ಸೆಕೆಯ ತಾಪದೊಂದಿಗೆ ಕೈಸುಡುತ್ತಿದೆ ತರಕಾರಿ ಬೆಲೆ

ಬೀನ್ಸ್​ ಕೆಜಿಗೆ 200 ರೂಪಾಯಿಗೆ ಏರಿಕೆ -- ಶತಕ ದಾಟಿದ ಅಲಸಂದೆ-ಮಟ್ಟುಗುಳ್ಳ

ಪ್ರಶಾಂತ ಭಾಗ್ವತ, ಉಡುಪಿ
ವಿಪರೀತ ಸೆಕೆಯಿಂದ ಬಳಲಿ ಬೆಂಡಾಗುತ್ತಿರುವ ಜನರಿಗೀಗ ಪ್ರಮುಖ ತರಕಾರಿಗಳ ಬೆಲೆ ಏರಿಕೆಯ ಬಿಸಿಯೂ ತಟ್ಟತೊಡಗಿದೆ. ಈಗಾಗಲೇ ಅಗತ್ಯ ವಸ್ತುಗಳ ದರವೂ ಗಗನಕ್ಕೇರಿದ್ದು, ಮಾರುಕಟ್ಟೆಯಲ್ಲಿ ತರಕಾರಿ ದರವೂ ಬರೆ ಎಳೆದಿದೆ.

ಈ ಮೊದಲೇ ಹೆಚ್ಚಿನ ದರವಿದ್ದ ಬೀನ್ಸ್​ ಇದೀಗ ಕೆಜಿಗೆ 180ರಿಂದ 200ರೂ.ಗೆ ಏರಿದ್ದು, ಅಲಸಂದೆ ತಾನೇನೂ ಕಡಿಮೆ ಇಲ್ಲ ಎಂದು ಈಗಾಗಲೇ ಶತಕ ಬಾರಿಸಿದೆ. ಮಾರುಕಟ್ಟೆಗೆ ತೆರಳಿದ ಗ್ರಾಹಕರಿಗೀಗ ತರಕಾರಿಗಳ ಬೆಲೆ ಕೇಳಲೂ ಆತಂಕಗೊಳ್ಳುವಂತಾಗಿದೆ.

ಬೀನ್ಸ್​ಗೆ ಬಲು ಬೇಡಿಕೆ

ಇದೀಗ ಮದುವೆ ಇನ್ನಿತರ ಶುಭ ಕಾರ್ಯಗಳ ಸೀಸನ್​ ಇದ್ದು, ಅಡುಗೆಯ ಪ್ರಮುಖ ತರಕಾರಿಯಾದ ಬೀನ್ಸ್​ನ ದರ ಏರಿಕೆ ಕಂಡಿದೆ. ಕಳೆದವಾರ ಕೆಜಿಗೆ 80 ರೂ. ಇದ್ದ ಬೀನ್ಸ್​ನ ದರ ದ್ವಿಗುಣಗೊಂಡಿದ್ದು, ಗ್ರಾಹಕ ಕೈ ಸುಟ್ಟುಕೊಳ್ಳುವಂತಾಗಿದೆ. ಅಲಸಂದೆಗೂ ಸಹ ಬಹು ಬೇಡಿಕೆ ಇದ್ದು, ಅಗತ್ಯಕ್ಕೆ ತಕ್ಕಷ್ಟು ಪೂರೈಕೆ ಆಗುತ್ತಿಲ್ಲ. ಹೀಗಾಗಿ ಇದರ ದರವೂ ಸಹ ಡಬಲ್​ ಆಗಿದೆ.

