ನವದೆಹಲಿ: ಜಾಗರಿಕವಾಗಿ ಅಮೆರಿಕ, ಸ್ಪೇನ್, ಇಟಲಿ, ಫ್ರಾನ್ಸ್, ಬ್ರಿಟನ್ಗಳನ್ನು ಕರೊನಾ ಇನ್ನಿಲ್ಲದಂತೆ ಕಾಡುತ್ತಿದೆ. ಅದರಲ್ಲೂ ಅಮೆರಿಕವೊಂದರಲ್ಲಿಯೇ ಸೋಂಕಿತ ಪ್ರಕರಣಗಳ ಸಂಖ್ಯೆ 12 ಲಕ್ಷ ದಾಟಿದ್ದು, ಸತ್ತವರ ಸಂಖ್ಯೆ 70 ಸಾವಿರ ತಲುಪಿದೆ. ಇನ್ನು ಸ್ಪೇನ್, ಇಟಲಿ, ಫ್ರಾನ್ಸ್, ಬ್ರಿಟನ್ಗಳಲ್ಲಿ ಸರಾಸರಿ 2 ಲಕ್ಷ ಸೋಂಕಿತರಿದ್ದು, ಸಾವಿನ ಸಂಖ್ಯೆ ತಲಾ 20 ಸಾವಿರ ದಾಟಿದೆ.
ಈವರೆಗೆ ಅಮೆರಿಕ ಕರೊನಾಗೆ ಭಾರಿ ಬೆಲೆ ತೆತ್ತಿದೆ. ಆದರೆ, ಜೂನ್ ವೇಳೆಗೆ ಅಮೆರಿಕದ ಸ್ಥಿತಿ ಇನ್ನೂ ಚಿಂತಾಜನಕವಾಗಲಿದೆ ಎಂದು ಆ ದೇಶದ ಆಂತರಿಕ ವರದಿಯೇ ಹೇಳುತ್ತಿದೆ.
ಜೂನ್ ವೇಳೆಗೆ ಕರೊನಾದಿಂದಾಗಿ ಪ್ರತಿದಿನ 3,000 ಜನರ ಸಾವು ಹಾಗೂ ನಿತ್ಯವೂ 2 ಲಕ್ಷ ಹೊಸ ಪ್ರಕರಣಗಳು ವರದಿಯಾಗಲಿವೆ ಎಂಬ ಆತಂಕಕಾರಿ ವರದಿ ನೀಡಲಾಗಿದೆ. ಇದರ ನಡುವೆಯೇ ಅಮೆರಿಕದ 12 ರಾಜ್ಯಗಳು ಆರ್ಥಿಕ ಚಟುವಟಿಕೆಗಳಿಗೆ ಮುಕ್ತ ಅವಕಾಶ ನೀಡಿವೆ.
ಇದನ್ನೂ ಓದಿ; ಜಮ್ಮು ಮತ್ತು ಕಾಶ್ಮೀರದ ಮೂವರು ಛಾಯಾಗ್ರಾಹಕರಿಗೆ ಪುಲಿಟ್ಜರ್ ಪ್ರಶಸ್ತಿ
ಸದ್ಯ ಅಮೆರಿಕದ ಆರ್ಥಿಕ ಸ್ಥಿತಿ ಕೂಡ ಅತ್ಯಂತ ದುಸ್ಥಿತಿಗೆ ತಲುಪಿದೆ. 3 ಕೋಟಿಗೂ ಅಧಿಕ ಜನರು ನಿರುದ್ಯೋಗ ಭತ್ಯೆ ಅಥವಾ ಸೌಲಭ್ಯಕ್ಕಾಗಿ ಅರ್ಜಿ ಸಲ್ಲಿಸಿದ್ದಾರೆ.
ಕರೊನಾದಿಂದಾಗಿ ಮುಂದಿನ ದಿನಗಳು ಭಾರಿ ದುಸ್ತರವಾಗಲಿದೆ. ಈ ನಡುವೆ ಆರ್ಥಿಕ ಚಟುವಟಿಕೆಗಳಿಗೆ ಅವಕಾಶ ನೀಡುವುದು ಪರಿಸ್ಥಿತಿಯನ್ನು ಇನ್ನಷ್ಟು ವಿಷಮಗೊಳಿಸಲಿವೆ ಎಂದು ಅಲ್ಲಿನ ಮಾಧ್ಯಮಗಳು ಎಚ್ಚರಿಕೆ ನೀಡಿವೆ.
ಆದರೆ, ಸಾವು ಹಾಗೂ ಸೋಂಕಿತರ ಸಂಖ್ಯೆ ಹೆಚ್ಚಾಗುವ ವರದಿಯನ್ನು ಶ್ವೇತ ಭವನ ಹಾಗೂ ಸೆಂಟರ್ ಆಫರ್ ಡಿಸೀಸ್ ಕಂಟ್ರೋಲ್ ಆ್ಯಂಡ್ ಪ್ರಿವೆನ್ಶನ್ (ಸಿಡಿಸಿ) ನಿರಾಕರಿಸಿವೆ. ಇದು ಅಧಿಕೃತವಲ್ಲ ಎಂದು ಹೇಳಿವೆ. ಆದರೆ, ವರದಿಯಲ್ಲಿ ಸಿಡಿಸಿ ಲಾಂಛನವನ್ನು ಬಳಸಲಾಗಿದೆ.
ಈ ವರದಿಯನ್ನು ಅಮೆರಿಕದ ಜಾನ್ ಹಾಪ್ಕಿನ್ಸ್ ಬ್ಲೂಮ್ಬರ್ಗ್ ಸ್ಕೂಲ್ ಆಫ್ ಪಬ್ಲಿಕ್ ಹೆಲ್ತ್ನ ಸಾಂಕ್ರಾಮಿಕ ರೋಗಗಳ ವಿಭಾಗದ ಸಹಾಯಕ ಪ್ರಾಧ್ಯಾಪಕ ಜಸ್ಟಿನ್ ಲೆಸ್ಲರ್ ತಯಾರಿಸಿದ್ದಾರೆ ಎಂದು ಹೇಳಲಾಗಿದೆ.