತನಿಖೆ ನಡೆಸುತ್ತಿದ್ದಾರೆ.
ಬರೀ ಇದೊಂದೇ ಅಲ್ಲದೆ, ಶಿವಾಜಿ ಕೋಟೆ ಮೇಲೆ ಮದ್ಯಪಾನ ಮಾಡುವವರನ್ನು ಗುಂಪೊಂದು ಥಳಿಸುತ್ತಿರುವ ಅನೇಕ ವಿಡಿಯೋಗಳು ಯೂಟ್ಯೂಬ್ನಲ್ಲಿ ವೈರಲ್ ಆಗಿದ್ದು, ಹಲ್ಲೆಕೋರೆಲ್ಲ ಒಂದೇ ಗುಂಪಿನವರಾ? ಅಥವಾ ಬೇರೆಯವರಾ? ಎಷ್ಟು ಜನರಿದ್ದಾರೆ ಎಂಬ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
ಶಿವಾಜಿಕೋಟೆಯ ಬೇರೆಬೇರೆ ಸ್ಥಳಗಳಲ್ಲಿ ಚಿತ್ರೀಕರಿಸಲಾದ ವಿಡಿಯೋಗಳು ಹಲವು ಇದ್ದು, ಯಾರಾದರೂ ಅಲ್ಲಿ ಮದ್ಯಪಾನ ಮಾಡುತ್ತಿರುವುದನ್ನು ನೋಡಿದರೆ ಸಾಕು ಅವರ ಬಳಿ ಹೋಗುವ ಈ ಗುಂಪು ಕ್ಷಮೆ ಕೇಳುವಂತೆ ಒತ್ತಾಯಿಸುತ್ತದೆ ಮತ್ತು ಅವರಿಗೆ ಮನಬಂದಂತೆ ಥಳಿಸುವುದನ್ನು ವಿಡಿಯೋದಲ್ಲಿ ನೋಡಬಹುದು. ಅದರಲ್ಲೂ ಪೊಲೀಸರ ಮೇಲೆ ಇವರು ಹಲ್ಲೆ ನಡೆಸಿರುವ ವಿಡಿಯೋ ಕೂಡ ವೈರಲ್ ಆಗಿದೆ.
ಈಗ ವೈರಲ್ ಆದ ವಿಡಿಯೋದಲ್ಲಿ 11 ಮಂದಿ ಯುವಕರನ್ನು ಅರೆಬೆತ್ತಲೆ ಮಾಡಿದ್ದಲ್ಲದೆ ಕ್ಷಮೆ ಕೇಳಿಸಲಾಗಿದೆ. ಇನ್ನೆಂದೂ ಕೋಟೆಗೆ ಬಂದು ಮದ್ಯಸೇವನೆ ಮಾಡುವುದಿಲ್ಲ, ಶಿವಾಜಿ ಮಹಾರಾಜರನ್ನು ಗೌರವಿಸುತ್ತೇವೆ ಯುವಕರು ಹೇಳಿದ ನಂತರ ಅವರನ್ನು ಬಿಡಲಾಗಿದೆ.
1949ರ ಬಾಂಬೆ ನಿಷೇಧ ಕಾಯ್ದೆಯ ಸೆಕ್ಷನ್ 140 ರ ಅನ್ವಯ ಸಾರ್ವಜನಿಕ ಸ್ಥಳಗಳಲ್ಲಿ ಮದ್ಯಪಾನ ಮಾಡುವುದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಮಹಾರಾಷ್ಟ್ರದ ಶಿವಾಜಿ ಕೋಟೆ ಜವಾಬ್ದಾರಿಯನ್ನು ಆರ್ಕಿಯಲಾಜಿಕಲ್ ಸರ್ವೆ ಆಫ್ ಇಂಡಿಯಾ ವಹಿಸಿಕೊಂಡಿಲ್ಲ. ಇನ್ನೂ ಇದರ ಸುಪರ್ಧಿ ಜಿಲ್ಲಾಡಳಿತದ ಕೈಯಲ್ಲೇ ಇದೆ. (ಏಜೆನ್ಸೀಸ್)