ಹುಬ್ಬೇರಿಸಿದ ಮಟ್ಟುಗುಳ್ಳ

ದಕ ಹಾಗೂ ಉಡುಪಿ ಭಾಗದಲ್ಲಿ ಜನಪ್ರಿಯ ತರಕಾರಿಯಾದ ಉಡುಪಿ ಗುಳ್ಳ ಹಾಗೂ ಮಟ್ಟುಗುಳ್ಳ ಹೆಸರಿನ ಬದನೆಕಾಯಿಯ ದರವೂ ಶತಕ ಸಿಡಿಸಿದೆ. ಉಡುಪಿ ಗುಳ್ಳ ಲೋಕಲ್​ ಕೆಜಿಗೆ 70ರಿಂದ 80 ರೂ. ದರವಿದ್ದರೆ, ಮಟ್ಟುಗುಳ್ಳ 100ರಿಂದ 120ರೂ. ವರೆಗೂ ದರವಿದೆ. ತೊಂಡೆಕಾಯಿ ಹಾಗೂ ಕ್ಯಾರೆಟ್​ ಸಹ 60ರಿಂದ 80ರೂ. ನಿಗದಿ ಮಾಡಿಕೊಂಡಿದೆ. ಮದುವೆ-ಉಪನಯ ಇನ್ನಿತರ ಕಾರ್ಯಕ್ರಮಗಳ ಹಿನ್ನೆಲೆಯಲ್ಲಿ ಇವುಗಳ ದರವೂ ಏರಿಕೆ ಕಂಡಿದ್ದು, ಆರ್ಥಿಕ ಹೊರೆಯಿಂದ ಗ್ರಾಹಕ ಹುಬ್ಬೇರಿಸುವಂತಾಗಿದೆ.

ಬಸಲೆಗೆ ಕೀಟಬಾಧೆ

ಉಡುಪಿಯಲ್ಲಿ ಬಸಲೆಯನ್ನೂ ಹೆಚ್ಚಿನ ಪ್ರಮಾಣದಲ್ಲಿ ಬೆಳೆಯುತ್ತಿದ್ದು, ಈ ಬಾರಿ ಕೀಟಬಾಧೆಯಿಂದ ಸಲು ಪ್ರಮಾಣ ಕುಗ್ಗಿದೆ. ಎಲೆಗಳನ್ನು ಕೀಟಗಳು ರಂಧ್ರ ಮಾಡುತ್ತಿರುವುದರಿಂದ ಅವು ಹಳದಿ ಬಣ್ಣಕ್ಕೆ ತಿರುಗಿ, ಒಣಗತೊಡಗಿವೆ. ಹಿರಿಯಡ್ಕ ಭಾಗದಿಂದ ಉಡುಪಿ ಮಾರುಕಟ್ಟೆಗೆ ಬಸಲೆ ಪೂರೈಕೆಯಾಗುತ್ತಿದ್ದು, ತರಕಾರಿ ಅಂಗಡಿಗಳಲ್ಲಿ 4 ಕೋಡಿಗೆ 50 ರೂ. ಹಾಗೂ ಸಂತೆಗಳಲ್ಲಿ 100 ರೂ. ದರವಿದೆ.

ಆಸರೆಯಾದ ಟೊಮ್ಯಾಟೋ, ಈರುಳ್ಳಿ

ತರಕಾರಿಗಳ ದರ ಏರಿಕೆ ನಡುವೆಯೇ ಸದ್ಯಕ್ಕೆ ಟೊಮ್ಯಾಟೋ, ಈರುಳ್ಳಿ, ಬಟಾಟೆ ದರ ಯಥಾಸ್ಥಿತಿಯಲ್ಲಿದ್ದು, ಕೆಜಿಗೆ 30ರಿಂದ 40 ರೂ. ಇದೆ. ನಿತ್ಯದ ಅಡುಗೆಗೆ ಸದ್ಯ ಈ ತ್ರಿಮೂರ್ತಿಗಳೇ ಆಧಾರ ಆಗಿದ್ದಾರೆ. ವಿಪರೀತ ಬಿಸಿಲು ಇರುವ ಹಿನ್ನೆಲೆಯಲ್ಲಿ ಬೆಳೆ ಪ್ರಮಾಣ ಕುಸಿದಿದ್ದು, ಇವುಗಳ ಬೆಲೆ ಏರಿಕೆ ಆಗುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. ಸಪ್ಪುಗಳ ದರದಲ್ಲೂ ತುಸು ಏರಿಕೆಯಾಗುತ್ತಿದ್ದು, ಬಿಸಿಸಿಲಿನಿಂದಾಗಿ ಇನ್ನಷ್ಟು ದರ ಏರಲಿದೆ ಎನ್ನುತ್ತಾರೆ ತರಕಾರಿ ವ್ಯಾಪಾರಿಗಳು.

• ಪರ ಜಿಲ್ಲೆಯ ಅವಲಂಬನೆ:
  ಉಡುಪಿಗೆ ಬರುತ್ತಿರುವ ಶೇ. 80 ಪ್ರಮಾಣದಷ್ಟು ತರಕಾರಿಗಳು ಹೊರಜಿಲ್ಲೆಯದ್ದೇ ಆಗಿದೆ. ಬೆಳಗಾವಿಯಿಂದ ರಿಂಗ್​ ಬೀನ್ಸ್​, ಕ್ಯಾರೆಟ್​. ಹೂಕೋಸು, ಗೆಣಸು, ಬೀಟ್ರೂಟ್​ ಬರುತ್ತಿದೆ. ಚಿಕ್ಕಮಗಳೂರಿನಿಂದ ರಿಂಗ್​ ಬೀನ್ಸ್​, ವೈಟ್​ ಬೀನ್ಸ್​, ಕ್ಯಾಪ್ಸಿಕಂ, ಹೀರೇಕಾಯಿ, ಕೊತ್ತಂಬರಿ ಬರುತ್ತಿದೆ. ಮೈಸೂರು ಹಾಗೂ ಬೆಂಗಳೂರಿನಿಂದ ಅಲಸಂದೆ, ಸವತೆಕಾಯಿ, ಸಾಂಬಾರ್​ ಸವತೆಕಾಯಿ ಬರುತ್ತಿದೆ. ಬೇಸಿಗೆ ಆಗಿದ್ದರಿಂದ ತರಕಾರಿ ಬೆಳೆಯೂ ಕಡಿಮೆಯಾಗಿದ್ದು, ಬೇಡಿಕೆಗೆ ತಕ್ಕಷ್ಟು ಲಭಿಸುತ್ತಿಲ್ಲ. ದರ ಹೆಚ್ಚು ಇರುವುದರಿಂದ ಲಾಭವೂ ಕಡಿಮೆ ಸಿಗುತ್ತಿದೆ. ಬಿಸಿಲಿನಿಂದ ತರಕಾರಿ ಹಾಳಾಗುತ್ತಿದ್ದು ನಷ್ಟವೂ ಆಗುತ್ತಿದೆ ಎನ್ನುತ್ತಾರೆ ಉಡುಪಿಯ ಹೋಲ್​ಸೇಲ್​ ವ್ಯಾಪಾರಿ ಶರಣು ಸಿ.ಎಚ್​.

ತರಕಾರಿ -- ಹೋಲ್​ಸೇಲ್​ (ಕೆಜಿ ರೂ.) -- ಅಂಗಡಿಗಳಲ್ಲಿ (ಕೆಜಿ ರೂ.)
ರಿಂಗ್​ ಬೀನ್ಸ್​ 170 -- 200
ವೈಟ್​ ಬೀನ್ಸ್​ 140 -- 170
ಅಲಸಂದೆ 100 -- 130-140
ಕ್ಯಾಪ್ಸಿಕಂ 55 -- 80
ಹೀರೆಕಾಯಿ 55 -- 80
ಕೊತ್ತಂಬರಿ 50 -- 80
ಕ್ಯಾರೆಟ್​ 50 -- 80-90
ಗೆಣಸು 45 -- 75-80
ಬೀಟ್ರೂಟ್​ 35 -- 50-60
ಸವತೆಕಾಯಿ 50 -- 70-80
ಸಾಂಬಾರ್​ ಸವತೆ 25 -- 50-60
ಉಡುಪಿ ಗುಳ್ಳ 60 -- 80-90
ಮಟ್ಟುಗುಳ್ಳ 80 -- 100-120
ಹೂಕೋಸ್​ 40 -- 60